Lukas 7

1 Gubuê Yisu fisa i nan igi da garam ringantagin sib da Arangan ifa Kapenaum. 2 Da mingêa gamp igi garam singaari Rom gudzunggan mangan impai, da garam guman mangan arangan maran arida gin yusan igingê rinin da inang i mampan. 3 Da gubuê arangan ringanta i Yisu sisingê gan, da arangan itangin garam gudzun Yuda fain ifa i guta i Yisu i batipa i garam guman rininggan. 4 Gubuê rib Yuda igi fawaêan da Yisu da ribarangan igampun ruan iyus da Arangan i rima sib, da ini, “Garam aga garam bini i u rima sib, 5 i arangan maran yari i agi utup Yuda da iraf aga ungarangê mpruêa ruan gin." 6 Ibinigi da Yisu irut ribarangan ifan. Da gubuê ribarangan basuda uts, da garam singaari gudzunggan igi itangin rinun rusan fain ifan da isu i nifunggan da ini da Yisu, “Nifutsarif, agu anungê rima barabin da runggam i dzi nanggangê. Dzi anungê garam bini i u bada dzi ungarangê u. 7 Nan wain aru nigi da dzi runggangê anungê iba i tsanganda agu u. Da bitsintaê wani nan angu da dzi mamaê gumangê rinin nadaum. 8 I dzi ibinigi, dzi garam mpada warangê i garam gudzun fain nampanggan, da dzi mpa tayangê garam singaari fain. Bida dzi nidan da mangan, ‘Wafan,’ da ifan, ma ‘Waba,’ da iba. Da dzi mamaê gumangê ibinigi, dzi nidan, ‘Wanang wabiani,’ da inang ibi dzi nidan." 9 Gubuê Yisu ringantagin da Arangan irunt fafun gin, da iparim i ruan da ini da ampi santan atsungêa Arangan igi ibiani, “Dzi nani da agam, dzi anungê itsanga nam muarutsan tsiraê bida ani mingêa wasaê i garam Israil santan u." 10 Da rib aru fa nida nan da Yisu ugu itip ifawaê ungar, da itsanga mamaê gum rinin iwaê bini sib. 11 Maiê mangan da Yisu ifa gamp mangan binganggan Nain, da gan riban atsungêa gin da ampi tsiraê irut Arangan impruê ruan ifan. 12 Gubuê Arangan fasuda uts da muantsi nifun atangêa fada gamp igi, da rib ibuaringê garam mampan iwaê ba. Sagat yaruf mangan narunggan bitsintaê arangan igi. Da ampi tsiraê gamp igi irut sagat igi iba impruê. 13 Gubuê Nifutsarif tsanganda sagat igi da igaib arangan da ini rutin, “Anungê rangan u." 14 Ida Yisu iyung ifa rim bangin i tiriang badzab gingêa gin igi, da rib buaringêan imunti untras angu. Da Arangan ini, “Mamaê rini faê, dzi nani da agu, wauriê wayab." 15 Da garam mampan igi itip impai iyab da itip ini nan, da Yisu iyu arangan itip ifa da rinanggan. 16 Da ribarangan irat da nugun isantan ruan da itsarif Anutu. Da ribarangan ini, “Profet tsiraê mangan iwaê wasaê i agi. Anutu iba i rima ampan gan sib." 17 Yisu sisingê gan raêa i garam igi ipuê idzarang isangê garam Yuda intapan santan da intap fain mingêa manaê impruê ibinigi. 18 Yowanis riban atsungêa gin ifis i nam santan Yisu nangan igi da arangan. Ibinigi da Yowanis inuê garaman atsungêa gin iruêrun ba 19 da itangin ifa i guta i Nifutsarif bida ani, “Mani agu Garam aru Anutu ragadan i badan ugu aruani, ma aga rungê rima marangê i garam mangan?" 20 Gubuê garam igi fawaêan da Yisu da ribarangan ini, “Yowanis Ruruba Garam itangin agai iba i guta i agu bida ani, ‘Mani agu Garam aru Anutu ragadan i badan ugu aruani, ma aga rungê rima marangê i garam mangan?’" 21 Da gubuê arigi rururungan da Yisu itip garam rinin gingêan mara maran ampi bingan, da rib marapayam maisan yantsangan, da maran gampaman iwaê bini. 22 Ibinigi da Arangan itip ini nan mungaê da garam uda sisingê igi ibiani, “Agam watip wafan da wani wasi da Yowanis i nam idzuwai santan agam tsangandan da ringantagin. Maran gampaman itip itsanga nam ratar, da ngump bigruêan itip iyung bini, da rib diginting tirida gin iwaê bini, da ringan putidan iringant i nan, da mampan imunti marataê, da garam sauda runggan iringant i Sisingê Bini. 23 Da garam idzuwai uwayantan mamida suda iruêrun i dzi, nugun natsiaê." 24 Gubuê Yowanis garam sisingê gan fada sib da Yisu ifis i Yowanis nanggan da garam utup tsiraê igi ibiani, “Agam ibufa nam manaê dadauntan i tsanganda nam idzuwai? Agam ifa i tsanganda garam mamida muntida babampafan bida sai yafan manis isa gin da fada badan? Imaê. 25 Da agam ifa i tsanganda nam idzuwai igi, garam atsufa nam fafusan griêgriêan bini? Imaê. Rib atsufa nam mara kakar bini da mpada bini angu impa king ruas ungaran. 