Yowanis 3

1 Garam Farisai mangan binganggan Nikodimus, garam Yuda garam gudzunggan mangan. 2 Da idziang mangan da arangan iba da Yisu da ini binaê, “Rabai, aga sruê gin i Anutu itangin agu iba ibi kidungwaga. I bida Anutu mamida i ruta garam mangan, da garam arigi wasangê i nanga nam maran mangan bida agu nangan igi u." 3 Yisu ini arangan nifunggan mungaê ibiani, “Dzi nani nan nidzun bingan da agu, manga wasangê tsanganda Anutu nanggan mpada tayangê gan garaman bida mamida i tipa apingêa arangan suda faê." 4 Nikodimus itip igutin ini binaê, “Amaê! Nabutip napingê garam fufidan nasu faê nabianungê? Isangê aranga tipa atangêa rinan wangun wasaê da tipa apingêa arangan, ma?" 5 Yisu itip ini da arangan ibiani, “Dzi nani nan nidzun bingan da agu, manga wasangê atangêa Anutu nanggan mpada tayangê gan garaman bida mamida apingêa arangan suda faê i mpui da Marapayam Mararam. 6 Nam riniuriats riman da nigi riniuriats. Da nam Marapayam Mararam riman da nigi marapayam rima maran taêan. 7 Anungê runta fafun i nan dzi nidan da agu bida, ‘Agam natip nasu faê nabi mamaê narun rinan apingêan.’ 8 Manis irunt isangê gan fadagin da u ringant i gan ririringgan angu, da bitsintaê u wasruê i gan badagin ma gan fadagin u. Da iwaê ibinigi angu i rib Marapayam Mararam rima suda faê." 9 Da Nikodimus igutin ini binaê, “Nigi nabuwaê nabianungê?" 10 Yisu ini i gan nifunggan mungaê ibiani, “Agu garam Israil kidungwaga gan mangan, da ibianungê da agu anungê isruê i nam bida ani? 11 Dzi nani nan nidzun bingan da agu, aga fis i nam aga tsangandan da sruêa gin da aga ni wasi da agam, da bitsintaê agam wau nan aga nida wasi igi iyab u. 12 Dzi ragi nan da agam i nam intap, da bitsintaê agam wamuaruts u. Da agam bungê abumuaruts dzi nabianungê bida dzi fisa i nam gunungun wasi da agam? 13 Garam mangan anungê iwarip iyab gunungun u; imaê, Garam Narunggan runtaê angu aru mingêa gunungun ruêa ba. 14 Moses iraê i mur maraganun tipa i ain bras iyab gai imingê nam manaê dadauntan, da nabinigi da naraê i Garam Narunggan, 15 i rib santan aru muarutsa Arangan da bungê awaê da nam mpada ratar ntingan angu. 16 “I Anutu maran yari i garam intap i sanab bida ani: itangin Narun yampi bitsintaê iba, i rib santan aru muarutsa Arangan da wasangê i rima runggan rai u, da bitsintaê bungê awaê da nam mpada ratar ntingan angu. 17 Anutu itangin Narunggan igi iba intap i anungê raruda garam intap u, imaê. Itangin iba i rima garam intap sib. 18 Nugu muarutsa Arangan da anungê imunti nan rarudan wasaê u, da nugu mamida i muarutsa Arangan da impa nam rarudan wasaê sib, i arangan anungê imuaruts Anutu Narun yampi bitsintaê igi u. 19 Nan rarudan sanaban ibiani, Anutu nanggan puatsadan iba sib intap, da bitsintaê garam intap maran yari i nam mimindan iyus nam puatsadan, i nanggan maisan nangan isu gudzu-fugun i ribarangan. 20 Garam musa nanga nam maisan ibugin nam puatsadan da wabasu uts rutin u, i arangan irat i nam puatsadan makupis i nanggan maisan wasi. 21 Da bitsintaê garam atangêa warangê i Anutu nanggan nidzun iba mpa nam puatsadan wasaê, i garam santan tsanganda bida arangan inang nam i Anutu nampanggan." 22 Gubuê fain ifa sib da Yisu irut riban atsungêa gin itangin gamp tsiraê Yerusalem rai da ifa intap Yudia gampan isiê fain. Da irut ribarangan impai igi da irurub ampan. 23 Yowanis ibinigi irurub garam imingê gamp Ainon mingêa uts da gamp Salim, i mpui tsiraê imingê nigi. Da ampan ampi bingan imus iba rutin i arangan ruruba ribarangan. 24 I gubuê arigi da Herot anungê iwarip irim Yowanis i karabus u. 25 Da nan udzungêan da ruan iwaê wasaê i Yowanis riban atsungêa gin da garam Yuda bits iyab i sanab adzuêa ruan i nanga wangun sapan mingêa Anutu maranggan. 26 Da tuasarangan iba da Yowanis da ini rutin ibiani, “Rabai, garam u ruta mpruêa ruam mingêa mpui Yordan marafain, da u nida nan wasi gin ugu, aitsangan, arangan irurub garam da aruani, da rib ampi bingan ifan da arangan." 27 Yowanis ini tuasarangan nifunggan mungaê ibiani, “Bida Anutu mpada gunungun mamida i rima nam mangan da garam mangan, da arangan wasangê nanga nam igi u. 28 Agam runggam iringantin sib i nan dzi nida bida ani, ‘Dzi Kristus wayu, da bitsintaê Anutu itangin dzi imungê iba i Arangan.’ 29 Bida garam mangan uda finin, da sagat igi su garam igi fininggan rururungan; anungê garam mangan gan u. Da garam bintsudan igi rinunggan imunti da iringant i arangan nifunggan da nugun itsiaê nidzun angu i arangan. I wain arigi da dzi nugungê itsiaê iyus da aruani. 30 Arangan binganggan nayab da dzi binganggangê naruê." 31 Garam mingêa wagungê badan ugu iyus garam gar sib angu. Garam gar intap ani yatsungê sanab intap da ini nan intap ani angu gan. Da bitsintaê garam mingêa gunungun badan ugu iyus ampan sib angu. 32 Arangan ikupis nam Arangan tsangandan da ringanta gin wasi, da bitsintaê manga wau nan kupisan igi iyab u. 33 Da bida manga uda Arangan nanggan igi yaban da muarutsan, da isantingê ibi Anutu nanggan igi nan nidzun. 34 I garam aru Anutu tanginda badan ugu ini Anutu nanggan wasi da garam, i Anutu itangin Marapayam Mararam ifungê isisungê Arangan sib. 35 Da Raman maran yari nidzun angu i Narun igi da irim nam sib angu i Arangan banginggan. 36 Manga muarutsa Narun igi da bungê awaê da nam mpada ratar ntingan. Da manga mamida i atangêa warangê i Narun igi nanggan wasangê waêan da nam mpada maran taêan u, da bitsintaê Anutu nugu tsakia gan rubungê amingê da arangan.