Miamun 27

1 Isak ifufi sib da maran isap da anungê isangê i rungê raraba nam, ibinigi da irim nan i narun miamun Isau iba da ini rutin, “O Isau, dzi narungê.” Da Isau ini, “Ramangê, dzi aruani. U ni wai?" 2 Da Isak ini, “Aruani da dzi fufi sib da dzi wasruê i gubuê gangê mampan u. 3 Wau dampa da biriang gam da wayung apu wap i tipa dzi nifungê gin. 4 Da wabanga apu nasu ntsits ngarubini tusa dzi wangê da wau waba da dzi nagan da dzi narim nanggangê fintidan da agu nasu miamun, ida dzi namus mampan." 5 Gubuê arigi da Rebeka impai da iringant i Isak nanggan nidan da narun Isau. Gubuê Isau tanginda raman da fada sib i yunga apu wap i uda badan, 6 da Rebeka ini da narunggan Yakop ini binaê, “U ringantin, aruani da dzi mpai da dzi ringant i u ramanggam nanggan nidan da Isau bida ani, 7 ‘Wafan da wau apu mangan waba da wabanga da nasu ntsits bini angu da watip dzi nifungê gin i dzi gadan. Da mingêa Yawe maran da dzi bungê arim nanggangê fintidan da agu nasu miamun ida dzi namus mampan.’ 8 Ibinigi da narungê, waringant i dzi bini angu da wanang nam nasangê dzi nidan da agu da aruani: 9 Wafa ntsingê aga ugu da wau nuning naru faê dudubadan iruêrun naba da dzi. Da dzi natip nam gadan ntsits bini u ramanggam maran aridagin yusan. 10 Ida wau wafan da ramanggam nagan, da arangan bungê arim nanggan fintidan da agu sib, ida namus mampan." 11 Yakop ini rinanggan nanggan mungaê ibiani, “Rinangê. U sruê i dzi rainggangê Isau sib wa. Arangan garam rinifufun yusan, da dzi imaê. 12 Da bida anungê i ramangê yafusa dzi da rabuba gin? Bungê ani dzi intsaêa i iyuêa arangan da bungê arim nan pupuarapan maisan da dzi, da dzi wasangê i uda nam fintidan mangan u." 13 Da bitsintaê rinanggan ini, “Dzi narungê. U maram anungê fura nan yusan u. Dzi bungê au nam pupuarapan maisan arigi. Da wanang nam nabi dzi nidan da agu igi. Wafan da wau apu iruê igi naba da dzi." 14 Ibinigi da Yakop ifan da iyu apu iruê igi iba da rinanggan, da rinanggan itip nam gadan isangê ramanggan Isak maran aridagin ugu. 15 Ntsupa sib da Rebeka iyu narun tsiraê Isau ngarukui gan bini mangan mingêa ungar wasaê da yatsuf ifan da Yakop, narun isiê igi. 16 Arangan yudzu nuning rinifufun ifa Yakop bangin da wan da ibuafir sib. 17 Da Rebeka iyu nam ntsits bini da bret fain arangan tipan ugu da irim da narun Yakop. 18 Yakop iyu nam gadan igi ifan da raman da ini binaê, “Ramangê.” Da raman ini binaê, “Hai. U wai igi?" 19 Da Yakop ini, “Dzi Isau, u narunggam miamun. Dzi tip nam santan ibi u nidan da dzi ugu. Wauriê da waga apu dzi tipa sib ani da warim nan fintidan da dzi." 20 Da Isak igutin, “Dzi narungê, u waê da apu igi sung angu ibianungê?” Da Yakop ini, “U Anutu gam Yawe irim dzi sib, da dzi yu iba sung angu." 21 Da Isak ini da Yakop, “Waba uts angu da dzi, da dzi nagif agu. Da dzi narabubin nabi dzi narunggangê rururungan Isau agu, ma imaê." 22 Yakop ifa uts angu raman maran da Isak igif arangan da ini binaê, “U wanggam nida nan iwaê ibi Yakop. Da bangim ani ibi Isau gan." 23 Isak anungê isruê gin ibi Yakop u, i arangan bangin isu rinifufun ibi rainggan Isau banginggan; ibinigi da Isak ifinti arangan. 24 Da itip igutin ini binaê, “Agu dzi narunggangê Isau rururungan, ma?” Da Yakop ini, “Hai, dzi arangan arani." 25 Da Isak ini, “Ariê, dzi narungê. Wayu apu gam igi waba da dzi nagan, ida dzi narim nanggangê fintidan da agu.” Ibinigi da Yakop iyu nam gadan gan iba rim da raman Isak igan, da ifa yu wain gurun iba da arangan inum. 26 Ida Isak ini da Yakop ibiani, “Dzi narungê, waba uts aruani da watsutsuf dzi." 27 Ibinigi da Yakop ifa rutin da itsutsuf arangan. Gubuê Isak tungisa Yakop ngarukui gan atsufan da ifinti arangan da ini binaê, “Dzi narunggangê nam gauntan impung gin isangê gum mangan gauntan Yawe nangan waêa ngarubini bingan. 