Lukas 14

1 Gubuê Sabat mangan da Yisu ifa i gada nam mingêa garam gudzun Farisai mangan ungaran. Da ribarangan itsanga Yisu ragun i bungê anang nam faingê. 2 Da garam mangan fagan da bangin fupan impa Arangan maran. 3 Da Yisu igut i rib Farisai da garam gudzupuê i nan faidagin, “Amaê, nan faidagin ini i isangê i nanga garam gingêa rinin dauman da gubuê Sabat, ma imaê?" 4 Da bitsintaê tuasarangan ibugin nida nan mungaê da impa frap nufan angu. Da Yisu igif garam ugu da rinin idaum da Arangan ini da ifan. 5 Da Yisu igut i ribarangan, “Bida agam mangan narunggan ma makau gan mangan ruaêa ntsuf guntiê bingan da gubuê Sabat, da arangan anungê isangê uriêa sung angu i fada i dzungêa gin yaban, ma?" 6 Da ribarangan wasangê i nida nan mungaê u. 7 Yisu itsangan ampi waêa i gada nam igi da yus-yusa ruan i mpada mumai miamun. Da Arangan ini nan raman ani da ribarangan: 8 “Bida rib fain rima nan i agu i fada i nam gadan bingsuda i garam da sagat uda ruan, da anungê mpada mumai miamun u. I bida nuêa garam mangan tsarifa yusa agu mpruêan, 9 da garam wain nuêa agam igi bungê aba da nani da agu, ‘Wauriê i mumai igi da aruani nampa gin.’ Da u bungê auriê nafa mpa bampan ruta rini miaê. 10 Da bitsintaê bida rib fain nuêa agu da wampai mumai bampan bingan. I bida garam nuêa agu igi badan da tsanganda agu, da bungê ani, ‘Raingê, wauriê da wamungê afa mumai bini aga.’ Bidanigi mingêa rib santan mpadan igi marangan da bungê atsarif agu. 11 Garam tsarifa runggan da Anutu bungê arasu arangan da garam rasuda runggan da Anutu bungê araê i arangan." 12 Ida Yisu itip ini nan da garam nuêa Arangan badan ibiani, “U nida suda nam gadan tsiraê mangan, da anungê nuêa rinum rusam, ma raim rusam, ma rini gisinggam, ma garam nam bunump mpada uts da agu u. Bida u nanga bida nigi, da ribarangan mani bungê atip anang nam igi mungaê da agu. 13 Da bitsintaê bida u nida suda nam gadan tsiraê da warim nan i garam sauda runggan, da garam ngump bigruê, da garam gasriêan, da garam maran gampaman. 14 Da nugum watsiaê i ribarangan anungê isangê i rima nam mungaê da agu. I wain ibi Anutu bungê arim nam mungaê da agu da gubuê garam muarutsan santan muntida marataê." 15 Garam ruta Yisu gada nam igi gan bits iringant i nan igi da ini da Yisu, “Rib aru gada nam mingêa Anutu nanggan mpada tayangê gan garaman igi nugun natsiaê." 16 Da Yisu ini nan mungaê ibiani: “Garam mangan ini gada nam tsiraê da irim sisingê i garam ampi bingan. 17 Waêa gubuê gada nam da arangan itip itangin mamaê guman mangan ifa i nida nan da rib aru rima nan gin ugu, ‘Agam waba, i itip nam gadan sib.’ 18 “Da bitsintaê ribarangan ini nan gaiba ruan mara maran i mamida i badan. Miamun ini, ‘Dzi nagaib runggaê i dzi bungê iyu intap gum faê mangan da dzi nafa tsangan, ibinigi da dzi wasangê i biaêan u.’ 19 “Da mangan ini, ‘Dzi bungê iyu makau 10 i nanga gum in, da dzi bungê afa intsaê ribarangan i nanga gum. Da wafa ni dzi nanggaê gampunda ruangê igi.’ 20 “Da mangan ini, ‘Dzi gampun runggangê da agu i dzi bungê iyu fininggaê da dzi wasangê i biaêan.’ 21 “Da mamaê gum itip iba da ifis i nan santan igi da garam gudzun gan. Da ungar rinunggan igi nugun itsakia wasi da itip iwat mamaê guman da ini, ‘Wafa sung sanampun tsiraê da isiê mingêa gamp da wais bangim i garam sauda runggan da garam faga bigruê da maran gampaman da gasriêan.’ 22 “Raiyi da mamaê gum itip iba da ini, ‘Tsiraê, nan idzuwai u nidan, da dzi nang sib, da bitsintaê mumai rumingê.’ 23 “Da garam gudzun ini da mamaê guman, ‘Wafa sanab tsiraê da sanab mingêa gum wasaê, da wani da rib fain u waêa rutin da naba i dzi ungarangê fungêan. 24 Dzi nani da agam, garam tuas aru dzi nuêa mungê ugu gan mangan wasangê i ntanga nifun i dzi nam gadan gaê igi.’" 25 Utup tsiraê bingan yatsungê Yisu da Arangan iparim i ruan da ini da ribarangan, 26 “Bida mangan nida atsungêa dzi, da mamida buginda gan ramanggan da rinanggan da fininggan da narun rusan da rain rusan da nafun rusan da mamida nida mais i runggan, da arangan wasangê i suda dzi garamangê atsungêa i dzi. 27 Garam mangan mamida buaringêa gai mpara i ruan gan da atsungêa dzi, da anungê isangê i suda dzi garamangê atsungêa i dzi u. 28 “Bida agam mangan maran furan i rima ungar guntiê antungêa yaban, da arangan nampa mungê da narants uwayant i ungar igi nam bunumpan, i tsanganda bida moni gan isangê i ntsupa ungar igi sib ma imaê. 29 Da bida arangan mamida nanga bida nigi, da arangan rafa dubung sib da sintunga uru angu da mamida ntsupa ungar igi sib, da rib santan tsangandan igi bungê arubungê arangan da bungê ani da ruan, 30 ‘Garam aruani buni rima ungar da moni gan imaê i ntsupa sib.’ 31 “Ma bida king manga garaman singaari 20,000 bada i ruta king manga garaman singaari 10,000 isa ruan, da king garaman singaari 10,000 natip nan mungê i sruêagin bida garaman singaari isangê i muntida mungê i garam singaari 20,000 igi ma. 32 Bida arangan tsanganda runggan bida mamida sangêan, da aru garam ipiap rumingêa guntiê badan, da arangan natangin garam yafada nan nafa i tipa nan mpada bini. 33 Ibinigi da u wasangê i suda dzi garamangê atsungêa i dzi bida u mamida i tanginda nam bunumpam santan intap ani rai. 34 “Iriê igi nam ngarubini bingan. Da bitsintaê bida gamiê adzuêan da giriripan gan maêan, da wasangê tipa nanga nam manga i iriê igi i tipa giriripan u. Imaê. 35 Da iriê giriripan maêan igi da anungê isangê i rima intap ma nam ragin ufuman sib i suda nagaran. Imaê, bungê atapu rai. Rib ringa bampun gan ringantagin mingêan da narim ringan i nan igi bini."