Dzems 5

1 Agam rib nam bunump yusan ugu, agam waringantin! Warang da wayaiê wagampun runggam i nam tsakia ampi bingan bungê awaê da agam. 2 Agam nam bunumpam bungê amais da afaif bungê agara agam nanggam atsufan tatar. 3 Agam nam bunumpam silva da gol bungê amais. Gubuê buntun isu uts wa da agam yufum nam bunump ampi bingan da imami faban. Da nam mingêan da maisan igi bungê ani agam nanggam maisan wasi namingê Anutu maranggan da bungê arim agam nafa dzaf. 4 Waringantin! Agam anungê irim garam nanga gum safa wit nidzun mingêa agam gumam ugu nam ntsuman gan u. Ibinigi da nam ntsuman igi irang inuê Anutu i rima nam mungaê da agam. Da Nifutsarif Anutu, Garam ruta nampang wain, iringant i garam gum nanggan rangan igi sib. 5 Agam impa iyab i nam santan da isirungê runggam i nam bini bini santan. Agam isirungê riniuriatsam da itip iduduba iwaê ngarubini angu nafa nasangê waêa i gubuê gan isa agam funub. 6 Agam idzur nan da yis garam rururungan mamida i muntida sib i runggan funub. 7 Raingê ruas, waaba i ruam da wabuaringê barabin nasangê Nifutsarif Yisu Kristus gubuê gan tipa badan. Wau uwayantin nabiani, garam ntanga nam yamun sib i guman yaba i ruan angu da impa ifangê i gamiê ruêa gin da gubuê arida gin, da raiyi da imus uda nidzun. 8 Agam ibinigi, waaba i ruam da wamunti babampaf, i Nifutsarif Yisu Kristus gubuê gan badan iba su uts wa. 9 Raingê ruas, anungê pusupusan da nida nan barungantsang i ruam u, i Anutu runggan bungê araru agam. Watsangan, Garam raruda garam iba munti muantsi nifun sib wa. 10 Raingê ruas, profet ruas nida Nifutsarif nanggan ugu isantingê agi i sanampun abada i ruan da buaringêa barabin da nam tsakia. Agi nau uwayant nayabin da natsungê gin nabinigi angu. 11 Agi tsangan sib wa i Nifutsarif ifinti rib muntida babampafan da buaringêa barabin. Agam isruê gin sib i Dzob ibuaringê barabin santan waêa da arangan ugu, da raiyi da Nifutsarif ifinti arangan i nam ampi bingan. Nifutsarif igi Arangan Garam maran aridan da maran ntuêan. 12 Da bitsintaê, raingê ruas, waringantin! Anungê faringêa gunungun ma intap ma nam fain i rima agam nanggam nidan sib u. Anungê nida bida ani, “Nan nidzun bingan da wagungê.” Bida agam nida, “Hai,” da nan arangan nigi, ma bida agam nida, “Imaê,” da nan arangan nigi. Agam nida nan da wani nan nidzun angu, i bida maêan da Anutu bungê araru agam. 13 Bida mangan mingêa wasaê i agam da waêan da barabin, da naugin. Bida mangan nugun tsiaêan da nais mint nugun tsiaêan i tsarifa Nifutsarif binganggan. 14 Bida mangan mingêa wasaê i agam waêan da rinin gingêan, da nau garam gudzun rusan mingêa wasaê i ampan mararam naba. Da garam gudzun igi naugin da Nifutsarif, da nayats madamin i garam gingêa rinin igi rininggan i Nifutsarif binganggan. 15 Da ribigi nanggan udagin fada mpruêa da nanggan muarutsan da bungê anang garam rinin gingêan igi rinin nadaum, da Nifutsarif bungê araê i arangan. Da bida arangan nanga asub, da Nifutsarif bungê asiat i nanggan maisan rai. 16 Nabinigi da wafis i nanggam maisan wasi da runggam da waugin i runggam i agam waêa bini. Garam rururungan nanggan udagin da Nifutsarif da isu nampang da inang nam iwaê isu nidzun. 17 Eliya igi arangan garam gar ibi agi, da arangan yugin da wangunggan santan i gamiê anungê isangê mudan u. Da gamiê anungê iruê isangê udzuf iruê da bits da ifawaê wasaê udzuf manga gan. 18 Raiyi da arangan itip yugin i gamiê ruêan da gamiê iruê, da nam santan mingêa intap iyab da ikap nidzun. 19 Raingê ruas, bida agamam manga runta intiê i nan nidzun, da manga tipa uda waêa ba, 20 da maram wafur nan ani, bida mangan uda garam nanga asub sinungê sanab asuban, da bungê arim arangan ganunggan sib i nam mampan. Da Nifutsarif bungê asiat i nanggan maisan santan rai.