28 Anutu bungê atangin tifituf naruê da nanang u intapam nasisungê i nam gadan, wit nidzun da wain faê ampi bingan. 29 Garam utup utup bungê asu u garam gumam da bungê arim antungê da narasu runggan da agu. Da u bungê asu nifutsarif i raim rusam fain, da u rinanggam narun rusan bungê arasu runggan da agu. Garam pupuarapa ruta agu bungê awaê da nam pupuarapan igi mungaê gan. Garam tsarifa agu da nanga bini angu i agu da bungê au nam fintidan nabinigi." 30 Isak ifinti Yakop sib da Yakop bungê tanginda raman rai da rainggan Isau imingê wap ibawaê. 31 Arangan ibinigi itip apu ntsits bini da iyu iba da ramanggan da ini, “Ramangê, wampa wayab da waga apu dzi uda badan da agu ani, da wafinti dzi." 32 Da Isak igut i arangan, “Agu wai?” Da Isau ini, “Dzi Isau, u narunggam miamun." 33 Isak irunt fafun nidzun angu da iratarat iyus da igutin ini binaê, “Manga arigi iyung apu da iyu imungê ba da dzi? Dzi ga nam igi da dzi finti arangan sib, da pas angu da u bawaê. Da nam fintidan bungê arut arangan nanting." 34 Da gubuê Isau ringanta i raman nanggan igi da iyaiê da irang tsiraê bingan ruta wangun barabindan da ini binaê, “Ramangê, wafinti dzi nabinigi!" 35 Da bitsintaê Isak ini da arangan ini binaê, “U rainggam isu umpur tsiraê bingan angu da dzi da iyu agu nanggam fintidan sib." 36 Da Isau ini ibiani, “Ramangê! Bingan Yakop isangê arangan rururungan. Mungê da arangan isu umpur da dzi, da iyu dzi nanggangê suda mamaê miamun gan. Da aruani da itip isu umpur da agu, da iyu dzi nanggangê fintidan. Da ramangê, nan fintidan pas u mamida riman da rumingêan, da warim da dzi." 37 Da Isak ini arangan nanggan mungaê ibiani, “Dzi nang arangan isu garam nifutsarif tsiraê i suda wain i agu, da dzi nang i rain rusan da utupan isu i garam guman. Wit da wain bungê awaê nasisungê arangan i dzi rim nam santan igi rutin sib. Da narungê, dzi bunanga bida anungê i agu?" 38 Da Isau ini da raman, “Ramangê, nan fintidan igi mani bitsintaê angu, ma? Wafinti dzi wampruê!” Ibinigi da arangan irang tsiraê bingan angu. 39 Da Isak ini arangan nanggan mungaê ibiani, “U gampam mpada gin bungê amingê guntiê i intap nagaran da tifituf maranguntun mamida ruaêa gin. 40 U bungê ais bungaê maiê maiê i waêa da nam bunumpam da u bungê asu rainggam garam guman angu. Da bitsintaê raiyi da u bungê araraiê i rainggam da u bungê antap runggam rai sinungê arangan nanggan mpada tayangê agu." 41 Isau maran ifur nan fintidan Isak riman da Yakop igi, da isu wangun nidzun angu da Yakop. Da ini angu imingê wangunggan ibiani, “Ramangê gubuê gan mampan iba su uts, da bida aga ranga gin sib, da dzi bungê ais rainggangê Yakop funub." 42 Da bitsintaê gubuê Rebeka uda sisingê i Isau sanaban tipan da inuê Yakop ba da ini rutin ibiani, “Waringantin, u rainggam Isau irasu wangun barabindan i nanggan tipa i isa agu funub. 43 Ibinigi da dzi narungê, wanang wabi dzi nidan, da wafan da dzi nafunggangê Laban da warut wampai namingê gamp Haran, nasangê u rainggam nugunggan nufan da maran samuda nam u nangan da arangan. Raiyi da dzi bungê atangin rib fain nabiaê i tipa uda agu badan. Dzi bugin i tanginda narungê rusangê agam iruê igi rai da gubuê bitsintaê angu." 46 Rebeka ini da Isak ini binaê, “Dzi raraiê nidzun angu i Isau finin rusan, sagat Hit iruê ani. Bida Yakop uda sagat Hit ani gan mangan sangêa sagat tuas iruê aruani, da dzi nanggangê mpadan bungê amais wasi."