Romanos 15

1 Orzeê de ub na, mbecy nu rad lagy nap de coz ni Crisht, rlagy ñi nu locyuub den losaên ornu wagad lagy nap dey. Walagy ñi gyicy den coz nu rlagy ub ziêl na, 2 sinu tub ga la den rlagy ñi gyicy na coz nu gyet lagy losaên. Rlagy ñi gyicy den coz nu nap par de yu zeê, gun orzeê gyafert dey nu nac de coz ni Crisht. 3 Gun mas Crisht wangyicy mi coz nu rlagy ub ziêl mi, sinu bicy mi nu byuê niñ gal nu rniiñ lat de riidz ni Ãgyoozh zeê nu rniiñ: “De riidz nu mnii zi mbecy nir, ndeê bgoñ to̱o̱ ya̱, na Mesías rab mi Ãgyoozh”, rniiñ. 4 Tees dela riidz nu byeeñ gulas lat de riidz ni Ãgyoozh, byeeñ ñi par nu lyuuñ ni den, gun orzeê riidz zeê gyicy ñi nu gagye den, nunu cuic ñi baloor ni den. Nunu nu nac ndeê grish lo den nu ruu nap na. 5 Nunu Ãgyoozh, biñ nu gyicy nu gagyen, biñ nu rbic baloor ni den, mi zeê locyuub mi de ru nu gyicy der tub ziêl shcab nu losaêr. Locyuub mi der nu gyicy der gal nu bicy Jesucrisht. 6 Gun orzeê nu tub ziêl shcab, nunu tub ziêl tiem gyabic den gyel mbecy ni Ãgyoozh, Uz Shuaan den Jesucrisht. 7 Orzeê pshet ic der nu chuê mbecy lat der gal nu Jesucrisht pshet ic mi nu chuê den lom. Ni bicy mi par nu gabe nu Ãgyoozh dzi lily nam. 8 Gun riidz nu rne̱e̱, ndeê nu Crisht byac mi tub biñ nu rzu bich nu nac de mbecy Israeel, gun orzeê zaê lom dela riidz nu mniim lo de gyitoo bel ni dey nu segur la gyicy mi. Orzeê rabee nu Ãgyoozh ricy yac mi ni de riidz nu rniim. 9 Niê ziêl biid mi, gun orzeê de mbecy nu walab mbecy Israeel gyabic dey gyel mbecy nim nu nac nu gushni lagy mi dey, gal nu rnii tub nac riidz nim: Ndeê nu ya̱ gyabica̱ gyel mbecy ni Ãgyoozh lat de mbecy nu walab mbecy Israeel, nunu ya̱ dula̱ lor, rniiñ. 10 Tub nacaê riidz ni Ãgyoozh rniiñ: De ru mbecy nu walab mbecy Israeel, gucyit lagy der nu de mbecy ni Ãgyoozh, rniiñ. 11 Tub nacaê riidz ni Ãgyoozh rniiñ: De ru mbecy nu walab mbecy Israeel, byabic der gyel mbecy ni Ãgyoozh. Dela de ru mbecy mnii der nu dzi zily nac mi, rniiñ. 12 Niê lat de riidz nu bzeeñ Isaías rniiñ: Cyid tub mbecy nez Isaí. Mi zeê gruu zac mi par nu gyub ic mi de mbecy nu walab mbecy Israeel. Orzeê dela mbecy zeê cyish lo dey lom, rniiñ. 13 Ãgyoozh, biñ nu drish lo den lo, gyicy mi nu gacyit lagy der, nunu cuic mi gyel ri zu nañ lardoo der nu nac nu ricy cup der consuel lom, gun orzeê Espiriit Yon nim gyicy mi nu fert zir cyish lo der lom. 14 Der bicy na, ya̱ rad lagya̱ nu de ru ricy zaê la der de coz nap, nunu rad lagya̱ nu nap rad lagy der de coz ni Crisht, nunu rad lagya̱ nu cyiiñ der nu lyuur ni de losaêr. 15 Tees yuê la be riidz nu pca̱a̱ lo gyicy ii nu fert zañ, gun orzeê cueê nit lagy der ñii. Ni bicya̱ nu nac nu Ãgyoozh nap bicy num ya̱ ornu bzum ya̱ riiñ ii. 16 Zeê riiñ zeê, ndeê nu ricya̱ de riiñ ni Jesucrisht lat de mbecy nu walab mbecy Israeel. Ndeê nu ya̱ na gal na tub uz nu zu riiñ lugaar nu driib zily mbecy Israeel Ãgyoozh. Orzeê rshaala̱ de riidz nu sac ni Crisht lo de mbecy nu walab mbecy Israeel, gun orzeê gyac dey gal nu na tub gun nu rbic dey lo Ãgyoozh. Na dey gal nu na tub gun nu “O” niim gash mi, gal na tub gun nu bloo chu Espiriit Yon nu gac ni Ãgyoozh. 