Romanos 9

1 Na rne̱e̱ lo der tub coz rishli: ya̱ wagu̱u̱ de ru, como naca̱ mbecy ni Crisht. Espiriit Yon ni Ãgyoozh, mi zeê riib ic mi nañ lardo̱o̱, nunu ya̱ rad lagya̱ nañ lardo̱o̱ nu wagu̱u̱. 2 Ya̱ tonaê la ricy shni. Dub laa tiem rac nañ lardo̱o̱ nu nac de losa̱ê. 3 Gun ya̱ rsaê lagya̱ nu nap zir benu zaa lagy Ãgyoozh ne̱, nunu nap zir benu glaê losa̱ê nu Crisht, benu ndeê gyicy ñi nu locyuub Ãgyoozh de bicya̱, de yu nu nac losa̱ê. 4 De yu zeê nez mbecy Israeel. Ãgyoozh bicy mi dey par iêñ mi. Nunu nash dey gyel lily nim. De yu zeê bicy mi trat num dey. Yaa de yu zeê, bzeeñ mi leey ni Moisees. Lo de yu zeê, mniim lac mod riib zily mbecy mi. Nunu mniim nu segur la zañ lo coz nap gyicy num dey. 5 De yu zeê nac dey nez de yu lily nu guê gulas. Crisht gush mi nez dey ornu byac mi mbecy gyishlombecy ii, nunu mi zeê Ãgyoozh, biñ nu riib ic dela coz. Gyabic den gyel mbecy nim par tub la. Laab ni gac ñii. 6 Tees Ãgyoozh waded la ricy yac mi de riidz nu mniim nu segur la gyicy mi. Gun walab dela mbecy Israeel nac yu mbecy Israeel nu rishli. 7 Nunu walab dela mbecy nez Abraham nac yu iêñ Abraham nu rishli, gun Ãgyoozh mniim lo Abraham: “De iêñ Isaac, de yu zeê nez ru”, nam. Orzeê Ãgyoozh wangyicy mi deê zir iêñ Abraham par nez yu. 8 Ndeê yaruuñ nu ni tub la mbecy a̱ê nac yu iêñ Ãgyoozh nu nac nez ziêl yu, sinu de yu nu byac iêñ Ãgyoozh nu nac de riidz nu mniim nu segur la gyicy mi, dey yu zeê ziêl gyicy mi dey par iêñ mi nu rishli. 9 Gun ni mod za riidz nu mnii Ãgyoozh lo Abraham. Orzeê nam: “Ornu shuub tiem, ya̱ yapa̱, gun orzeê gyicya̱ nu gaal Sara tub mdoo gyeey”, nam rab mi Abraham. 10 Nunu walab ndeê ziêl bicy mi, gun zu cyup iêñ Rebeca tees tub ziêl uz dey. Uz de yu zeê, ndeê gyitoo bel ni den Isaac. 11 Tees anzir nu gal dey, Ãgyoozh mniim lo Rebeca: “Yu miê, yu zeê gyicy yu mandaar yu gush”, nam. Ni mniim mas nigul gal dey, nunu nigul gyicy dey ni tub la coz: ni coz nap, ni coz a̱ê nap. Niê riidz ii gyap ñi tuubaê riidz ni Ãgyoozh, ornu nam: “Ya̱ rca̱ Jacob, tees rzi lagya̱ lo Esaú”, nam. Orzeê Ãgyoozh gac cuim ca na mbecy nu rlagy mi par nu gac nim. Nunu ornu ni ricy mi, orzeê ndeê walab nu nac nu la na tub coz nu ricy dey. 14 Beni, dzi ga gruu su tub mbecy nu niiy nu Ãgyoozh wagyicy mi de coz nu seêñ. ¡Rila walab ni! 15 Gun Ãgyoozh mniim lo Moisees: “Ya̱ nap gyicy du̱ ca ziêl na yu nu rlagya̱, nunu gashni gaê lagya̱ ca ziêl na mbecy nu rlagya̱”, nam. 16 Orzeê benu Ãgyoozh nap ricy num tub mbecy, ndeê walab nu nac nu ni rlagy mbecy zeê, nunu ni walab nu nac nu dzi rboo loy, sinu nu nac nu rashni lagy mi yu. 17 Gun riidz ni Ãgyoozh rzat ñi rey Faraón. Orzeê rniiñ: “Ya̱ bicya̱ nu nac ru rey ni de mbecy Egipto, gun orzeê gabe nu ya̱ gac gyicya̱ de coz ily nu nac de coz ily nu gyicy du̱ ru, gun orzeê riib zily dela mbecy nu yuê gyishlombecy ya̱”, nam. 18 Orzeê Ãgyoozh rashni lagy mi ca na mbecy nu rlagy mi. Nunu niê ziêl gac gyicy mi nu gyacyigy lardoo ca na mbecy nu galagy mi. 19 Cyup ridz ruu su tub mbecy lat