Tito 2

1 Orzeê dub laa tiem lyuur ni de mbecy nu gyicy yu dub gal mod nu rnii de riidz nu sac falt ni Ãgyoozh, de riidz nu rlyuu mbecy nu nac de coz ni Crisht. 2 Orzeê de yu gush rlagy ñi nu gac dey mbecy nu ca lagy deê zir mbecy lo. Rlagy ñi nu gac dey mbecy nu nap na shcab ni. Rlagy ñi nu nap gzu dey shcab nu nac de coz ni Crisht. Rlagy ñi nu nu rishli gaal ca dey de losaêy. Rlagy ñi nu gagye dey ornu rzac ziy. 3 Niê ziêl mod par de biñ gush. Rlagy ñi nu gyicy dem gal mod nu yad ñi nu gyicy de biñ mñaa nu rca lagy lo Ãgyoozh. Cueê gac dem biñ mñaa nu ro rishcuen. Ni cueê gzugy dem. Rlagy ñi lyuu dem ni de fiñ feñ nu nac de mod nap nu ricy de ub mi. 4 Nunu lyuu gaêm ni de fiñ feñ nu ca deñ ñgyeeñ gal nu de iêñ ñi. 5 Lyuu gaêm nu nap gyub ic deñ ub ñi, nunu gac deñ mbecy nu sac falt ni. Niê ziêl lyuum ni deñ nu gyicy paa deñ nu de riiñ nu yuê nañ yuê. Lyuum ni deñ nu gac ñii mbecy gugy na. Lyuum ni deñ nu “O” niiñ ni ñgyeeñ. Gun benu ni gyicy deñ, orzeê wad mod nu nii zi ni tub la mbecy ni de riidz ni Ãgyoozh. 6 Na niê ziêl byoo rishlo de yu feñ nu nap gyicy yu mandaar ub yu. 7 Nunu dub laa tiem ru lyuur ni dey nu gyicy dey dela mod nap. Lyuur ni dey nu nac mod nu ricy ru. Ornu lyuur ni dey, orzeê nu tub ziêl lardoor bicy ñi. Cueê nu cyup lardoor gyicy ruñ. Nunu cueê niir riidz shiê lo dey, 8 sinu niir nu mod nu raso̱o̱, gun orzeê ni tub la mbecy waniiy nu ru walab riidz nap rniir, gun orzeê cyu ziêl mbecy nu za contr ni den gat lo dey par nu nac nu wad mod nu nii dey riidz a̱ê nap nu nac de ub na. 9 Bduê riiñ yaa de yu nu nac moz nu gzuub gyidag dey ni patro̱o̱ niy nu nac dela mandaar nu ricy yu loy. Gyicy yu tub mod nu gyet lagy patro̱o̱ niy. Nunu cueê tush cyay riidz loy. 10 Nunu cueê gyicy gubaan yu la coz niy, sinu rlagy ñi nu gyicy yu tub mod nu gabe nu tonaê la nac yu mbecy nap, gun orzeê dela mbecy zac dey nu dzi cyit na de riidz ni Ãgyoozh, biñ nu bloo mbañ de ub na. Laab de ndeê de riidz nu rlyuu den. 11 Tees Ãgyoozh bi briic mi nu gad lagy den la na faboor nu gyicy num de mbecy. Nu nac faboor zeê gad mod nu gruu mbañ dela mbecy. 12 De riidz ni faboor ni Ãgyoozh zeê rlyuuñ ni den nu rlagy ñi nu laa yaa den de coz a̱ê nap, gal nu de gusht a̱ê nap nu yuê gyishlombecy ii. Orzeê lat nu rcyiiñ den gyishlombecy ii rlagy ñi nu nap gyicy den mandaar ub na. Nunu rlagy ñi nu gyicy den de coz nu seêñ. Nunu rlagy ñi nu zu den shcab nu nac coz ni Ãgyoozh. 13 Orzeê lat nu rcyiiñ den gyishlombecy ii, grish lo den nu shuub tiem nu gyuê niñ gal nu mnii Ãgyoozh. Ni gac ñii ornu cyid Jesucrisht tuubaê tir nu gyel lily nim. Mi zeê nac mi Ãgyoozh ni den gal nu biñ nu co mbañ den. 14 Mi zeê pshet ic mi gut mi par nu briish mi cyi den, gun orzeê bicy mi nu bruu chu den lo de cyi nu ricy na. Nunu bicy mi nu byacaacy nap lan lo Ãgyoozh, gun orzeê gac na mbecy nim. Gac na mbecy nu ric la añ ni lo de coz nap. 15 De nu nii rlagy ñi nu lyuur ni mbecy. Cuic ru baloor ni dey. Nunu shuu nur dey gal nu ricy mbecy nu ricy cup rishbeey. Cueê shet ic ru nu nii mbecy nu ru wacyiiñ ru.