Apocalipsis 4

1 Na despuees ni de nu ndeê, orzeê bgüi̱i̱. Orzeê bzaaca̱ tub roê gashtal gyibaa. Naal ñi. Nunu güeña̱ nu zaab tiê mbecy, laab yu nu mnii nu ya̱ loga. Tiê nu rnii zeê zaab tiêñ gal nu zaab tiê tub trompet. Orzeê nay: âGup gashtal ii. Orzeê lyu̱u̱ lor dela coz nu gac despuees ni de nu ndeê ânay. 2 Laab or la zeê, orzeê gutib ic Espiriit Yon ni Ãgyoozh ya̱. Orzeê bzaaca̱ tub yashily zeê nu riib ic mbecy gashtal gyibaa la. Zeê zub tub mbecy loñ. 3 Orzeê mbecy nu zub lo yashily zeê rabeey gal nu rabee tub gyitaê nu ryaal gyi lo o gal nu rabee tub gyitaê coloor gyee reñ. Nunu dub yub la zeê nu zu yashily zeê zu tub shelcuit nu na gal nu na tub gyitaê caê nu ryaal gyi lo. 4 Orzeê laab zeê nu zu yashily zeê dub yub la par loñ, zu gaê gal zu tap yashily zeê nu riib icaê mbecy. Zeê lo gal zu tap yashily zeê, zub gal zu tap yu bel. Orzeê dela dey zuy negy cacy iily la, nunu ri coron or too dey. 5 Zeê nu nguaa de yashily zeê rzu gyi ni guzii. Orzeê zaab tiê guzii, nunu pang la yet ñi. Orzeê par lo yashily zeê zu gagy candiil rca gyi loñ. Orzeê gagy candiil zeê, ndeê muesht ni Espiriit Yon ni Ãgyoozh, biñ nu nash numbr gagy. 6 Nunu laabaê par lo yashily zeê ri tub coz nu na gal nu na tub nac nis ily, nu rabee gal nu rabee guan nu rdugyi yaa lo. Orzeê laab gazel zeê nu zu yashily zeê, dub yub la cuit ñi zu tap mbecy mbañ nu psaê lagy Ãgyoozh. De yu zeê taê urlo dey dutuub la cuerp niy. Gal nu taêñ par lo dey niê ziêl taêñ par ich yu. 7 Orzeê yu loga la nay gal nu na tub biidz. Zeê yu cyup nay gal nu na tor. Zeê yu chon rabee loy gal nu rabee lo mbecy. Zeê yu tap nay gal nu na tub psi ornu rded ma lo bi. 8 Lo tap de mbecy zeê tub ga la dey zub shuup ga loweêy. Nunu dutuub la cuerp ni dey taê urloy. Dzi rel la wacheca dey nu rniiy: Ãgyoozh, biñ nu nac Shuaan de̱, biñ nu gac gyicy dela coz, mi zeê tonaê la yon mi. Mi zeê biñ nu nil nac gulas, nunu biñ nu nac na, nunu laab mi biñ nu cyid par lo, rnii dey. 9 Orzeê de tap anc zeê ryabic dey gyel mbecy ni Ãgyoozh, biñ nu zub lo yashily, nunu zum tub la. Orzeê briib zily dey mi, nunu briic dey gras nim. 10 Na laab mnii la dey ndeê, orzeê de gal zu tap yu bel zeê wes saa tiily la dey lo biñ nu zub lo yashily zeê. Nunu pca dey mi zeê, biñ nu zu tub la. Orzeê briib dey coron niy zeê nu zu yashily nu riib ic mi. Orzeê na dey: 11 Shuaan de̱, Ãgyoozh ne̱ de̱, ru yad ñi nir nu gyabic de̱ gyel mbecy nir, nunu yad ñi nir nu ca lagy de̱ lor, nunu yad ñi nir nu gac gyicy ru dela coz, gun dela coz yuêñ par nu ndeê coz nu ru rlagy ru. Nunu par nu nac nu ndeê coz nu ru rlagy ru, ndeê nu psaê lagy ru ñii, na dey.