der nu niiy: “Benu ni, ¿lagu griib Ãgyoozh cyi ic mbecy?” niiy. “Mi zeê se cyu la gac gyicy gan mi, nunu se cyu la gac gyicy de coz benu ub mi walagy mi”, niiy. 20 ¡A̱ mbecy! ¿Cyu guc ru par nu niir lo Ãgyoozh lac mod rlagy ñi? Ru nar gal nu na tub gyis. ¿A gac nii tub gyis lo mbecy nu bzaañ: “¿Lagu ni mod bzaar ya̱?” niiñ? 21 Tees mbecy nu rzaañ gac gyicy yu lac ziêl mod nu galagy yu nu gyicy nuy biñ. Gac zaay cyup gyis laab nu tub ziêl biñ. Zaay tub gyis cyit na par nu gabish riiñ lañ par tub gasht. Zeê tuubaêñ zaay ñi par nu cyiiñ ñi la ziêl tiem nu galagy yu. 22 Gal nu ricy mbecy nu rzaa gyis, niê ziêl gac gyicy Ãgyoozh num mbecy. Rlagy mi cuic mi nu gad lagy den la na cashtig nim, gal nu de coz ily nu gac gyicy mi nu nac mod nu ricy num tub nac mbecy. Tonaê la bicy cup mi pase̱z ni dey, tees de yu zeê bicy dey nu guzi lagy mi loy, nunu yad ñi ni dey nu nit loy. 23 Tees bicy cup mi pase̱z ni dey, gun orzeê gad lagy tub nacaê de ub na nu dzi coz ily gyel lily nim. Orzeê nac naa mbecy nu gushni lagy mi. Nunu nese gulas bi bzu lily mi den par nu gzac na lo gyel lily nim. 24 Gun de ub na nac naa mbecy nu bzum nu gac nim. Nunu yuê mbecy lat na nu nac yu mbecy Israeel. Zeê yuê gaê dey nu a̱ê nac yu mbecy Israeel. 25 Ni mod za tub riidz nim lat de riidz nu bzeeñ Oseas. Zeê rniiñ: Ãgyoozh nam: “De mbecy nu walab mbecy ne̱, de yu zeê ya̱ ne̱e̱ nu nac dey mbecy ne̱. Nunu de mbecy nu wanca̱, ya̱ ne̱e̱ lo dey nu ya̱ rca̱ dey, ne̱e̱”, nam. 26 Nunu laab lugaar zeê nu mne̱e̱, zeê rniiñ: “De ru walab mbecy ne̱”, rniiñ, orzeê lugaar zeê gnii dey: “De ru iêñ Ãgyoozh mbañ”, gnii dey, na Ãgyoozh, rniiñ. 27 Niê lat de riidz nu bzeeñ Isaías rzat ñi de mbecy Israeel. Zeê rniiñ: “Mas tonaê la mbecy zigy de mbecy Israeel, mas gal nu sheñ yu uzh nu nguaa ruê nisyudoo ni zigy dey, tees ñuu zi ziêl dey gruu mbañ yu. 28 Gun Ãgyoozh dzach zaê lom de coz nu mniim nu gac gyishlombecy”, rniiñ. 29 Nii nañ gal nu na nu mnii Isaías anzir, ornu nay: Bicy na nu Ãgyoozh, biñ nu rac ricy dela coz, cueê nzeeñ mi la be mbecy nez Israeel, orzeê ñgyac den gal nu naê de mbecy nu guê gyedz Sodoma, nu de mbecy nu guê gyedz Gomorra, na Isaías. 30 Orzeê ¿lac ñuu niin? De mbecy nu walab mbecy Israeel, mas wanyub dey mod par nu gyanap dey par lo Ãgyoozh, tees na byanap dey lom nu nac nu ricy cup dey consuel lom. 31 Zeê de mbecy Israeel byub dey tub mod nu gyanap yu lom nu nac nu ricy yac dey ni leey, tees wangyicy dey gan. 32 Wangyanap dey lom, gun wanyub dey mod nu rlagy mi. Mod zeê, ndeê nu gyicy cup dey consuel lom. Tees byub dey tuubaê mod nu gyanap yu lom. Rlagy dey gyanap yu lom nu nac de coz nu bicy de ub yu. Jesucrisht nam gal na tub gyitaê, nunu de mbecy Israeel blagy gyiê dey too gyitaê zeê. 33 Ni mod za tub riidz ni Ãgyoozh ornu nam: Gyedz Sión zeê risha̱ tub gyitaê nu glagy gyiê mbecy, tub gyitaê nu gyicy ñi nu gyesaa dey. Yu nu gyicy cup consuel lo biñ nu nac gyitaê zeê, rila washiêñ yu baloor, gun walab nu leew bicy cup yu consuel lom, rniiñ.