2 Corintios 9

1 Walagy ñi nu zeeda̱ gyicy lo der nu nac gun nu rteê der nu cuic ru ni de bicy na nu nac Crisht, 2 gun ya̱ rad lagya̱ nu rlagy der locyuub ru dey. Gun ya̱ byabica̱ gyel mbecy ni der lo de mbecy Macedonia. Mne̱e̱ nu de ru, mbecy Acaya, bi mnii der nu locyuub ru nese ñaên bded. Orzeê nu nac nu dzi nap bicy der, briic der fers ni zigy de mbecy Macedonia, gun orzeê niê ziêl gyicy dey yu zeê. 3 Orzeê na ya̱ zuu neza̱ de bicy na nu nac Crisht ii, gun orzeê cueê nu leew la gyabica̱ gyel mbecy ni der. Gun orzeê zu lily der gal nu mne̱e̱ lor. 4 Gun dzi ga cyid de mbecy Macedonia nu de̱ ya̱ ornu yapa̱ lo der. Orzeê benu zac dey nu a̱ê zu lily der, orzeê mas de̱ ya̱ tonaê la gat lo̱ de̱, gun dzi bicy cup de̱ consuel lo der. Zeê yegar de ru dzi zir gat lo der. 5 Ndeê nu ya̱ mnii to̱o̱ nu nap zir nu ne̱e̱ lo de bicy na nu nac Crisht nu cyid ga dey lo, gun orzeê locyuub dey de ru nu laazh der nu teêr gun nu mniir nu cuic ru. Gun orzeê bi yuê lily ñii ni der. Nañ gal nu na tub gun nu dub gusht la cuic der, walab nu rzi der cuic ru. 6 Pcaa ic der de riidz ii: Mbecy nu rnuuz coz miiñ mbigy, orzeê coz miiñaê rteêy. Mbecy nu rnuuz sheñ mbigy, sheñaê rteêy. 7 Tub ga la mbecy rlagy ñi nu cuic yu ca na nu gruu nañ lardooy. Nunu cueê gzi dey nu cuic yu. Ni cueê por fers la cuic yu. Gun Ãgyoozh yet lagy mi mbecy nu dub gal rii la lagy yu rbic yu nim. 8 Nunu Ãgyoozh gac cuic zaê lam de lo la coz nap nim ni der, gun orzeê dub laa tiem gad coz nu cyiiñ ni der, nunu grusubaê lañ par nu gyicy nu der ñii de lo la riiñ nap. 9 Gun lat de riidz ni Ãgyoozh rniiñ: Mbecy nap dub gal rii la lagy yu rbic yu ni mbecy zi. Nunu riiñ nap nu ricy yu, ndeê gzuñ tub la, rniiñ. 10 Ãgyoozh rbic mi de mbigy nu rnuuz mbecy. Nunu rbic mi coz nu gow dey. Orzeê na de ru na der gal nu na mbecy nu rnuuz la coz nu nac gun nu rbic ru. Ãgyoozh cuic mi de mbigy nu galagy ñi nu nuuz der. Nunu gyicy mi nu galy ñi ni der. Nunu cuic mi tub cosech sheñ ni der nu nac nu sheñ tiñ cuic der nim. 11 Ãgyoozh cuic mi sheñ ni der, gun orzeê gad mod nu cuic der sheñ de tir la nu cuic der. Gun orzeê zigy mbecy cuic dey gras ni Ãgyoozh nu nac gun nu zeed der ya̱a̱ de̱ ya̱. 12 Gun ornu zeed der gun lo de bicy na nu nac Crisht, walab tub lo ziêl nu cuic ru coz nu cyiiñ ni mbecy nu ricy falt ñi ni, sinu niê ziêl gyicy der nu zigy mbecy cuic yu gras ni Ãgyoozh nu nac gun nu zeed der. 13 Orzeê de yu zeê gyabic dey gyel mbecy ni Ãgyoozh, gun de coz nap nu gyicy der gyicy ñi nu gabe nu de ru rzuub gyidag der ni de riidz nu sac ni Crisht. Orzeê niê ziêl de yu zeê ca lagy dey lo Ãgyoozh nu nac de tiñ sheñ nu briic der ni dey gal nu ni dela mbecy. 14 Orzeê tonaê la gyet lagy de yu zeê nii nu dey Ãgyoozh nu nac de ru, gun mi zeê tonaê la nap bicy num der. 15 ¡Orzeê rlagy ñi nu gric den gras ni Ãgyoozh! ¡Ni wacaê la niin nu tantaê coz ily rbic mi ni den!