26 Da bitsintaê agam ifa i tsanganda nam idzuwai? Profet mangan? Hai, dzi nani da agam, Yowanis iyus profet ruas santan. 27 I nan kakaran mungê ugu intuang nan i arangan ibiani, ‘Dzi bungê atangin garamangê rima sisingê namungê i agu i tipa sanab mungê i agu.’ 28 Dzi nani da agam, garam santan sagat apingêa mingêa intap gan mangan wayus Yowanis u. Da bitsintaê garam utaê bingan maêan mangan mingêa wasaê i Anutu nanggan mpada tayangê gan garaman iyus Yowanis. 29 Gubuê garam uda takis da garam santan ringanta i Yowanis nanggan fisa gin ugu da iyu mpui ruruban imingê Yowanis banginggan da nigi isantingê ibi imuaruts Anutu uwayantan igi irururung. 30 Da bitsintaê garam Farisai da garam gudzupuê i nan faidagin ibugin i atangêa warangê i Anutu nanggan rantsa sib i ribarangan, da anungê iyu mpui ruruban imingê Yowanis banginggan. 31 Da yangin gubuê aruani iwaê ibianungê? Ma dzi nabu ram ribarangan da nam idzuwai? 32 Ribarangan isangê mamaê narun narun mpruêa maran maket wasaê da nuêa fada badan da nuêa bida ani, ‘Aga rab simpup da agam wangump u, da aga is mint badzab da agam warang u.’ 33 I sanab bida nigi da Yowanis Ruruba Garam iba da anungê iga bret da inum wain gurun u, ida agam ini marapayam maisan yantsanga arangan. 34 Da Garam Narunggan iba da igan da inum da agam itsangan da ini, ‘Garam gada nam da numa wain yusan igi, da nigi garam uda takis da garam asub rinunggan igi i.’ 35 Agam ini ibinigi, da bitsintaê rib atsungêa Anutu nanggan isantingê ibi Anutu mararuru gan igi nan rururungan." 36 Farisai mangan irim nan i Yisu i ruta gada nam; ibinigi da Yisu ifa Farisai igi ungaran da igingê iruê i bangin yas i gada nam yatsungê ribigi sanaban. 37 Da sagat asub mangan impa gamp igi. Da gubuê arangan ringanta i Yisu gada nam mingêa garam Farisai igi ungaran, da arangan iyu gur bini madamin gaunt bini yusan. 38 Da arangan ifa munti uts Yisu fagan, da irang da maragurun itsururuê iruê i Yisu fagan. Da yidzaê fagan iruê da itias i gudzu yafan gan da itsutsuf i fagan da iyats madamin iyab in. 39 Da Farisai aru rima nan i Yisu ugu gubuê tsanganda nam sagat nangan igi da ini i unggan, “Bida garam ani profet nidzun da madasruê i sagat idzuwai aru gifa arangan ani, i arangan sagat asub." 40 Da Yisu ini da garam Farisai igi, “Saimon, dzi ni nida nan mangan da agu.” Da Saimon ini, “Kidungwaga tsiraê, wani." 41 Da Yisu ini, “Garam iruê iyu nam ntsuman imingê garam nam bunump manga gin. Manga yu 500 da manga yu 50. 42 Da rib iruê igi moni gan imaê i tipa rima nam ntsuman igi mungaê gan. Ibinigi da garam igi isiat nam ntsuman rib iruê igi udan rai. Da rib iruê igi mangan maran bungê ari i arangan nayus?" 43 Da Saimon ini, “Dzi marangê ifur i garam uda nam ntsuman tsiraê bingan da garam nam bunump siata rai.” Da Yisu ini, “U ni nan rururungan." 44 Da Yisu yitam i ruan ifan da sagat igi da ini da Saimon, “Amaê, u tsanga sagat aruani? Dzi yatangê ba ungaram da u anungê irim mpui i dzi adzuêa fagangê gin u. Da bitsintaê arangan yadzuê dzi fagangê i maragurun gan, da itias i gan gudzu yafan gan. 45 Da agu anungê itsutsuf dzi u, da bitsintaê gubuê dzi atangêa ba ungar da sagat aruani itsutsuf dzi fagangê gubuê guntiê bingan. 46 Da agu anungê irim madamin i dzi gudzungê u, da bitsintaê arangan iyats madamin gaunt bini i dzi fagangê. 47 Ibinigi da dzi nani da agu, dzi tias arangan nanggan maisan ampi bingan ugu rai, ibinigi da arangan isantingê nam maran aridan tsiraê bingan. Da bitsintaê garam nanggan maisan isiê angu da gubuê tiasan, da isantingê nam maran aridan isiê angu." 48 Da Yisu ini da sagat, “Dzi siat u nanggam maisan rai sib wa." 49 Da ampi fain mpada mpruêan igi ini nan ifa iba da runggan ibiani, “Garam aruani nam idzuwai i tiasa nam maisan rai?" 50 Da Yisu ini da sagat, “U nanggam muarutsan irim agu sib. Wafan ruta nan nufan."