Santiago 4

1 ¿Ca druu de gyel yuu, gal nu de gyel deet nu yuê lat der? Druuñ lat de coz a̱ê nap nu ricy gyel yuu nañ lardoo der. 2 Rlagy der nu gad la coz nir, tees wagad ñi ni der. Orzeê rzu lily der nu cut ru losaêr. Rzaab lagy der la coz, tees wagad ñi ni der. Orzeê rucoo der, nunu rtub su losaê der. Wagad coz nu rlagy der, gun wacyiiñ der ñii lo Ãgyoozh. 3 Nunu mas rgyiiñ der ñii lo Ãgyoozh, tees wagyicy mi gal nu rnii der lom, gun rgyiiñ ton der. Rgyiiñ der coz nu yet ziêl lagy der. 4 ¡A̱ mbecy wagyicy paa! ¿A wagad lagy der nu benu yet lagy ru de coz a̱ê nap nu ricy mbecy ni gyishlombecy, orzeê yac losaê yuu der Ãgyoozh? Cyu ziêl mbecy nu rlagy gac amig ni de coz ni gyishlombecy, yac losaê yuuy Ãgyoozh. 5 ¿Walab gaal rnii too der nu se la la sac riidz ni Ãgyoozh zeê nu rniiñ: “Ãgyoozh tonaê la rcam espiriit nu brim nañ lardoo den, nunu se par ub ziêl mi rlagy mi ñii”, rniiñ? 6 Tees Ãgyoozh faboor ily zir ricy num de ub na gal nu rniiñ lat de riidz nim: “Ãgyoozh zam contr ni de mbecy leê, tees ricy mi faboor num de yu nu ricy gyel gyidz ni”, rniiñ. 7 Orzeê “O” mnii der ni Ãgyoozh. Gua der contr ni nuras, gun orzeê ruu chuy lo der. 8 Bechaê der lo Ãgyoozh. Orzeê Ãgyoozh gyechaê gaêm lo der. Gal nu ricy der ornu rgyiib ru yaar, ni bdiib der de coz cyi nu ricy ru, de ru mbecy cyi. ¡Bicy der nu gyacaacy lardoor, de ru mbecy nu ricy cyup ic! 9 ¡Bicy shni der! ¡Bzu der rishsulagy! ¡Biiñ der! ¡Lugaar nu gyigy der, orzeê biiñ der! ¡Lugaar nu yet lagy der, bicy shni der! 10 Bicy gyidz der ub ru lo Ãgyoozh, gun orzeê gyicy mi nu gyac der mbecy nu gya zu. 11 Der bicy na, tub ga la der walagy ñi nu nii zi der ni losaêr. Nunu walagy ñi nu nii der nu yuê falt niy. Yu nu rnii zi ni bicy o yu nu rnii nu yuê falt ni bicy, orzeê yu zeê rnii ziy ni leey ni Ãgyoozh, nunu rniiy nu yuê falt niñ, gun wacsuub gyidag yu niñ. Benu rniiy nu yuê falt ni leey, orzeê yu zeê walab tub yu nu rzuub gyidag niñ, sinu tub yu nu rnii nu yuê falt niñ. 12 Tees tub zi Ãgyoozh briic mi leey, nunu tub zi lam gac niim nu yuê falt ni den. Tub zi lam gac co mbañ mi, nunu tub zi lam gac nit lom. Zeê de ru, ¿cyu guc ru par nu niir nu yuê falt ni losaêr? 13 Na bzuub gyidag der ne̱, de ru mbecy nu rnii: “Dzi na o ina chan ca na gyedz. Zeê cyiiñ den tub ñaên. Gyicy den dalje̱z. Gyicy den gan tiñ”, rnii der. 14 Tees wagad lagy der la coz zac ru ina. De ru na der gal nu na za nu taê baa. Nañ tub miiñ ziêl gruu zac ñi nunu nañ tub miiñaê ziêl bi mniit ñi. 15 Coz nu rlagy ñi nu nii der, orzeê i niir: “Benu Shuaan den rlagy mi, orzeê cui mbañ na. Orzeê gyicy na nii o nde”, nii der. 16 Tees na ricy der gyel leê nir, nunu rnii der nu dzi coz ily ricy ru. Ndeê rila a̱ê nap nu ni mod rnii der. 17 Mbecy nu rad lagy nu gyicy coz nap, zeê wagyicy yu, yu zeê ricy yu cyi.