De Visitatione Nepotuli Sui (Latin)
The Latin text of De Visitatione Nepotuli Sui. This page has 1 section group and about 521 words. Each row carries its standard reference.
sancte deus, licet ipsa huius uel guttula roris
a te tam sterili data sit uel praestita cordi..
non his obsequiis tam largum flumen egebat,
ut tenuis leuibus foliis qui decidit humor
tam profluo augmentum faceret dum labitur amni,
cum magis ad ramos de ripis surgeret humor,
dum uitreus fundit nebularum stamina gurges
inde haec gutta meas tetigit tam prodiga fauces,
tangeret ut murmur solidi crystalla fluenti.
quantum haec sola mihi ferret patientia donum,
ut nullam incideret felix audacia culpam:
nunc uero his etiam duplicatur gratia signis,
ut nullo te fine canam, uenerande sacerdos.
non finitur opus quo susciter. addita crescunt,
tune meas uisis lacrimas? tu fletibus illis
fers miseratus opem? te uitae altissimus auctor
exorante grauis cohibet lamenta senectae?
ipsa salus uitam reuehit. deiecerat aegrum
et paene exanimem morbi uis tanta nepotem
coniunctamque eidem nubendi lege puellam,
ut uix iam tenui spirarent corpora flatu,
subtracto pulsu filo languente latentes.
me quoque submotum pietas arcebat ab omni
officio. exosam uitabant lumina lucem,
dum poena est. quodcumque uident. spes una pauentis
cor tetigit iuuenis, causam mandare patrono
indulti et totiens propius meminisse fauoris.
nuper contigerat perlatam euoluere chartam,
innumera ut miris fulgeret gratia signis,
quis dominus ueri meritum testatus amici
ornabat sanctum per dona inmensa sepulchrum.
haec signa antistes dextra signauerat alma
Perpetuus, tanti gauisus laude magistri.
hanc igitur chartam uix linguae murmure paruo
incunctante fide spes non incerta poposcit.
praestitit et fessam laxauit gratia linguam.
- ergo inter medios quos febris mouerat ignes
uirtutum palmas stomacho coniunxit anhelo
et rapuit, recolendo fidem quae scripsit, in ipsis
condita uisceribus quidquid conclusa tegebat
pagina, et ad uotum uelox medicina cucurrit.
exiluit iussus tanta ad miracula sudor,
ut scribenda fidem faciant, quam scripta retentant.
non tam pernici suspendunt sucina saltu
fistucam faeni uicini glute uaporis,
quam citus ad chartam madefacti corporis humor
mandato celerante redit. spe uita reuertens
affectu quaesiuit auum quasi nuntia tanti
muneris, et reliquis iussit me iungere signis
causa rei. adsistit propior clementia sancti
et culpae offensam releuat tutella fauoris.
nec mora commoditas numerum praegressa dierum,
quo saepe ignaros spes dinumerata fefellit,
auxiliis orantis adest. nec clauditur ullis
gratia uera locis nec uires terminus artat,
quas deus adcumulat. propter curatio tangit,
cellula suscepit, quod mens adtenta poposcit,
atque ipso ingressa est quo credita gratia puncto.
ille aeger letumque pauens uxoris amatae
fit medicus suadetque fidem mittendo salutem,
poscit et ille torus, quidquid persenserat iste.
est certamen opem retinere et quaerere partem.
hic possessa timet dimittere, at illa probatis
si + dure inque uices ambo optant, ambo retentant,
atque haerens uni pietas succurrit utrique.
grates, sancte, tibi, dum spiritus hos regit artus,
mens et lingua canet. nunc respice cetera clemens
membra domus, celeris reuehens fomenta salutis,
et tibi commissam propior solare senectam,
optata indulgens propere uel praestita seruans.
Source. Latin text from the Corpus Scriptorum Ecclesiasticorum Latinorum (CSEL) collection of the Open Greek and Latin project (digital edition of Poetae Christiani Minores edited by Michael Petschenig; Robinson Ellis; Georg Brandes; Karl Schenkl (Vienna, Prague, Leipzig, Tempsky, Freytag: 1888) Corpus scriptorum ecclesiasticorum latinorum 16.1), encoded in EpiDoc TEI XML. Digitised and corrected by the Open Greek and Latin team (University of Leipzig and partners); the text is taken from the printed edition by OCR with correction, so some errors may remain. SermonIndex has only divided it into short sections for reading; the critical notes, margin notes and apparatus of the printed edition are not shown here but are kept in the XML download.
Licence. Creative Commons Attribution-ShareAlike 4.0 International (CC BY-SA 4.0). You may share and adapt this text if you credit the Open Greek and Latin project and release your version under the same licence.