Miamun 47

1 Ibinigi da Yosef ifani da King Farau ini binaê, “Dzi ramanggangê da raingê rusangê mpada intap Kanan ugu ibawaê sib. Ribarangan iba inting da dumpa gan da makau gan da nam bunumpan santan, da iba mpa imingê intap Gosen da aruani." 2 Arangan ipiriangê rain rusan 5 da ifa rut imunti King Farau maranggan. 3 Da king iguti ribarangan ini binaê, “Agam inang gumam idzuwai?” Da ribarangan ini, “U garam gumam agai ani garam mpada tayangê dumpa yatsungê ramangê rusangê sanaban musa nangan." 4 Da ribarangan ini da arangan impruê ibiani, “Aga ba i mpada nani pas angu, i gubuê fus tsiraê nam maringêa sib iwaê Kanan da u garam gumam apu gan isau sai i gadan. Ibinigi da u garam gumam agai ani igaib runggangê da agu i u gaiba agai da aga fampada intap Gosen." 5 Ibinigi da King Farau ini da Yosef ibiani, “U ramanggam da raim rusam iba da agu; 6 da intap Idzip ani santan isu u nanggam da wapiriangê nasangê u maram aridagin. Bida u maram furan da watangin ramanggam da raim rusam i intap bini Gosen. Da bida u tsanganda ribarangan gan fain waêa bini yusan i sanab mpada tayangê apu santan da nampa tayangê dzi makau gangê nampruê nabinigi." 7 Ibinigi da Yosef ifa yu ramanggan iba munti King Farau maranggan. Da Yakop ifinti king i nan bini, 8 da king igut i arangan da ini, “Agu udzufam wayawai?" 9 Da Yakop ini da king ibiani, “Dzi udzufangê ntsungêa mpada yungan da aruani isangê 130 angu, da wasangê dzi ramanggangê da rumpunggangê udzufan ntsungêa mpada yungan u. Da dzi waê da barabin ampi bingan impruê." 10 Yakop ini nan sib da ifinti King Farau da itangin arangan rai da ifan. 11 Ibinigi da Yosef itangin intap bini Rameses mingêa Idzip da ramanggan da rain rusan impa gin ibi king nidan. 12 Da Yosef irim nam gadan da ramanggan da rain rusan da ramanggan utupan santan yatsungê narun ruas wayawai ibinigi. 13 Gubuê fus tsiraê imingê gubuê guntiê bingan da nam gadan santan imaringê sib, da garam gar sib angu Idzip da Kanan impa asub i mangits. 14 Yosef iyu moni santan ampan Idzip da Kanan suba nam gadan gin da iyu iba rim i king ungaran. 15 Gubuê ampan Idzip da Kanan santan moni gan ntsupan, da rib Idzip iba da Yosef da ini, “Warim aga sib i nam gadan, i aga bungê amamp i mangits. I aga moni gangê santan intsup sib wa!" 16 Da Yosef ini, “Da bida nigi da agam wayu apu gam waba da dzi da dzi bungê arim nam gadan da agam i mungaê gan." 17 Ibinigi da ribarangan iyu hos, dumpa, nuning, makau da dongki gan iba da Yosef i suba nam gadan. Da Yosef irim ribarangan santan sib i nam gadan isangê udzuf arigi. 18 Gubuê udzuf arigi ntsupan da atupa udzuf faê da ribarangan itip iba da Yosef da ini, “O garam tsiraê! Aga wasangê dziginda barabin gangê i agu u. Aga moni gangê da apu gangê santan intsup sib da isu agu gam. Da aga nanggangê mangan ruwamingê i riman da agu i suba nam gadan gin u. Imaê, agai angu da gangê intapangê. 19 Warim aga sib i aga anungê mampa i mangits da aga intapangê mingêa utaê u. Wayu agai da intapangê nasub dzafain i nam gadan. Da aga nasu king garam guman da sagat guman utaê angu, da intapangê bungê asu king gan. Warim nam gadan da agai i aga anungê mampan, da warim nam yamun da agai i intap anungê mingêa utaê u." 20 Ibinigi da Yosef irim nam gadan isu nam ntsuman i rib Idzip intapan santan isu king nanggan, iruê i nam mangits tsiraê wayada garam Idzip santan. 21 Da Yosef inang garam Idzip santan mingêa gubuê yaban da gubuê ruêan isu King Farau garam guman utaê angu i nanga i guman. 22 Da intap Yosef mamida udan, da garam anutu wain i anutu umpur intapan, i king impa tayangê ribarangan da isangê i nam gadan. I wain igi da ribarangan rugif intapan ragun. 23 Yosef ini da ampan santan ibiani, “Agam sib angu waringantin, gubuê aruani da dzi yu agam da intapam isub dzafain isu King Farau nanggan. Da nam yamun aruani, agam wayu da wafa ntang i gumam ruga rugam. 24 Gubuê nam igi suda nidzun sib da agam waufum nasangê 5. Da warim 5 igi gan bits nafan da king, da agam wayu gam faban igi gan 4 i agam utupam gadan da ntangan." 25 Da ribarangan ini, “Garam tsiraê, u rim aga sib ngarubini, da aga rubungê ampa marataê. Aga taga ruangê i suda king garam guman utaê angu." 26 Ibinigi da Yosef yudzu nan mangan isu nan faidagin imunti wasaê i garam Idzip, i bida gubuê nam atiêan da natsaf 5 igi gan bits nasu king gan. Da nan igi rungê imunti da gubuê aruani ibinigi. Da garam anutu wain i anutu umpur intapan angu da king anungê iyu u. 27 Garam Israil impai imingê intap Gosen mingêa Idzip da iyu intap imingê nigi, da isangê nidzun angu i nam bunump da irim narun rusan iyus angu. 28 Yakop impai Idzip isangê udzuf 17, da mpruê arangan udzufan santan mpada rutin igi isangê 147. 29 Yakop gubuê gan nanga i mampan basuda uts, da inuê narunggan Yosef ba da ini rutin ibiani, “Bida u maram arida nidzun angu i dzi da warim bangim waruê dzi faga rampuat da wataga ruam nidzun angu da dzi i u anungê rima dzi i gamp Idzip ani u, 30 gubuê dzi mampa sib da watip wau dzi nawaê sinungê gamp Idzip da wafarim dzi nampruê da ramangê rusangê i gampan gingêa gin.” Da Yosef ini, “Hai, ramangê! Dzi bungê anang nabi u nidan." 31 Da Yakop ini, “Watsarif ruam nidzun angu da dzi.” Yosef itaga ruan nidzun angu da raman, da Yakop irim antungê iruê gan rabiê gan gingêa gin da irim dangki gin.