Miamun 26

1 Da gubuê fus tsiraê nam gada maringêa sib iwaê intap Kanan ibi mungê da waêan da Abraham ugu. Ibinigi da Isak intsungê ifa gamp Gerar, garam Filistia king gan Abimelek gampan. 2 Yawe iwaê da arangan da ini, “Agu anungê ruêa gamp Idzip u. U bungê ampai intap idzuwai Dzi bungê ani da agu i mpada gin. 3 Wampa intap ani da Dzi bungê arut agu da nafinti agu. I intap aruani santan Dzi bungê arim da agu da u tafam rusam i sangêa nan Dzi tagada ruangê gin da u ramanggam Abraham ugu. 4 Dzi bungê autus u tafam rusam yanginggan nawaê nasisungê nasangê ngantam narun da narim intap ani santan da ribarangan. Da mingêa u yangin rusam rururungan da Dzi bungê afinti garam intap utup utup santan, 5 i Abraham yatangê warangê i Dzi da itip Dzi nanggangê faidagin da nam santan Dzi santingêa arangan gin." 6 Ibinigi da Isak impa imingê gamp Gerar. 7 Gubuê garam gamp igi guta i arangan i fininggan da arangan ini binaê, “Dzi nafunggangê igi.” I arangan irat da ini i wangunggan angu ibiani, “Bida dzi nida fininggangê gin da garam gamp ani bungê ais dzi funub i arangan, i Rebeka igi sagat mara rifirif bini." 8 Isak impa nigi gubuê ampi bingan sib raiyi, da gubuê mangan Abimelek, garam Filistia king gan, imunti ungaran muantsi wagungê da irarab Isak yafusa fininggan Rebeka. 9 Abimelek inuê Isak iba munti i maran da ini rutin, “Aruani da dzi sruê gin sib. Sagat arigi u fininggam. Wain idzuwai da u ni nafunggam i arangan?” Da Isak ini binaê, “Dzi marangê ifur ibi dzi bungê arim runggangê rai i arangan bida dzi nida fininggangê gin." 10 Da Abimelek ini, “Ibianungê da u nang uwayant ibinigi da agai? Bida dzi garamangê mangan dani ruta u fininggam gingêan, da Anutu madararu agai i u nanggam iyuêan igi." 11 Abimelek ini nan babampafan da gan ampan gan ibiani, “Manga bida nanga asub yaba i garam ma sagat aruani da arangan bungê amamp i mungaê gan." 12 Isak iraf gum da udzuf arigi imingê intap igi da nam nidzun bitsintaê bitsintaê arangan ntangan da ikap nidzun 100 isangê ruan santan, i Yawe ifinti arangan nidzun angu, 13 da arangan isu garam nam bunump tsiraê da nam bunumpan rungê yutus i ruan angu ibinigi. 14 Arangan isu wain i dumpa da makau da garam gum ampi bingan, da garam Filistia nugun iruaê i arangan. 15 Ibinigi da ribigi idzufungê mpui rafan santan arangan ramanggan Abraham garam guman rafan ugu. 16 Da Abimelek ini da Isak, “Aruani da aga tsanga u su garam nampangê tsiraê iyus agai, ibinigi da watangin aga gampangê rai da wafan." 17 Ibinigi da Isak itangin gamp igi rai da ifan da impa imingê intap bump Gerar. 18 Isak itip ini da garam guman iraf mpui santan aru ramanggan Abraham garam guman rafa mungê ugu. Abraham imamp sib raiyi da garam Filistia idzufungê mpui santan sib. Gubuê tipa rafan da Isak itip ifaringê bingan aru ramanggan Abraham faringêa gin mungê ugu. 19 Gan garam guman itip iraf mpui faê mangan imingê nigi da iwaê da mpui maran budubuatagin. 20 Da bitsintaê garam Gerar garaman mpada tayangê makau gan irut Isak garaman mpada tayangê makau gan isu ufuai da ruan da ini, “Aga mpui gangê igi.” Ibinigi da Isak ifaringê mpui rafan igi Esek (wainggan ibi ‘suda ufuai da ruan’), i ribigi irut Isak isu ufuai da ruan i mpui rafan igi. 21 Raiyi da itip iraf mpui mangan da ribigi itip irut isu ufuai i nigi impruê, da Isak ifaringê i binganggan Sitna (wainggan ibi ‘usuda gudzun i ruan’). 22 Isak itangin nigi rai da itip iraf mpui mangan. Da gubuê arigi da garam mangan watip irut isu ufuai gin u, ibinigi da ifaringê i binganggan Rihobot (wainggan ibi ‘intap utaê mangan’) da ini, “Aruani da Yawe irim intap utaê manga ani da agi i mpada bini da agi yangin rusangê bungê autus i ruan nawaê nasisungê namingê gamp ani." 23 Da Isak itangin nigi rai da iyab ifa mpa gamp Birsiba. 24 Da idziang arigi Yawe iwaê da arangan da ini binaê, “Dzi u ramanggam Abraham Anutu gan. Agu anungê ratan u, i Dzi rut agu impai. Da Dzi bungê afinti agu da nautus u tafam rusam nawaê nasisungê, i wain iruê dzi yudzu nan sib da garam gumangê Abraham." 25 Isak yantungê tauf tsarada nam in i nigi da itsarif Yawe gin. Da arangan yari ungaran apu rini gangan da gan garam guman iraf mpui mangan impruê imingê igi. 26 Gubuê mangan da King Abimelek irut gan garaman rima uwayant, Ahusat, da gan garaman singa-ati gudzunggan, Fikol, imingê gan gampan Gerar iba i tsanganda Isak. 27 Bawaêan da Isak igut i ribarangan, “Wain idzuwai da agam iba i tsanganda dzi, garam aru agam bugindan da wata rai i gam gampam ugu?" 28 Da ribarangan itip ini arangan nifunggan mungaê ibiani, “Aga tsangan dzidziwandan ibiani, Yawe irut agu, ibinigi da aga ni i agi tsafa ruangê da udzuda nan muntida wasaê i agu da agai, 29 i agu anungê nanga maisan i agai u, nabi aga tipa agu bini angu isangê u tanginda aga rai da bada ruta nan maêan. I aruani da aga tsangan i Yawe ifinti agu." 30 Ibinigi da Isak isu nam gadan tsiraê mangan i ribarangan da igan da inum. 31 Pisa tataê maratait mangan da ribarangan impruê ruan da yudzu nan da itaga ruan gin i mpada bini. Da Isak itangin ribarangan rai ruta nan nufan da ifan. 32 Gubuê arigi rururungan da Isak garam guman ibawaê da arangan da ini rutin ibiani, “Aga raf mpui mangan da aga waê da mpui sib wa." 33 Da Isak ifaringê mpui rafan igi binganggan Siba. Ibinigi da mingêa nigi bawaêan da aruani da rungê ifaringê gamp igi binganggan Birsiba. 34 Isau udzufan isangê 40 da iyu sagat iruêrun, Dzudit da Basemat. Dzudit ramanggan Beri, da Basemat ramanggan Elon, rib iruê igi garam Hit. 35 Sagat iruê igi inang Isak da fininggan Rebeka wangun ibarabin nidzun angu.