Miamun 20

1 Abraham itangin Mamri gampan rai da intsungê iruê Negeb da impa wasaê i gamp Kadis da Sur. Raiyi da itip intsungê ifan da impa Gerar. 2 Mingêa nigi da Abraham ini Sara igi arangan nafunggan. Ibinigi da Abimelek, garam Gerar king gan, itangin gan garam guman ifan da iyu Sara iba da arangan. 3 Da bitsintaê idziang mangan da Anutu ini nan da Abimelek imingê nam puafuban ibiani, “Agu da u garam bini angu i mampan, i sagat u yudan igi sagat gabun." 4 Abimelek anungê iwarip isu uts da Sara u, ibinigi da arangan ini binaê, “Nifutsarif, dzi garam asub maêa gin da u bungê asiat dzi da utupangê santan? 5 Abraham runggan ini i sagat igi arangan nafunggan. Da sagat runi ibinigi i Abraham igi arangan nafunggan marub. Gubuê dzi uda sagat igi da dzi marangê ifur i dzi nang sanab rururungan da dzi wanang asub mangan u." 6 Da Anutu itip ini da arangan imingê nam puafuban ibiani, “Hai, dzi tsanga u sanabam rururungan bini igi da dzi aruani imunti sib i agu i anungê nanga nam maisan mingêa dzi maranggangê i anungê ruta arangan gingêan u. 7 Da watip watangin Abraham fininggan nafa rutin, i arangan garam uda dzi nanggangê da atsungêa gin da bungê augin i agu da u wasangê i mampan u. Da bida u mamida tanginda arangan fininggan fada rutin da agu da gam utupam santan bungê amamp." 8 Da maratait bingan da Abimelek yuriê da inuê gan garam guman santan impruê da ini da ribarangan i nam santan Anutu nida rutin mingêa nam puafuban. Da ribarangan irat nidzun angu gin. 9 Ibinigi da Abimelek ini da Abraham iba munti i maran da igutin, “Wain idzuwai da u nang nam bida ani da agai? Dzi nang asub idzuwai da agu da u nang uwayant bida ani da dzi da gangê utupangê iwaê da asub tsiraê? Uwayant aru u nangan igi anungê idaum mangan u. 10 Wain idzuwai da u nang ibiani?" 11 Abraham ini arangan nanggan mungaê ibiani, “Dzi marangê ifur i garam gamp ani wanatsarif Anutu u. Da bungê ais dzi funub i uda dzi fininggangê. 12 Nan nidzun, Sara igi dzi nafunggangê. Dzi ramanggangê irim da rinangê mangan, aga wampruê rinangê u. Ida dzi yu isu dzi fininggangê. 13 Da gubuê Anutu nidan da dzi i tanginda ramanggangê gampan rai da fada intap mangan da dzi ni da Sara ibiani, ‘Bida u maram arida i dzi da agi nida fada gamp bida anungê da wani da garam da sagat nabiani, “Abraham igi dzi nafunggangê.” ‘" 14 Gubuê Abraham nida nan sib, da Abimelek irim dumpa da makau da garam da sagat gum impruê da Sara ifan da Abraham. 15 Abimelek ini da Abraham ibiani, “Watsangan. Intap ani dzi intapangê. U maram fura i mpada anungê da wafa mpa gin." 16 Da ini da Sara ibiani, “Dzi rim 1,000 silva da u nafunggam i ntsuma barabin aru waêan da agu ani, i rib santan ruta agu mpadan sruêagin bida u wanang asub mangan u." 17 Da Abraham yugin da Anutu, da Abimelek rinin idaum da isiat barabin udzuda arangan fininggan da sagat guman santan wangun i mamida rima narun ruas ugu. 18 I Yawe yudzu sagat santan mpada Abimelek ungaran wangun sib i wain iruê, arangan iyu Sara, Abraham fininggan.