Yona 1

1 Yawe irim nan da Amitai narunggan Yona ibiani, 2 “Wauriê wafa gamp tsiraê Niniwe da wani nan babampafan da garam gamp igi, i Dzi tsanga ribarangan nanggan maisan ampi bingan nangan, da Dzi bungê araru." 3 Da bitsintaê Yona yuriê da ifa sanab rugan fada gamp Tarsis i runta sinungê Yawe. Ibinigi da arangan iruê gamp Dzopa mingêa uruts ringampa da iwaê da madzung mangan nida fada Tarsis. Da irim moni gin da iyabin i runta sinungê Yawe. 4 Da bitsintaê Yawe itangin fifing tsiraê iwaê uruts wasaê, da mpui isu iyamiyam da inang i branga madzung. 5 Garam runta i madzung irat da inuê gan anutu umpuran ruga rugan i rima sib. Da ribarangan itatapu nam bunump ararai iruê uruts i nanga madzung puapapan. Da bitsintaê Yona iruê madzung igi wasaê gan da igingê marampruê mungê raiyi. 6 Garam gudzun madzung gan ifawaê da Yona da ini rutin ibiani, “Amaê! U bugingê ibinigi? Wauriê da waugin da anutu gam! Mani arangan maran bungê agaib agi da narim agi sib i agi anungê mampan u." 7 Da garam runta i madzung igi ini da ruan, “Agi antungêa rarub i kupisa wasi garam idzuwaarigi su wain i barabin tsiraê waêan da agi ani.” Da ribarangan yantungê rarub, da rarub ikupis Yona binganggan wasi. 8 Da ribarangan igut i Yona ini binaê, “Wani da agai! Mabi u su wain i barabin waêan da agi ani? Da agu nang gumam idzuwai? Da u ba imingê anungê? Da u garam utup idzuwai?" 9 Da Yona ini da ribarangan ibiani, “Dzi garam utup Hibru, da dzi pumuê Yawe, Anutu mpada gunungun tanginda intap da uruts. 10 Da dzi runt sinungê Arangan.” Gubuê ribarangan ringanta gin da irat nam tsiraê bingan angu da ini da Yona, “U nang asub tsiraê bingan angu!" 11 Da fifing da uruts iyamiyaman igi iyingê ifa i suda tsiraê bingan. Ibinigi da ribarangan igut i Yona, “Aga nanga bida anungê i agu da uruts ani ntungan?" 12 Da Yona ini binaê, “Waraê i dzi da watapu dzi naruê uruts, da uruts bungê antung. Dzi sruê gin i dzi asubangê igi da fifing tsiraê bingan ani iwaê da agam." 13 Da bitsintaê ribarangan yintsaê riniurun gan i tsariêa madzung igi fada ringampa da inang itsiri, i fifing da uruts irunt tsiraê bingan iyus miamun ugu da ingaungê i gan fadan. 14 Ibinigi da ribarangan iyugin da Yawe ini binaê, “O Yawe! Aga gampun runggangê da Agu. Bida garam ani asuban maêan, da anungê rima nam mungaê da agai i arangan nanggan mampan u. Da anungê raruda agai bida U raruda garam yatsa garam biê gan rai u, i wain, Agu, O Yawe, U rim barabin ani da agai, yatsungê U rugam uwayantam." 15 Ida garam runta i madzung iraê i Yona da itapu iruê uruts, da uruts iyamiyam tsiraê intung. 16 Ribarangan itsanga Yawe nampanggan da irat tsiraê bingan angu i Arangan, da itsara nam da itaga ruan i nanga nam fain da Yawe. 17 Da Yawe itangin yafas tsiraê mangan iba da intap i Yona. Da Yona igingê yafas wangun wasaê isangê gubuê da idziang iruê da bits.