Miamun 30

1 Retsel itsanga runggan ibianungê irim Yakop narunggan da nugun iruaê i rainggan da ini da Yakop ibiani, “Warim narum da dzi amaê. I bida anungê da dzi bungê amamp." 2 Yakop nugun isasus i arangan da ini binaê, “Isangê i dzi uda Anutu mumai gan i nanga nam Anutu nangan? Imaê! Arangan runtaê angu isu wain i udzuda agu i mamida rima narum." 3 Da Retsel ini, “Dzi sagat gumangê Bilha aruani. Nabiaê da warut wagingê da narim mamaê narun i dzi binganggangê da dzi nasu rinan gin. I mingêa arangan da dzi bungê autus i yanginggangê." 4 Ibinigi da Retsel irim sagat guman Bilha ifan da Yakop isu i fininggan. Da Yakop irut igingê, 5 da Bilha iwangun da irim Yakop narunggan marub mangan. 6 Da Retsel ini binaê, “Anutu iraru agai da imunti maran udzib da dzi da iringant i dzi nanggangê udagin da irim mamaê narun aruani da dzi.” I wain igi da ifaringê i binganggan Dan (wainggan ibi ‘iraru’). 7 Retsel sagat guman Bilha itip iwangun da irim Yakop narunggan marub mangan. 8 Da Retsel ini binaê, “Dzi yis gudzun nidzun angu da rainggangê da aruani dzi waê da nam nidzun sib.” Ibinigi da arangan ifaringê i binganggan Naftali (wainggan ibi ‘isa gudzun’). 9 Gubuê Lia tsanganda bida arangan watip irim narun u, da irim sagat guman, Tsilpa, da Yakop da arangan iyu isu i fininggan. 10 Lia sagat guman Tsilpa irim Yakop narunggan marub mangan. 11 Da Lia ini, “Dzi rab runggangê inting angu.” Ibinigi da arangan ifaringê i binganggan Gat (wainggan ibi ‘raba runggan ntingan angu’). 12 Impai da Lia sagat guman itip irim narun marub mangan. 13 Da Lia ini, “Dzi nugungê inuf wasi bingan. Sagat sib angu bungê ani dzi sagat nugungê tsiaêan.” Ibinigi da arangan ifaringê i binganggan Aser (wainggan ibi ’nugun tsiaêan’). 14 Gubuê safa wit ibawaê da Ruben ifa gum wit da itsangan nam nidzun fain turuda sagat i wangundan rumingêan. Arangan iyu i nidzunggan da iyu ifan da rinanggan Lia. Retsel itsangan da ini, “Amaê Lia, isangê u rima narunggam nam nidzunggan fain da dzi?" 15 Da bitsintaê Lia ini da Retsel, “Mani nidzun arangan igi i u uda dzi gabunggangê sinungê dzi? Da aruani da u ni tipa uda dzi narunggangê nanggan uda badan da dzi ani mpruêan, a!” Da Retsel ini, “Isangê. Bida u rima narunggam nam nidzunggan fain da dzi, da Yakop bungê arut agu nagingê da idziang aruani." 16 Gubuê Yakop mingêa gum ba da nam nufan arigi da Lia imingê sanab ifa i arangan da ini rutin, “U bungê arut dzi nagingê da idziang aruani, i dzi rim nam ntsuman sib i agu i gai nidzun dzi narunggangê uda badan.” Ibinigi da Yakop irut arangan igingê da idziang arigi. 17 Anutu iringant i Lia nanggan udagin da arangan iwangun da irim Yakop narunggan mangan isu 5. 18 Da Lia ini binaê, “Dzi tangin sagat gumangê da gabunggangê, ibinigi da Anutu irim i mungaê gan bini angu da dzi.” Ibinigi da Lia inuê arangan binganggan Isakar (wanggan faringêan iwaê ibi ‘rima i mungaê gan bini’). 19 Raiyi da Lia itip iwangun da irim Yakop narun marub mangan ifa 6. 20 Da ini binaê, “Anutu irim maraampi bini da dzi. Da aruani dzi gabunggangê nifun bungê atsaf dzi nidzun angu, i dzi rim arangan narun rusan marub isangê 6.” Ibinigi da Lia inuê arangan binganggan Tsebulun (wanggan faringêan iwaê ibi ’nifun tsafan’). 21 Raiyi da Lia itip irim narun finam mangan da inuê i binganggan Daina. 22 Da Anutu maran rufur Retsel i nanggan udagin da itus muantsi i arangan wangunggan da aranga sangê i rima narun. 