Miamun 9

1 Anutu ifinti Noa da narun rusan i nan ani da ini ibiani, “Warim narum rusam nayus, i gan yanginggan utusa i ruan da mpada sangêa intap santan. 2 Apu marantaêan mara maran sib angu mpada intap, tsiraê da isiê, dzufan da yungan da sruaka intap da mpada uruts wasaê bungê arat natsuarupin i agam da agam bungê asu wain i ribarangan. 3 Apu santan igi da dzi tangin da agam i agam gadan ibi bus yafan da nam gadan dzi riman da agam tafam rusam ugu. 4 Nam bitsintaê dzi paêa agamin ibiani: anungê gada apu biê rungê mingêa gin, i wain biê igi irim nam marantaêan. 5 Da bida garam mangan ma apu mangan yatsa garam manga biê gan rai, da dzi bungê arim nam mungaê da arangan nasangê i gan asuban nangan. 6 “Bida manga yatsa garam manga biê gan rai, da namamp i gan mungaê gan namingê garam gar banginggan, i arangan iyats garam Anutu tipa sangêa maraganunggan ugu biê gan rai. 7 “Mingêa agam da agam warim narum rusam nayus, i agam narum rusam yangin rusan utusa i ruan da mpada sisungêa sangêa intap santan." 8 Da Anutu ini da Noa da narun rusan ibiani, 9 “Waringantin! Aruani da dzi runggangê dzi ni udzuda nanggangê utusa i ruan gin da agam da yanginggam taptap 10 mpruêan da apu mara maran, dzufan da mpada intap, pagraê da buman, ruta agam mpruêa ruam waêa madzung ba igi, nampruê da apu santan narun rusan taptap nautus i ruan namingê intap nabinigi. 11 Dzi tangin nanggangê udzudan da agam ibiani: Dzi wasangê i tipa tanginda mpui tsiraê mangan i wayada intap mpruêan da nam marantaêan santan u, imaê." 12 Da Anutu ini, “Dzi tangin umpum impar i ruan imingê maraum isu bir i nan utusa i ruan gin, dzi nanga mingêa wasaê i dzi da agam da gam yanginggam taptap, mpruêa da apu sib angu mingêa intap, da bungê amingê ratar nanting angu. 14 Gubuê dzi tanginda maraum buafira intap da umpum bungê ampar i ruan namingê wasaê, 15 da dzi marangê bungê afur dzi nanggangê udzudan mpruêan da agam da apu marantaêan, i wasangê i mpui tsiraê tipa waêan da wayada nam marantaêan santan u. 16 Da bida gubuê dzi tsanganda umpum waêa maraum da dzi marangê bungê afur dzi nanggangê udzudan mingêa ratar tingan aru mingêa wasaê i dzi da nam marantaêan mara maran sib angu mpada intap." 17 Ibinigi da Anutu ini da Noa ibiani, “Watsangan! Nigi Dzi birangê nan utusa i ruan dzi tanginda muntida wasaê i dzi Anutu da nam marantaêan sib angu mingêa intap." 18 Noa narun rusan ruta mpruêa ruan waêa madzung ba ibiani, Sem, Ham da Yafet. (Da Ham isu Kanan ramanggan.) 19 Da garam mpada sangêa intap sib angu wainggan iruê Noa narun rusan iruê da bits igi gin. 20 Da Noa garam rafa gum da isu garam miamun i ntanga gum wain. 21 Gubuê mangan da arangan inum wain gurun arangan runggan ntangan da tipan da maran ididirunt da igingê ragi dangunt imingê ungaran wasaê. 22 Ham, Kanan ramanggan, yatangê ba da itsanga ramanggan gingêa ragi dangunt da itip iwaê ifan da ini da rain rusan iruê igi. 23 Sem da Yafet iyu bruê da igif i barun da ifa barun barun gin da ibuafir ramanggan sib. Tuasarangan irarab nam intiê i anungê tsanganda ramanggan ragi dangunt igi u. 24 Gubuê Noa maran dzidziwandan da iringant i nan narun bampa sib, Ham, nanggan tsanganda arangan gingêa utaê da fisagin. 25 Ibinigi da Noa ipupuarap da Ham narunggan ibiani, “Barabin tsiraê nais mara wafir i Kanan nanting. Da bungê asu rain rusan mamaê guman utaê angu." 26 Da itip ini, “Dzi natsarif Yawe, Sem Anutu gan. Kanan nasu Sem mamaê guman utaê angu. 27 Anutu nautus i Yafet yanginggan nawaê nasisungê da gan yanginggan narut Sem yanginggan nampruê ruan nampa bini, da Kanan nasu Yafet mamaê guman utaê angu." 28 Gubuê mpui tsiraê ntsupan da Noa itip impa isangê udzuf 350, 29 da mpruêa Noa udzufan mpadan da isangê 950 da arangan imamp.