1 Tesolounika 5

1 Nakwoe aêamu soku, yoêmayo nakwo selɨhwoneso imoênyoêneso sɨkuno soêno mamtɨêmokohiyɨhwono. 2 Oêo oso hisoêno sekwo huno moiêwonoho. Oso sɨkuno hiso nakwo huno moneyontanɨngkuhwosi imoênonefoho. Aêamu hufo uyantɨfi sɨkwoêmiyomo pohofo oso hopa imoênonefoho. 3 Oso sɨkuno homo somo aêamu ole wohnnantɨfe, Yoka ane sɨkuno wopɨngohontanoho. Nakwo wopɨngo humalohwono. Ose hnnɨngkuji nohumentanɨngkuji yoêmayo huno mosyafɨsiyoêneso uêmofapmmontonoho. Nomêne pahnnɨmo hungkunoso ole, oso tohino moyaêmifa mehomi aswo womantɨfi umnɨngkiso hopa komoêno imoênonefoho. Oso tohino homo somo hofɨko muyakolopitnnehofo. Sɨkuno oso paênyoso imofaponefoho. 4 Nakwoe aêamu soku, sekwo Hwe Engo Jisasɨye hungkuno hilo somo sekwo sɨmeho hiêntnnono uyontɨfe soêno pomponahopo humalofo. Sɨkwoêmjohoêmo mohumulofo. Oêo sɨkuno homo somo sekwo yomo mifitnnefoho. Oso sɨkuno hiso aêamu hufo uyantɨfi pɨwoênɨngkofo hopaso imoênonefoho. 5 Sekwo mofehiênyo pomponahopo humalofo. Nakwo Jisasɨmo sɨmeho hiêntnnono uyɨwoênɨngkuhwone soênwi sɨkwoêmjohoêmo mohumulohwono. Oêo pomponahopo humalohwono. 6 Oseso nakwo aêamu nomêne sofe hofɨkoe huyoêmango fosyawehofo hopa fosyowehwaloho. Oêo nakwo Jisasɨmneêno tɨmo hontohumehwasi huno ntoêno wehohososonasyono. 7 Aêamu Jisasɨmneêno huno mosyafɨsiyoênjo iwoênɨngkohofoso hofɨko sahoênohini fosyawowoênɨngkohofo hopa sɨkwoêmiyomo huno ntoêno mehohosasiyoênjo fosyawowoênɨngkohofofoho. Aêamu mijo yokumpohnênyo nontɨfi nilohofɨwoênɨngkohofoso sɨkwoêmiyomo nonilohofɨwoênɨngkohofofoho. 8 I osoêno nakwo mofehiênyopo humawoênɨngkuhwone sohwonaêniye hunoso ehohosahinyɨênwoho. Nakwo Anɨtumo sɨmeho hiêntnnono uyo soênji aêamu nomêne somo sɨmeho uyosoênji nakwoe sampe paênyofoho. Aêamu jɨje swokinopo wakufongkuêmo lɨhwosi yɨhwosoêno jɨje sampe swokinopo womokisahinɨmnoho. U jɨje mnokinopo wafongkuêmo lɨhwosi yɨhwosoêno kɨko jɨje sampe wahoholoênɨmonnoho. Oso paênyoso nakwoe wonyomneêno poyo imoênɨmentiso sohwo nakumo asomo wonemaêmo lɨhwosi poso sohuneêno syofɨsyɨhwasi nakwoe sampe paênyoso ntoêno wehoholoênohumano. 9 Anɨtu nakwoe wonyoêmneêno tohino nejape-eêne nahwosopoêmentisoêmaho. Oêo nakwoe Hwe Engo Jisas Kɨlais nakumo asomo netɨmayoêne nahwosopoêmentisofoho. 10 Jisas nakwo kakoênji songo fosyohumayoêne nakumneêno peênɨmentisofoho. Osoêno nakwo poyo peênasoêmanji songo humasoêmanji u Jisas kako asomo poso sohonta nakwo kakoênji songo nohumanefoho. 11 Oseso sekwo aêamu angaêno angaênohino hnênwi senɨngkwaêwehwosamo hungkuno wopɨngoênohini ulɨkuji hofɨkoe sɨmehomo yokumpohnênyo fisosofitofɨsyohumamno. Olo honta yalokwofo somtaêangoso neêno fikuno. 