Dzems 4

1 Nam idzuwai imingê wasaê i agam da inang agam wangum itsakia da isu ufuai da runggam? Nam santan waêan igi iruê i agam wangunggam akatsan ampi bingan da isu ufuai da ruan imingê agam wangunggam ruga rugan. 2 Agam ini uda nam fain da agam wayu u; ibinigi da agam inang i isa garam funub. Agam iyafi um, da bitsintaê anungê iwaê da nidzun u; ibinigi da agam isu ufuai da yis nam sanga sanga angu. Agam anungê iwaê rutin u, i wain ibiani: agam anungê igut i Anutu gin u. 3 Da gubuê agam guta gin da agam anungê iyu u, wain iruê i agam igutin ruta uwayantam maisan. I agam maram ifur runggam angu i rima runggam sib i nam intap ani gan. 4 Agam itangin Anutu rai ibi sagat maramais tanginda gabun rai da araraêa yungan. Da agam wasruê gin nabiani, manga maran arida i nam intap ani gan yusan, da ibugin Anutu. Da mangan nida suda rinun i nam intap ani gan, da irim ipiap i Anutu. 5 Maram wafur i nan akaran mungê, “Ganun Anutu tangindan mpada agi wasaê ugu da Arangan maran yari i suda Arangan runtaê gan angu.” Agam itsanga nan akaran igi ibi nan utaê, a? 6 Da bitsintaê Anutu maraampi gan rima agi sib da iyus; ibinigi da nan akaran mungê isantingê wasi ibiani, “Anutu imunti sib i rib tsarifa runggan da isu maraampi da rib rasuda runggan." 7 Nabinigi da agam watangê warangê i Anutu. Wamunti sib i Sadang, da arangan bungê arunt sinungê agam. 8 Wafa uts da Anutu da Arangan bungê aba uts angu da agam. Agam rib uwayant suda iruêrun da nanga asub yusan, watangin sanampun maisan rai da watip wangunggam i nam maisan anungê mingêa gin u. 9 Nugum wabarabin, warang, da wagampun runggam i nanggam maisan. Agam nanggam rubungêan nawaê abi nam rangan da nanggam nugun tsiaêan nawaê nasu nugu barabin. 10 Warasu runggam da Nifutsarif da Arangan bungê araê i agam nayab. 11 Raingê ruas, anungê rima ub i rainggam mangan u. Manga bida rima ub ma raruda rainggan mangan, da irim ub da iraru Nan Faidagin impruê. Da bida u raruda Nan Faidagin da u wasu garam atsungêa gin u. Imaê! U su garam raruda Nan Faidagin. 12 Nifutsarif runtaê angu isu garam rima Nan Faidagin da raruda garam. Arangan runtaê isangê i rima agi sib da siata agi rai. U nam idzuwai da u ni raruda rainggam mangan? 13 Waringantin, agam garam nangan da nida bida ani, “Aruani ma tataê mangan naga da aga bungê afa gamp igi ma gamp tsiraê aga, da nampa udzuf manga sib i nigi da nasub nam i waêa da moni tsiraê." 14 Agam anungê isruê i nam idzuwai bungê awaê da agam da tataê mangan naga. Agam nanggam mpada maran taêan isangê nam idzuwai? Agam isangê nam marabuari, imingê uts angu da intap ruan. 15 Ibinigi da agam dani dabiani, “Bida Nifutsarif maran furan, da aga bungê ampa marataê da nanang nam bida ani ma bida naga." 16 Da bitsintaê, agam itsarif runggam iyus angu i nam idzuwai agam bungê anang. Nam tsarifa ruan bida nigi santan, nigi sanab maisan. 17 Ibinigi da garam sruêa i uwayant bini i nangan, da mamida i nangan, da arangan inang asub sib.