Miamun 48

1 Gubuê fain fada sib da Yosef iyu sisingê i arangan ramanggan gingêa rinin. Ibinigi da arangan iyu narun rusan marub iruê igi, Manase da Ifraim, ifan i tsanganda Yakop. 2 Gubuê Yakop uda sisingê i narun Yosef bada i tsanganda arangan, da arangan riniurun gan pas rumingêan da inting ruan i rabiê gan da impa iyab. 3 Yakop ini da Yosef, “Anutu Nampang Wain iwaê da dzi imingê Luts mingêa intap Kanan da ifinti dzi imingê nigi 4 da ini ibiani, ‘Dzi bungê arim yangin ampi bingan da agu da u yanginggam bungê autus i ruan nasu garam utup tsiraê bingan. Da dzi bungê arim intap aruani da u yanginggam taptap nasu i nam bunumpan nanting.’ 5 Da, Yosef, u narum rusam marub iruê waêa gamp Idzip ani mungê da dzi musa badan da isu dzi gangê; Ifraim da Manase bungê asu dzi narungê rusangê nidzun nabi Ruben da Simion. 6 Da bida u narum rusam fain waêa bampan i mamaê iruê ani da bungê asu u gam. Da intap nida faba bafadan da ribarangan bungê amaê. Da bungê ampa wasaê i Ifraim da Manase yangin rusan angu. 7 Dzi ni nan igi i gubuê dzi mingêa Padan Aram badan ugu da Retsel imamp imingê sanab, uts angu da gamp Efrata imingê intap Kanan da irim nugu barabin tsiraê bingan da dzi i u rinanggam. Da dzi rim arangan i sanampun ringan fada Efrata” (nigi Betlehem). 8 Gubuê Israil raraba Yosef narun rusan marub igi da igutin, “Manga narun rusan igi?" 9 Da Yosef ini, “Ramangê! Mamaê iruê ani dzi narungê rusangê Anutu riman da dzi mingêa ani.” Da Israil ini, “Da wayu mamaê igi waba da dzi nafinti." 10 Gubuê arigi da Israil maran isap da watip tsanganda nam bini u, i arangan ifufi funub. Ibinigi da Yosef iyu narun rusan igi iba uts angu da ramanggan Yakop, da yari bangin ragun gin da itsutsuf. 11 Yakop ini ibiani da Yosef, “Dzi marangê wafur i tipa tsanganda agu maram u, da bitsintaê Anutu irim dzi sib i dzi tsanganda agu mpruêan da narum rusam." 12 Da Yosef ibibi narun rusan sinungê ramanggan Yakop da yidzaê fagan da itauf maran iruê intap imingê raman maran. 13 Yosef igif Ifraim i bangi bini da yusu ifa Israil bangi yas da igif Manase i bangi yas da yusu ifa Israil bangi bini, i arangan mamaê miamun. 14 Da bitsintaê Israil iraiê i bangin bini da ibarim ifa ragun i mamaê isiê Ifraim gudzun. Da iraiê i bangin yas da ibarim ifa ragun i mamaê miamun Manase gudzun. Ibinigi da Israil anungê yatsungê sanampun rima bangi bini ragun i mamaê miamun da gubuê rima mirimp. 15 Da ifinti Yosef ibiani, “Anutu aru mungê da dzi rumpunggangê Abraham da dzi ramanggangê Isak pumuêan ugu da mpada tayangê dzi da gubuê sib angu badan da bawaêan da gubuê aruani, 16 da Angira aru rima dzi sib i barabin mara maran sib angu nafinti mamaê marub iruê ani. Da bungê afaringê dzi binganggangê da rumpunggangê Abraham da ramanggangê Isak binganggan nayab i ribarangan, da yanginggan nautus i ruan nasu tsiraê namingê intap." 17 Gubuê Yosef tsanganda ramanggan rima bangin bini yaba Ifraim gudzun, da wangun i barabin gin, ibinigi da Yosef igif Yakop bangin da inang i raêa gin sinungê Ifraim gudzun da barima fada Manase gudzun. 18 Da ini, “Aêa ramangê! Nani mamaê miamun. Da warim bangim bini nayab i arangan gudzun." 19 Da bitsintaê Israil ibugin da ini, “Dzi sruê gin, dzi narungê! Dzi sruê gin i arangan yanginggan bungê awaê nasu garam utup tsiraê mangan nabinigi. Da bitsintaê arangan rainggan isiê ani yanginggan bungê awaê nayus arangan gan da nasu garam utup ampi bingan angu." 20 Ibinigi da Israil ifinti rib iruê igi da gubuê arigi ibiani, “Garam Israil nifun bungê agamp agu binganggam i nan fintidan da nani, ‘Anutu nafinti agam nabi Ifraim da Manase.’” I sanab igi da itangin Ifraim isu miamun i Manase. 21 Da Israil ini da Yosef, “Dzi su uts i mampan, da Anutu bungê arut agu da nau agu natip nafa u tafam rusam intapan. 22 Mamai fiririê Sikem igi dzi rim isu u nanggam, da dzi warim da u raim rusam u. Imaê. Dzi yis garam Amor i gangê bainatangê da dampa gangê i uda intap igi."