San Judas 1

1 Ya̱ Judas, bicya̱ Santiag, naca̱ tub mbecy nu ricy coz nu rlagy Jesucrisht. Orzeê ya̱ zeeda̱ gyicy ii lo de ru mbecy nu dzi razañ lagy Ãgyoozh, Uz den. Ãgyoozh blosum de ru nu gac nim. Nunu Jesucrisht rñam der nu cueê shiñ zac ru. 2 Ãgyoozh gyicy mi nu sheñ coz nap zac der nu nac nu rashni lagy mi der, nunu gyicy mi nu cheti ri añ ni der, nunu rcam de ru. 3 De ru, bicya̱ nu dzi rca̱, ya̱ dzi rlagya̱ nu zeeda̱ tub gyicy lo der nu rne̱e̱ lac yaruu nu gruu mbañ den: tant de ru, gal nu ya̱. Tees na rad lagya̱ nu ricy zir ñi presis nu zeeda̱ gyicy ii lo der par nu nishba̱a̱ lo der nu gzu fert der nu nac de riidz ni Crisht nu bzeeñ Ãgyoozh yaa mbecy par tub tir ziêl. 4 Gun yuê la be mbecy nu dzi bi rac tiem ca lo cuen nu nit lo dey. Orzeê de yu zeê dze ga guê dey lat de ru nu nac nu bguu dey der. Nac dey mbecy nu za contr ni Ãgyoozh. Par nu nac nu Ãgyoozh ricy mi faboor nu nap ricy num den, orzeê ndeê nu rzii dey nu gac gyicy yu mas coz toê lo, nunu se la la gac, rzii dey. Nunu rzu chu dey Shuaan den Jesucrisht, biñ nu riib ic de ub na. 5 Mas de ru bi rad lagy der, tees rlagya̱ nu gyezaê lagy der nu Ãgyoozh bloom de mbecy nim Egipto nu ya num dey par Israeel. Na ornu bi bloom dey, orzeê mnit lom de yu nu wangyicy cup consuel lom. 6 Nunu de anc nu wancuez lo riiñ nu briic Ãgyoozh, sinu bruu dey seêy, orzeê Ãgyoozh bri noow mi dey tub lugaar zeê nu cow, tub lugaar zeê nu rila wala dey. Orzeê zeê cuez dey par ornu shuub dzi nu gri bee Ãgyoozh ni dela mbecy. 7 Nunu niê ziêl gzac de anc zeê gal nu bzac de mbecy Sodoma nu Gomorra, cyup gyedz nu ri tublaazh ga la. De yu zeê pshet ic dey nu ricy yu de cyi bag nu a̱ê yad ñi nu gyicy dey nu losaêy, nunu pshet ic dey nu gyicy yu cyi nu zañ contr ni mod nu psaê lagy Ãgyoozh nu gyicy yu. Ndeê nu bzac zi dey nu gyi nu rila wayu. Ndeê tub mod nu ryoo Ãgyoozh rishlo dela mbecy, gun orzeê gyicy cuidad dey. 8 Tees niê ziêl mod ricy de mbecy rguu nu guê dze ga lat der zeê. Pcaal rniiñ lo dey nu lac mod gyicy yu. Orzeê ricy dey cyi nu ricy ñi nu rabag cuerp ni dey. Nunu rzuub yaa dey de riidz nu rnii Shuaan den Jesuuz nu gyicy na. Nunu rab zi dey de anc fert. 9 Mas Miguel, tub anc zub lo, ornu gush losaêy nuras nu riidz gyiê cuerp ni Moisees, orzeê wangash lagy yu niiy nu riidz a̱ê nap nu gab yu nuras, sinu mniiy: “Shuaan de̱ niim nu yuê falt nir”, nay rab yu nuras. 10 Tees de mbecy zeê rnii zi dey ni de coz nu wagad lagy yu. Ricy dey gal nu ricy bañcyug nu sac shcab ni. La ziêl na coz nu rnii too dey ricy yu. Ndeê nu nit lo dey. 11 ¡Dzi ga cuaa de mbecy zeê! Gun za ca dey ich coz nu bicy Caiing. Orzeê nu nac tiñ gudza dey gal nu gudza Balaam. Nunu gat dey gal nu gut Coré ornu guay contr ni Ãgyoozh. 