12 Nakwoe aêamu soku, hungkuno nomêne woselantaneêno yɨhwono. Aêamu nakwoe Hwe Engo sohwoe honɨngkanomneêno losetɨhwalokwofo somo sekwo enjwaêmo ntoêno fosyohumamno. Nakwoe Hwe Engo sekumo sefoêmayoêne aêamu homo somo uhwosopoêmentisofoho. 13 Sekwo hofɨkoe syoho soêno huno ntoêno fɨsyafɨhupmno. Aêamu homo somo sɨmeho uyɨkuji hofɨkoe yofe hoênomafɨkuji wopɨngoênohini ulohopmno. Sekwo yoka hungkuno nohnnɨngkutoho. Oêo sɨmeho afa inɨngkuji wopɨngo fosyohumamno. 14 Nakwoe aêamu soku, sekwo aêamu pisoêmoênyoênjo somo hungkuno ole ulɨmno, Sekwo syoho yokumpohnênyo fiyɨmno. Pisoêmoênyo ikutoho. Hungkuno yokumpohnênyo ose ulɨmno. Aêamu Anɨtumneêno yokumpohnênyo lohofoêne iyoho unɨwoênɨngkiso somo yokumpohnênyo umokumno. Anɨtuye honɨngkanomo ulɨkoêmano lɨfijo somo ufoêmapmno. Aêamu hopiênonohino somo sekwo hungkuno hwaho lopo hofohofahnêno ulɨmno. 15 Aêamu sekumo wonyo selohopijo somo sekwo aku ulohofɨkutoho. Oêo, sɨkuno engolopohamo sekwo aêamu hopiênonohino somo wopɨngoênohini ulohofɨkuno. 16 Engolopohamo sekwo sɨmeho wopɨngoênji fohumantokuno. 17 Engolopohamo sekwo Mpohumo jomo ulɨkuno. 18 Sekwo yoêmayo tangoênji nohayoênji seêmaso soêno Anɨtumo engolopohamo isamoyoka ulɨkuno. Jisas Kɨlais kakoe aêamu somneêno Anɨtu olo yahino losoêno umoênɨngkohoho. Osoêno sekwo tɨfi finɨngkamno. 19 Yoêmayo Anɨtuye Towahuno selisoso sekwo hwotoho fekutoho. 20 Aêamu Anɨtuye hungkuno selɨfijo somo sekwo hohujo ikinjɨmɨfɨkutoho. 21 Yoêmayo hungkuno upaênɨngkohofoso Anɨtuntaêango soêne yamofo fiyɨmno. Hungkuno neênjo somo aho fɨkesyohumamno. 22 Yoêmayo wonyo somneêno iêwaho fiyɨmno. Olo hilo soêno sekumneêno Mpohumo jomo ulalokuhwono. 23 Anɨtu kako sɨmeho pompenjiyoso hwapɨngo hweho. Osoêno kakoênohini sekumo wopɨngo wasemokono. Kako sekwoe huyoêmangoênji aêapahoênji wopɨngo esemokosyohumahwosi nakwoe Hwe Engo Jisas Kɨlais asomo poso sohonta Anɨtu sekumo wopɨngo semokonefoho. 24 Anɨtu nahwosopoêmentiso sohwo kako oso hisoêno wopɨngo namokonefoho. Anɨtu ose nalɨmentiso soêno ne imoênonefoho. 25 Nakwoe aêamu soku, sekwo Anɨtu nefoêmayo soêno Mpohumo jomo ulɨmno. 26 Anɨtuye aêamu hopiênonohino somo nakwoe aêamu kuyoho ulɨmno. 27 Ngko Hwe Engo sohwoe yokumpohnênyoênji hungkuno loso waselɨmonneêno yohono. Sekwo olo iyoswo mtɨêmokalokuhwoneso nɨngkwahwosamo atofo filutɨhwamno. 28 Nakwoe Hwe Engo Jisas Kɨlais kako wopɨngo wosemokosyohumano. Ngko Poulɨêni olo iyoswo loso mtɨêmokohono. Hungkuno osohopeho.