1 Tesalonicenses 1

1 Ya̱ Baly, gal nu Silvano, gal nu Timoteo zeed de̱ gyicy ii lo der bicy na nu nac Crisht nu yuê gyedz Tesalónica, de ru mbecy ni Ãgyoozh, Uz den, gal nu Shuaan den Jesucrisht. Ãgyoozh gyicy mi faboor nu nap gyicy num de ru, nunu gyicy mi nu cheti ri añ ni der. 2 Dub laa tiem dric de̱ gras ni Ãgyoozh nu nac dela der, nunu rzat de̱ de ru lat nu rne̱e̱ du̱ de̱ Ãgyoozh. 3 Nunu lat nu rne̱e̱ du̱ de̱ Ãgyoozh Uz den, ryezaê lagy de̱ de coz nu ricy der nu nac nu ricy cup der consuel lom, gal nu de riiñ nu ricy der nu nac nu dzi rca der mi, gal nu lac mod ragyee der ornu rzac zir nu nac nu rgyish lo der lo Shuaan den Jesucrisht. 4 Der bicy na, Ãgyoozh rcam de ru, nunu rad lagy den nu bi pcuim der nu gac nim. 5 Tees ornu pshaal de̱ de riidz nu sac ni Crisht lat der, walab riidz ziêl mne̱e̱ de̱, sinu bicy de̱ nu gad lagy der de coz ily nu ricy Espiriit Yon ni Ãgyoozh, nunu bric de̱ nu gad lagy der nu zeña lagy nap la de̱ nu de riidz zeê, ndeê coz rishli. De ru nap rad lagy der mod nu gusa̱ de̱ lat der. Byub de̱ tub mod nu nap par de ru. 6 Zeê de ru bicy der gal mod nu bicy de̱ ya̱ nunu gal mod ni Shuaan den Jesuuz. Nunu Espiriit Yon ni Ãgyoozh bicy mi nu tonaê la bet lagy der ornu pshet ic der ni de riidz zeê mas tonaê la bzac zi der nu nac ñii. 7 Ndeê nu briic der nu gad lagy dela mbecy nu ricy cup consuel lo Crisht nu yuê lo de yu ni Macedonia, gal nu de yu nu yuê lo yu ni Acaya nu lac mod gyicy dey. Briic der nu gad lagy dey nu lac mod gyicy dey nu nac mod nu bicy de ru. 8 Walab tub lo ziêl nu brush las de riidz ni Shuaan den Jesucrisht lo de yu ni Macedonia nu Acaya, nu nac de ru, sinu niê dela lugaar zaab riidz nu lac mod ricy cup der consuel lo Crisht. Ndeê nu walagyaêñ nu gne̱e̱ de̱ ni tub la riidz. 9 Dela mbecy zeê rnii dey nu dzi nap bicy nu der de̱ ya̱ ornu bri̱ de̱ lat der. Nunu rnii dey nu bi guca der nu driib zily ru nab. Orzeê brugyiê nu ricy der de coz nu rlagy biñ nu rishli nac Ãgyoozh, biñ nu mbañ. 10 Nunu niê rnii gaê dey nu rbez der Jesuuz, Iêñ Ãgyoozh, biñ nu bicy mi nu byabañ. Rbez der mi gal ornu ruum gyibaa cyid mi tuubaê tir. Mi zeê biñ nu co mbañ de ub na lo cashtig ni Ãgyoozh.