Yowanis 15

1 “Dzi bruê wain nidzun bingan, da dzi Ramanggangê isu garam mpada tayangê gum. 2 Da bangin narun narun mingêa wasaê i dzi mamida kapa nidzun, da Arangan irab rai. Da bangin kapa nidzun, da Arangan inang da itrap da idzuwar in i nanga bangin igi kapa yusan. 3 Da nan dzi nidan da agam ugu inang agam isap sib ibi bruê bangin garam dzuwara gin. 4 Agam wantungê ba i dzi da dzi nantungê biaê i agam. Bida bruê bangin mamida i antungêa ba i bruê wain, da anungê isangê kapa nidzun. Ibinigi angu i agam mamida antungêa ba i dzi da rumpada wasaê i dzi, da agam wasangê i kapa nidzun mangan u. 5 “Dzi bruê wain, da agam isu bruê wain bangin. Manga antungêa ba i dzi da dzi antungêa biaê i arangan, da bungê akap nidzun ampi bingan. Da bida agam tirida dzi rai, da agam wasangê nanga nam mangan u. 6 Bida garam mangan mamida antungêa ba i dzi, da iwaê ibi bruê bangin maringêan garam sirida mpruêan da tapuda fada dzaf. 7 Bida agam antungêa ba i dzi da dzi nanggangê mingêa wasaê i agam, da bida agam maram arida i nam idzuwai da wagutin, da Ramangê bungê anang nawaê da agam. 8 Bida agam kapa nidzun ampi bingan, da bungê asantingê abi agam rib atsungêa i dzi. Da sanab bida nigi bungê arim bingan tsiraê da dzi Ramanggangê. 9 “Ibi Ramangê maran arida i dzi, da dzi marangê yari i agam ibinigi. Gubuê sib angu da agam wampa dzi marangê aridagin wasaê. 10 Bida agam atangêa warangê i dzi nanggangê, da agam bungê ampa dzi nanggangê marangê aridagin wasaê, nabi dzi yatangê warangê i Ramangê nanggan da dzi mpa arangan nanggan maran aridagin wasaê. 11 Dzi ni nan igi da agam i dzi nanggangê nugungê tsiaêan uriêa mingêa agam wangum da sisungêa agam wangunggam yusan angu. 12 Dzi nanggangê faidagin ibiani: Maram wari i ruam nabi dzi marangê yari i agam. 13 Bida garam rima runggan rai i rima rinun rusan sib, da nam maran aridan bida nigi iyus nam maran aridan santan. 14 Agam isu dzi rinungê rusangê bida agam atsungêa dzi nanggangê faidagin. 15 Dzi anungê rungê ifaringê agam ibi mamaê gum utaê angu u, i mamaê gum utaê anungê isruê i gan garaman tsiraê guman nangan u. Dzi faringê agam ibi dzi rinungê rusangê, i nan santan dzi ringantagin mingêa Ramangê gin ugu, dzi ni wasi da agam sib wa. 16 Agam waraga dzi u, imaê! Dzi raga agam, da dzi rim gum da agam i fadan da kapa nidzun da nidzun igi mingêa ratar. Agam nanga bida nigi da nam idzuwai agam guta gin i dzi binganggangê, da Ramangê bungê arim da agam. 17 Da dzi nanggangê faidagin ibiani: Maram wari i ruam. 18 “Bida garam intap rima ipiap i agam da maram wafur i ribigi irim ipiap i dzi isu miamun mungê. 19 Bida agam suda garam intap ani gan, da maran bungê ari i agam da nau agam nayab nasu i gan. Da bitsintaê agam anungê isu i gan u; dzi runggangê iraga agam iwaê ba sinungê ribigi. Ibinigi da ribigi irim ipiap i agam. 20 Maram wafur nan dzi nidan da agam ugu: ‘Mamaê gum anungê yusa gan garaman tsiraê u.’ Bida ribarangan nanga maisan i dzi da bungê anang maisan i agam nabinigi. Da bida atangêa warangê i dzi nanggangê fisagin da bungê atangê warangê i agamam nabinigi. 21 Bungê anang nam maisan igi i agam, i wain agam isu dzi gangê. I ribigi anungê isruê i Ramangê aru tanginda dzi badan ugu u. 22 Bida dzi damami badan da ragida Ramangê sisingê gan wasi, da ribigi wasangê i mpada warangê i nam raruda i nanggan maisan u. Da bitsintaê dzi ba da dzi ragi Ramangê sisingê gan sib da ribigi wa, da ribarangan wasangê i nida nan mangan da gubuê Anutu raruda ribarangan u. 23 Garam rima ipiap i dzi da irim ipiap i dzi Ramanggangê ibinigi. 24 Bida dzi damami nanga nam maran mangan garam mamida i nanga mungê, da ribigi wasangê i mpada warangê i nam raruda i nanggan maisan u. Da bitsintaê ribigi itsangan nam dzi nangan sib wa, da irim ipiap i dzi da Ramangê ibinigi. 25 Da bitsintaê nam igi iwaê isu nidzun isangê nan kakaran mingêa ribigi Nanggan Faidagin: ‘Ribarangan irim ipiap i dzi utaê angu ruta wainggan maêan.’ 26 Marapayam aru rima agam sib igi irut Ramangê impai, da dzi bungê atangin nabiaê da agam. Arangan Marapayam santingêa nan nidzun wasi. Da gubuê Arangan badan, da bungê ani dzi wasi. 27 Da agam ibinigi, wani dzi wasi nabinigi i agam irut dzi impruê ruangê yungan da arugu iba isangê waêan da aruani.