HEBREOS 8

1 Lo grë miá¹e quiane naa nu, miá¹e racladzpaa naa gacnaá¹ to nac miá¹ rii: Jesús nac zhipxoz nroob ne, ni zaatne zob Dios, meá¹ nroob ne rnabey, ga zob me. 2 Gbaa no me, ga quiayuá¹ me dziin zaatne nacpaa yadoo, Dios bzaa yadoo co, led yedraa miá¹ co bzaa miech. 3 Ndioá¹ ne gaá¹le, zha ne rac pxoz nroob, laa zho rzo, zeeá¹a grë ma, grëgaa ncuaaá¹e rgogon miech, zha rdeeda lo Dios; scaquegaa Jesús, ye me bdeed me gon lo Dios. 4 Teḻ niaca miá¹e bii no me lo guidzliu niina, grieelod gac me pxoz nroob, sacne nole pxoz nroob ne rdeed grë gon co lo Dios, zigne rnabey ley. 5 Grë dziin ne ruá¹ grë zha ne rac pxoz nroob lo guidzliu rii, lega nacsew zig zhimlë grë miá¹e rac gbaa; yadoo ne rio zho lo guidzliu riiw, lega nacsew zig zhimlë yadoo ro ne zob gbaa. Goḻsoladz gaá¹le, zeeá¹e laa Moisés gzaa yadoo, rëb Dios lo me: “Zigne goá¹ bluse naa lo luu guic gui ga, sca none gzaa luuw." 6 Gacxe waa, teḻ Jesús meá¹ ne nac zhipxoz nroob ne niina, mazdraa non dziin ne quiayuá¹ me; sac goá¹, zeeá¹e pso Dios me gac me pxoz nroob, psaá¹ Dios diidz stib zha grieelo ygaa ne grë guieḻnzaac nroob ne gneedz Dios lo ne, ni me guá¹ctsiá¹ ne lo Dios. 7 Wenraa nac diidz ne psaá¹ Dios ga, sac teḻne niaca nlëb diidz ne biaaá¹ glo ga zeeá¹e rëb me zha guiaaá¹wen miech lo me, dzigo nod pe nacne mbiire nsaá¹ me stib xtiidz me. 8 Ni bzeetlegaa me ne laa me csaá¹ stib xtiidz me, sac grë zha ne biaaá¹nie xtiidz me glo, loxaque beeá¹ctal zho xtoḻ zho. Miá¹ co ga raquiet lo Xtiidz me, zaatne znu rnee: Rnee meá¹ ndzon ne rnabey: Zdziá¹ dze ne gbiire guiaaá¹ no diidz grë no zha Israel, ni zha Judá. 9 Per gacdraaw zig diidz ne biaaá¹ no grë no xmeá¹gol zho, zeeá¹e rrieequia bzheeá¹ naa nia grë zha gol co, blee naa zho lo caxtigw ne noded zho Egipt; sac ni lalnu güeynaḻd zho diidz ne biaaá¹ no ga, nacne niicle naagaaw, psaanladz naa zho. 10 Zeeá¹e gdziá¹ dze co, znu nac diidz ne guiaaá¹ no grë no zha Israel: Grëse xley naa, nis nis gacnaá¹ zhow, zig nac zeeá¹e haxta leá¹ zdoo zho, leá¹ guic zho zhobneew. Dzigosi laa zho guá¹bey naa ne naa nac xDios zho, ni niicle naagaaw, laa naa guá¹bey zho ne lo naa ngab zho. 11 Dzigosi yquiindraa tso zho gnee zho lo meá¹lidz zho, lo meá¹ladz zho: “None guá¹bey luu Dios goá¹.” Sac leá¹ dze co, grëse zho ruá¹beyle zho naa, niicle zha ne mazdraa wina, niicle zha ne mazdragaa nona. 12 Teḻ pe nactaa xquieḻntseeb zho, zuá¹ naa zhow perdon; gdziá¹draa dze csoladz naa grë falt ne beeá¹ zho lo naa. 13 Zeeá¹e sca bzeet me ne laa me csaá¹ stib xtiidz me, ga rlu ne rquiindraa miá¹e biaaá¹ glo ga; sac nac grë ncuaaá¹ gox rquiindraaw, laaw nole par nitlow.