17 Como nac du̱ Jesucrisht, orzeê yet lagya̱ nu nac de riiñ ni Ãgyoozh nu ricya̱. 18 Gun ya̱ ricy cuidada̱ de riidz nu rne̱e̱. Tub lo ziêl coz nu bicy Crisht nu nac ya̱, ndeê rzata̱ lo de ru. Bicy mi nu rzuub gyidag de mbecy nu walab mbecy Israeel ni Ãgyoozh nu nac de riidz nu mne̱e̱, nunu nu nac de coz nu bicya̱. 19 Bzuub gyidag dey nim nu nac nu bzaac dey de nusuriidz nu bicy mi. De nusuriidz zeê, ndeê par nu gad lagy dey nu laab mi, nunu par nu cha nu ic dey. Nunu bzuub gyidag dey nim ornu bzaac dey de coz ily nu bicy Espiriit Yon nim. Orzeê nese Jerusaleeng, gashtal dela lo yu ni Iliria ya̱ pshaala̱ dela riidz nu sac ni Crisht. 20 Coz nu rlagya̱, ndeê nu shaala̱ riidz nim de lugaar nu nigul gyeñ mbecy de riidz zeê, gun orzeê cueê cha̱ nu gyicya̱ riiñ ni Crisht zeê nu bi bzuub reñaê mbecy gyiê riiñ nim. 21 Sinu gal nu rnii riidz nim, ni mod rlagya̱: De yu nu nigul dunii la riidz nim lo, orzeê de yu zeê gad lagy dey. De yu nu nigul gyeñ la riidz nim, de yu zeê gyet lagy dey cuen, rniiñ. 22 Nu nac ndeê, orzeê wangad la mod nu nyap güi̱i̱ der mas zañ tir ngulagya̱ nu nyap güi̱i̱ der. 23 Tees na bi byaê lo riiñ nu ricya̱ lugaar ii. Nunu nil bi rac ñaên rlagya̱ yap güi̱i̱ der. 24 Ndeê nu drish lo̱ nu gac yap güi̱i̱ der nez nu deda̱ nu cha̱ par España. Na ornu bi bdo ñuun riidz, nunu bi bicy ñuun gusht, orzeê ya̱ drish lo̱ nu locyuub der ya̱ nu de coz nu galagy ñi ne̱ nez nu cha̱. 25 Tees na gya̱ tub riiñ Jerusaleeng. Gya̱ du̱ tub gun ni de mbecy ni Crisht nu yuê zeê. 26 Gun de mbecy ni Crisht nu yuê lo yu ni Macedonia, gal nu de mbecy ni Crisht nu yuê lo yu ni Acaya, de yu zeê mnii too dey nu zeed yu tub gun par nu locyuub dey de mbecy zi nu yuê lat de mbecy ni Crisht Jerusaleeng. 27 Mnii too dey nu nap benu ni gyicy yu, nunu laab ndeê coz nu yad ñi nu gyicy dey, gun de mbecy Israeel blocyuub dey de mbecy nu walab mbecy Israeel nu nac de coz ni Crisht. Orzeê de mbecy nu walab mbecy Israeel rlagy ñi nu locyuub dey de mbecy Israeel nu de coz nu galagy ñi ni dey. 28 Na ornu bi zaê lo̱ê riiñ zeê, nunu gyabica̱ de gun zeê yaa dey, orzeê cha̱ España. Nez deda̱, orzeê zaab lo̱ der. 29 Ornu yapa̱, orzeê rad lagya̱ nu Ãgyoozh ricy zaê lam coz nap num den nu nac Crisht. 30 Der bicy na, ya̱ rnishba̱a̱ lo der nu nac Shuaan den Jesucrisht, nunu rnishba̱a̱ lo der nu nac Espiriit Yon ni Ãgyoozh biñ nu rlocyuub den nu caan losaên. Rnishba̱a̱ lo der nu co lo der tublaazh nu ya̱ ornu cyiñ der lo Ãgyoozh ne̱. 31 Cyiñ der lo Ãgyoozh nu cueê zaan mi nu shiñ gyicy nu de mbecy Judea ya̱, de yu nu wagyicy cup consuel lo Crisht. Nunu cyiñ der lo Ãgyoozh nu de mbecy ni Crisht nu yuê Jerusaleeng nu gyet lagy dey riiñ nu cha̱ loy. 32 Gun orzeê benu Ãgyoozh rlagy mi, orzeê tonaê la zu cyit lagya̱ ornu yapa̱ lo der, nunu gyag ñuu lagya̱ lat nu cyiiña̱ lat der. 33 Ãgyoozh, biñ nu ricy nu zu cyit lagy na, mi zeê nac num der. Laab ni gac ñii.