Filipenses 2

1 Nequie tunu ñia nzu arquiêhua equie cuendaê Jesucristo, nu tunu secahua bee saêhua, nu tunu nzu Espíritu Santo cuna liêihua tunu rriêi nzeêcahua lubee saêahua, tunu ruaêa arquiêhua bee saêhua, 2 scua uhuañihua para nú ñiala tsu arquia, uhuañi nzeêcahua cuna bee saêhua, nu uzecahua bee saêhua nu tucutsia elliebacuê uriêihua. 3 Lunú riêihua, la riêihuane para nú riêitsiahua ana lubeelá bee bene, urre para nú zucuê ayahua liêihua nzalá nú aca lleêna arquiêhua lubeelá bee bene uriêhua elliebacuê nú neca equielá bee bene luquela liêihua. 4 La laênahua nú huañi nzeêca liêitsiahua, sino que ulaênahua nú riêihua elietsa lu beelá bee bene. 5 Aca lleêna arquiêhua tucu nú unga lleêna arquiê Jesucristo, 6 Xne añinzuca nú necanu Diose pero né tsutaênu nú aninu nú igualenu Diose. 7 Sino que uhuachunu nú rnibiyaênu, nu ubeêtanu lu iliulabequieê xi neca tucu mosoê nu ungulanu xi rala bee bene. 8 Nu chenu unganu bene iliulabe unga lleêna arquiênu, nu uzucuênu nú uni Diose, hasta ungutinu lu cruse. 9 Enzeêe chiquiê udeteê Diose nú rnibiyaênu nu uriêi Diose nú chiquiê neca equie nú leenu luyebee nú lee bee bene. 10 Para nú chenu yeneê bee bene nombreê Jesucristo, che ye bee bene enu nucuaêa liñibe, cuna ye bee enu nucuaêa lu iliulabe, cuna ye bee enu nucuaêa liñi yuu, yebeella tsulliqui beella lunu. 11 Nu ye bee bene nii nú liêinu necanu enu rnibiyaê lu yeene para nú zucuê ayabeella Pa Diose. 12 Bee saêa enu nzeli arquiê Jesucristo chiquiê seêca liêihua, xne siempre uzucuêhua nú rnia chenu nzua letahua, leêca scua uzuêcuêhua nú rnia nee nú lecaa luhua. Ulliquihua Diose nu uluêcuhua ulaêna lunu, xne scua riala riêi bee bene enu utsilaêla Diose. 13 Xne lu Diose nzeêta elliebacuê nzeêca nú rriêihua, nu rriêinu elietsa luhua para nú riêihua lunú riuê arquiênu. 14 Uriêihua ye lunú riala riêihua sin nú lehua, nu sin nú liuhua. 15 Para nú lecaxi niquiya bee bene lu cuendaêhua nu la zeêta beei liêihua. Liêihua enu neca lliêñi Diose uriêi nzeêcahua lubee bene enu la chenala inziuê Diose, lubee enu nzenalatsia inziu nú necha neca para nú acahua letabeei xi neca bee belá enu rduêllieêe liñibe. 16 Lunú nzutaê arquiêhua lu Stichiaê Diose nú rliquiê elu nehuañi. Scua ñia tsu arquia equie cuendaêhua xne nediyaa nú uzibiê nú uriêá nu né chenze xleêa. 17 Xne lunú nzeli arquiaêahua Diose neca xi neca uêna lunu, nu ñia nzu arquia. Lecaxi riêi mase nú atia para nú zaê uêna cuaê, lunú ñia nzu arquia lu cuendaêhua. 18 Leêca scua ñiañia tsu arquiêhua tucu nú ñia nzu arquia. 19 Tucutse Jesucristo laleaê xeêla Timoteo luhua para nú ñia tsu arquia chenu yeêtayulla resuna lua nú xneca nucuaêahua. 20 Xne lecati stucu enu nzenu arquiê tucu nú nzenu arquiê Timoteo nú xneca nucuaêahua tucu nú nzenu arquia equie cuendaêhua; 21 ye beelá bee bene nzenutsia arquiê lunú xneca nehuañi nzeêca, pero la chenu arquiêbeella nú riêibeella lunú niarquiê Jesucristo. 22 Pero liêihua nediyaêlaêhua xneca rriêi Timoteo, nu leêca nediyaêhua xneca rriêilla elietsa lua nú rixiuleêeru stichiaê Jesucristo, tucu nú rriêi tucu enduê elietsa lu paêlla scua rriêilla elietsa lua. 23 Enzeêe niarquia xeêla Timoteo luhua, chenu riêá beyaê nú xneca chiulue lu cuendaa. 24 Tucutse Jesucristo nzuculua nú chu nzelabiêya liêihua. 25 Seêca nú rquiêña xeêla zeca saêahua Epafrodito luhua, liêihua uxeêlahualla lua nú riêilla elietsaa lunú xi rquiêña. Nu scua rriêilla elietsa lua nu junto nehuana ulleêcaru. 26 Nu chiquiê niarquiêlla lañiê zecaêlla liêihua, nu nzenu arquiêlla equie cuendaêhua equie nú unga biyaêhua nú unga ritilla. 27 Neli nú unga ritilla hasta nú yamerotsia atilla. Pero uhuaêa arquiê Diose liêilla, nu la neca lu cuendaê liêitsialla sino que leêca uhuaêa arquiênu liêá, para nú la nehuanalá nzu arquia tucu nú nehuanala utsu arquia, 28 enzeêe chu xeêla zecalla luhua para nú ñia tsu arquiêhua, lunú lañiêhua liêilla, nu para nú la tsunehuanalá arquia. 29 Chenu riñalla luhua ñia utsu arquiêhua uyucu nzeêcahualla, lunú necalla saêahua enu nzeli arquiaêahua Jesucristo, nu uzecahua beelá bee bene enu neca xi neca liêilla. 30 Xne yamero atilla equie nú sibiêlla lu Jesucristo, nu yamero atilla equie nú uriêilla elietsa lua, luhuare nú leca modo ariêihua elietsa lua.