23 Ibinigi da arangan iwangun da irim narun marub mangan da ini binaê, “Anutu itias dzi miaê gangê rai." 24 Da inuê arangan binganggan Yosef (wainggan ibi ‘rima ragun i ruan’). Da itip ini binaê, “Dzi marangê yari i Yawe tipa suda maraampi i marub manga atsungêa ani." 25 Gubuê Retsel rima Yosef sib da Yakop ini da Laban ibiani, “Dzi nang gum i agu isangê udzuf 14 sib, da dzi ni tipa fada gampangê wain. Da watangin dzi finingê rusangê da narungê rusangê ba i dzi ruta fadan, i dzi nang gum tsiraê i agu iyab i sagat iruê igi. Da u sruê gin sib wa." 27 Da bitsintaê Laban ini da arangan ibiani, “Dzi gaib runggangê da agu i anungê fadan u. I dzi tsanga Yawe inang bini i dzi, i wain ibi u rut dzi impai. Ibinigi da wampai da watip wanang gum i dzi. 28 Da wani nam bunumpam u nida udan da dzi, da dzi bungê arim da agu." 29 Da Yakop ini, “U tsanga dzi gumangê nanga i agu sib iyab i u apu gam waêa bini da yusan da gubuê dzi mpada tayangê gin. 30 Mungê aru dzi mamida badan ugu da u mpa tayangê apu gam iruê angu. Da gubuê dzi bawaêan da ruta agu mpadan da u apu gam inti iyus, i Yawe ifinti agu iyab i gum dzi nanga i agu sib da inang agu isu garam nidzun. Da dzi burima utupangê sib bida anungê?" 31 Da Laban igut i arangan, “Da u maram ifur nam bunump idzuwai i dzi riman da agu?” Da Yakop ini, “Dzi wani u rima nam mangan da dzi u, imaê. Dzi bungê autus gumangê mpada tayangê u apu gam, bida u uda dzi nanggangê bida ani yaban: 32 Aruani da dzi bungê ayung natsuar u dumpa gam da nuning gam santan da nau dumpa marabusung da rinin puatpuatagin da nuning rinin puatpuatagin nasu dzi nam bunumpangê. 33 Bida u tsanganda nuning mangan rinin mamida puatpuatagin ma dumpa mangan rinin maragamp mingêa dzi gin, da u bungê asruê gin nabi dzi wap. Nigi bungê asu gum isiê da agu i u tsangandan dumpa da nuning dzi uda suda nam ntsuman, da u bungê asruê gin nabi dzi yatsungê nanggangê rururungan, ma imaê." 34 Laban iringantin da ini binaê, “Ngarubini. Wanang wabi u nidan." 35 Da bitsintaê gubuê arigi da Laban ipiriang nuning gan arapuê da rinan rini maragamp puatpuatagin ma umpuar taringêan impruê da dumpa marabusung santan da itangin ifa da narun rusan marub i mpada tayangê gin. 36 Laban irut riban iyu apu gan piriangêan ugu da ifa guntiê isangê yunga gubuê iruê da bits. Da Yakop rumpa tayangê Laban dumpa gan da nuning gan fain. 37 Da Yakop irab gai bangin rururungan fain imingê gai iruê da bits binganggan popla da almon da plen, da itsuwaê i gangan itangin tangin gin da gai igi isap wasaê wasaê gin. 38 Da idamangê uts da piangê numa mpui gin i Laban nuning da dumpa gan bada i numa mpui da raraban. Yakop isruê gin i gubuê nuning da dumpa bada i numa mpui da arapuê bungê ayab i rinan. 39 Ibinigi da gubuê arapuê yaba i rinan uts da gai bangin igi da bungê apingê narun rinin puatpuatagin da umpuar taringêan. 40 Yakop ibibi i apu naru faê rinin ruga rugan ifa munti utup utup da apu santan yaba i ruan maran ifan da apu naru faê marabusung da umpuar taringêan igi. Arangan inang ibinigi da runggan isu wain i gan dumpa gan da nuning gan, da wampruê ifan da Laban gan u. 41 Da gubuê dumpa da nuning riniurun nanga i yaba i ruan da Yakop irim gai bangin uts sib in i mpui numan igi. Da itsangan gai igi da iyab i ruan. 42 Da gubuê dumpa da nuning awan maêan nanga i yaba i ruan da Yakop warim gai igi u. Ibinigi da dumpa da nuning awan maêan ifan da Laban, da riniurun ibafa da Yakop. 43 Yakop sanaban nanga bida nigi da aranga isu garam nam bunump tsiraê i dumpa da nuning ampi bingan impruê da garam da sagat gum, kamir da dongki.