12 Ornu tublaazh la row der gyit nu nac nu rca der losaêr, orzeê de yu zeê na dey gal nu na tub coz a̱ê nap nu ri lat der. Lat zeê row dey nunu roêy. Nap la zu lagy dey rded yu. Nunu waca bee ti rca lagy dey lo reñaê mbecy. Na dey gal nu na yu nu rña shily, tees laab ub ziêl dey ricy cuidad yu ub yu. Na dey gal nu na za nu taê baa nu a̱ê ricy cup nis. Za nu dza la biñ. Na dey gal nu na yag nu wacuic uugy tiem ni. Na dey gal nu na yag nu gut la par nu bruu lyuñ gal lyu lañ. 13 Na dey gal nu na de nguuly ni nis nu fert rded lo nisyudoo. Orzeê de coz toê lo nu ricy dey, ndeê nañ gal nu na bdziñ nu rzeeñ de nguuly ruê nisyudoo. Na dey gal nu na bel baa nu gudza ma nez nu rded ma. Ndeê nu Ãgyoozh mniim nu chesa dey zeê nu blaazhaê zir cow tub la. 14 Niê ziêl Enoc, yu nu bruu zac gashtal ornu bzaê gagy nac nez Adaang, yu zeê niê ziêl mniiy por cuen ni Ãgyoozh. Orzeê bzat yu de mbecy zeê. Orzeê nay: “Ya̱ bzaaca̱ nu bi yad Shuaan den. Bi yad num be miily la de anc nim. 15 Orzeê gri beem ni dela mbecy. Nunu niim lo dela mbecy nu shiñ ricy nu cha dey lo cashtig nu nac dela coz a̱ê nap nu bicy yu gyiê nu nac dey mbecy a̱ê nap. Nunu cha dey lo cashtig nu nac de riidz a̱ê nap nu mnii dey, como nac dey mbecy cyi. Mnii dey de riidz nu gua contr ni Ãgyoozh”, nay. 16 De mbecy zeê nac dey mbecy nu rnid ruê lo Ãgyoozh. Nunu nac dey mbecy nu rnii zi nim. Tub lo ziêl nu ryub dey mod nu cha ca dey ich gusht ni ub yu. Nunu driib zily dey ub yu. Nunu driib zily yu losaêy par nu gad mod nu gyicy losaêy gal mod nu rlagy ub yu. 17 Tees na de ru bicy na nu dzi rca̱, ca ga ic der de riidz nu mnii de aposht ni Shuaan den Jesucrisht. 18 De yu zeê mnii dey: “Ornu bi yad lazh tiem, orzeê gruu zac mbecy rgubdzaa. Orzeê de yu zeê zaab gyicy la dey de coz nu rlagy ub ziêl yu”, na de aposht. 19 De yu zeê gyicy yu nu gyacyup nac mbecy. Gyicy dey de coz nu rlagy ub ziêl yu. Nunu a̱ê ricy cup dey Espiriit Yon ni Ãgyoozh. 20 Tees de ru, bicy na nu dzi rca̱, bzu fert der nu consuel nu ricy cup ru, como ndeê consuel nu bruu lo Ãgyoozh. Mnii nu der Ãgyoozh dub gal mod nu rnii Espiriit Yon nim nañ lardoo der. 21 Pcyiiñ der gyishlombecy ii gal mod nu rlagy Ãgyoozh, gun orzeê nap gyicy num de ru nu nac nu rcam der. Blez der ornu shuub dzi nu Shuaan den Jesucrisht gyicy mi nu cui mbañ den tub la. Ni gyicy mi par nu rashni lagy mi de ub na. 22 Gushni lagy der de mbecy nu ricy cyup ic. 23 Gac gyicy der nu gruu mbañ la be de yu zeê. Ndeê nañ gal nu na nu cor dey lo lyush gyi. Nunu gushni gaê lagy der deê zir dey. Nomaas nu bicy cuidad der ub ru nu nac de yu zeê. Nunu güiñ lagy der lo de cyi nu ricy dey. 24 Orzeê Ãgyoozh, biñ nu tub zi la zu, biñ nu co mbañ de ub na, mi zeê cyiiñ mi nu ñam de ru, gun orzeê cueê gyet lag der lo cyi. Nunu cyiiñ mi nu guêm de ru zeê nu rcyiiñ mi nu gyel lily nim. Nunu lat zeê gac der mbecy nu sac falt ni. Nunu tonaê la gyet lagy der. Orzeê mi zeê nac mi biñ lily. Nac mi biñ nu gya zir zu. Gac gyicy mi dela coz. Nunu gyub ic mi dela mbecy. Gyabic den gyel mbecy nim nu nac Shuaan den Jesucrisht nese gulas, nu na la, gal nu tub la. ¡Laab ni gac ñii!