Romanos 14

1 Uriêi nzeêcahua lu tucu bene enu apenatsia uchili arquiê Jesucristo nu la liu ruêuhua cuna liêilla, tunu la riêilla elliebacuê tucu nú rriêihua elliebacuê. 2 Xne nuê bee bene enu nzeli arquiê Jesucristo seca nú nuê beyaê acu bene xitse pero nuêbee enu apenatsia nzeli arquiê Jesucristo, seca nú ñialá nú acu bene purotsia bee verdura para nú la aculla beenú la yala aculla. 3 Pero bene enu seca nú nuê beyaê acu bene xitse, la yala nú huachulla bene enu seca nú la yala acu bene xitse. Nu bene enu seca nú nuê beenú la yala acu bene, la yala nú zeêta bene bene enu racu ye nú racu, xne tucutse beneê Diose neca beella. 4 Enzeêe, ¿ti neca bene nú zeêta bene saêbene enu nzeli arquiê Jesucristo equie cuendaê bee nucuaê? Xne Diose nediyaê tunu rriêi nzeca bene nu tunu la riêi nzeêca bene. Nu tunu lascaê riêi bene beyaê nú xneca riêilla, che Jesucristo rluêcu poder para nú riêinu elietsa lulla para nú riêilla lunú riala riêilla. 5 Leêca scua nuê bee saêahua enu nzeli arquiê Jesucristo seca nú nuê bee bichia cachi nú la yala riêi bene riñaê nu nuê bee enu seca nú ye bee bichia ihuale neca. Pero lecaxi riêi nucuaê xne cada nú nzeli arquiê cada tucu bene. 6 Xne bene enu seca nú nuê bichia cachi nú la yala riêi bene riñaê rriêilla scua para nú luêculla ulaêna lu Diose. Nu bene enu seca nú ye bee bichia iguale neca, leêca rluêculla ulaêna lu Diose. Nu bene enu racu ye nú racu, racullae xne nediyaêlla nú Diose uliquiêi, nu rdeteêlla cheêtsa lunu equie cuendaêe. Nu bene enu seca nú nuê elubacu nú la yala acu bee bene, rriêilla scua xne secalla nú scua rluêculla ulaêna lu Diose nu leêca rdeteêlla cheêtsa lu Diose. 7 Niê tucuaêahua la nehuañiaêahua lunú niarquiêtsiaêahua, nu leêca la atiaêahua equie nú niarquiêtsiaêahua. 8 Tunu nehuañiaêahua, equie cuendaê Jesucristo nehuañiaêahua nu para liêinu nehuañiaêahua, nu tunu atiaêahua, equie cuendaê Jesucristo atiaêahua nu para liêinu atiaêahua, enzeêe tunu nehuañiaêahua urre atiaêahua necalaêahua para Jesucristo. 9 Xne para enzeêe unguti Jesucristo nu uhuañi zecanu, para nú nibiyaênu sia lubee bene enu nehuañi nu sia lubee bene enu unguti. 10 Enzeêe, ¿xiquie nú seêtalu nu rluachulu bee saêlu enu nzeli arquiê Jesucristo? Nu yeêahua riñaêahua ante Diose para nú lualunue lu cuendaêahua. 11 Xne lu ichiê Stichiaê Diose rni: Nu liêá enu neca Diose enu nehuañi nia luhua nú ye bee bene zucu lliqui lua. Nu ye bee bene ni nú liêá necaa Diose, scua uni Diose. 12 Nu cada tucuaêahua deteêahua cuenda lu Diose lunú xi uriêi cada tucuaêahua. 13 Enzeêe, la yala zeêtaêahua bee saêahua enu nzeli arquiê Jesucristo mejora te biêyaêahua liaêahua nú la yala nú riaêahua nú riêi stucu bene dula. 14 Nu lunú necaa beneê Jesucristo, nediya nzeêcaa nú lacane dula nú racu bene xitse pero para bene enu seca nú leca modo nú acu bene xitse, para liêilla necane dula tunu raculla xitse. 15 Neequie tunu equie cuendaê beenú raculu seca saêlu enu nzeli arquiê Jesucristo nú dula neca nú rriêilu, nu tunu la riêicasululla che neca nú la zecalu liêilla ubiêya para nú la riêi nú raculu nú riêi saêlu dula, xne leêcanuu equie cuendaêlla unguti Jesucristo lu cruse. 16 Enzeêe la riêilu xi riêilu para nú la zeêta bee saêlu liêilu añinzuca nú liêilu nediyaêlu nú neca nzeêca nú rriêilu. 17 Xne lu Diose la neca equie cuendaê nú racu bene urre equie cuendaê nú rueêe bene nú másela seca, sino que lunú máse seca ante Diose necane nú huañi bene tucu nú riala nú huañi bene nú huañilla sin xuu nu ñia nzu arquiêlla equie cuendaê Espíritu Santo. 18 Nu bene enu nehuañi scua equie nú nzenalalla Jesucristo, sucuêlla tucu nú niarquiê Diose, nu tucu nú riuê arquiê bee bene. 19 Enzeêe rquiêña nú laênaêahua nú huañi nzeêcaêahua cuna bee saêahua sin xuu para nú nzeriêilaêahua beyaê xneca riala chenalaêahua inziuê Diose. 20 Biêyahua xne canú equietsia beenú racuhua riêihua nú riêi bee saêhua dula, neli nú nuê beyaê acu bene ye nú nuê pero lunú necha neca tunu para saêlu enu nzeli arquiê Jesucristo neca dula lunú raculu rnitilulu liêilla che. 21 Enzeêe tunu nuêbee saêlu enu nzeli arquiê Jesucristo seca nú necha neca tunu acu bene mii nu leêca necha neca nú hueê bene viñiu urre stucu nú rene, mejora la acu bene nu la hueê bene ante lulla para nú la riêilu nú riêilla dula. 22 Añinzuca nú liêilu nediyaêlu nú lecaxi neca nú acu bene xitse, pero mejora liêitsialu cuna Diose nediyaêlu nucuaê. Liêá nia nú ñia neca lu cuendaê bene enu racu xitse sin nú zaê arquiêlla. 23 Pero bene enu saê arquiê equie nú racu, xne tunu para liêilla dula neca nú acullae nu racullae chequie eêcuñialla rriêilla dula equie nú rriêilla elliebacuê nú la neca nzeêca nú rriêilla. Ye nú rriêilla nu saê arquiêlla chenu rriêillae rriêilla dula che.