Apousel 8

1 Sɨtifenɨmo fonjosyahonɨngkofi Soul nohumanto ulɨmento, Sɨtifenɨmo fonjasiyoso wopɨngofoho. Ose ulɨmentisofoho. Oso mofehiênyo somo Anɨtuye aêamu ne Jelusalem humamentohofo somo aêamu kengoso wonyo engo uyomahonɨngkofi tohino engo maêmentohofofoho. Osoêno Anɨtuye aêamu neso noleêmofontɨfi hwaho Jutiya, Someliya soponeêno humpoêmentohofofoho. Aêamu apousel sohwa hofɨkoênohini Jelusalem humamentohofofoho. 2 Hwe Jisasɨmo inɨngkamotofoso Sɨtifenɨye pijafoso motawentɨfi ijopijisyasyontɨfi humotaho engo sulɨmentohofofoho. 3 Soul huhwo sohwo aêamu Jisasɨmo inɨngkawowoênɨngkohofo somo wae weeoêmo lonto aêamufe angomo noswonto aêamu homo somo nohusɨmpemotaponto impoêangomo intofahumentisofoho. 4 Oso aêamu Jelusalemno humpoêmentohofoso ango kengo kengo sopo Anɨtuye hungkuno lutɨhwamentohofofoho. 5 Filip ango Someliya sopono nowento osopo Jisasɨmneêno hungkuno lutɨhwamentisofoho. Anɨtu nakwoe hwahopo uhwatɨmentiso sohwo Jisasɨyoho. 6 Ose ulahonɨngki aêamu hopiênono nupaênontɨfi yoêmayo kengo wonyoangkafoso Filip imentisoso uhwonontɨfi huno engo syafɨhuêmentohofofoho. 7 Aêamu sisɨêmasohoênjo towahuno wonyoênjoso nohumantɨfi mamuyo engo lontɨfi towahuno wonyoso ulɨkoêmaêmentohofofoho. Aêamu aêapaho pompenjiyo songo songo miyoênjoso aêamu sɨfe wonyoênjoso wopɨngo umokumentisofoho. 8 Ose uhwonontɨfi sɨmeho wopɨngo umoênɨmentisofoho. 9 Hwe fihwo Saimoun oso ango hopo sopo humamentisofoho. Oso hwe huhwo sohwo kako kiênyo hwapɨngoênjo hweho. Yoêmayo peefoso hunoênjo hweho. Saimoun ulɨmojofoho, Ngko huno hwapɨngoênjo hwoênyoho. Ose ulɨmojo hweho. Aêamu Someliyaso Saimoun neêno pisopisaho lɨmotofofoho. 10 Aêamu hopiênono yofe engoênjo soênji yofe engo ane soênji aêamu hamniyohoênjo soênji hamniyoho umofonyo iyo soênji nɨhuêno hopiênono Saimounɨye hungkunomo nupaênontɨfi ulɨmotofi, Saimoun hwe hunoênjo hweho. Anɨtuye yokumpohnênyo hiênjo hweho. Ose lɨmotofofoho. 11 Saimoun yoêmayo kengo wonyoangkafoso imojo soêno aêamu kakoe hungkunomo inɨngkamotofofoho. 12 Oseso Filip noponto Anɨtu enemokosyohumayo soênji Jisas Kɨlais ntnneêno lutɨhwahonɨngki aêamu hopiênono Anɨtumo sɨmeho hiêntnnono uyahonɨngkofi hwe moyaêmiênji mijo kiyomaêmentisofoho. 13 Saimoun huhwo sohwo Filipɨye hungkuno nupaênonto sɨmeho hiêntnnono uyahonɨngki Filip kakimo mijo kiyomaêmentisofoho. Saimoun Filipɨênji nohumanto yoêmayo kengo wonyoangkafosomo nuhwononto pisopisaho lɨmentisofoho. 14 Aêamu apousel Jelusalem humamentohofo sohwa ole upaênɨmentohofi, Aêamu Someliyaso Anɨtuye hungkunomo tɨfi inɨngkamentohofofoho. Ose upaênontɨfi Jounênji Pitaênjimo lɨhwatɨmentohofofoho. 15 Siko nowenji aêamu Anɨtumo inɨngkayo soêno jomo ole ulɨmentisi, Mpohwo jɨje Towahuno Wopɨngoso aêamu somo uyo. Ose ulɨmentisiyefoho. 16 Hwapɨngoso Filip Jisasɨye yofe lonto aêamu somo mijo kiyomaêmentisoso Anɨtuye Towahuno Wopɨngo aêamu somo muhulaêmoêmmentisofoho. 17 Pitaênji Jounênji aêamufe mnokinopo aho kisosyahonɨngki Anɨtuye Towahuno Wopɨngo aêamu somo uhulaêmoêmentisofoho. 18 Saimoun kako apousel sohwaêumo uhwonɨmentisoso siko aêamu somo aho kisosyahonɨngki Anɨtuye Towahuno uhulaêmoêmentiso soêno uhwononto kakoe hamniyoho nomanto Pitaênji Jounênjimo ulɨmento, 19 Nje hamniyoho nomahosɨsi Anɨtuye Towahuno ntapinyo. Ngko aêamufe mnokinopo aho kisasehumeso Anɨtuye Towahuno uhulaêmofono. 20 Ose ulahonɨngki Pita ulɨmento, Oloso Anɨtu aêamu somo uyalokusoso mpe uyɨmonntaho. Kɨko jɨje hamniyohoênji tɨkanomo uhnnefoho. 21 Olo syohoso jɨjeêmaho. Anɨtu jɨje sɨmehomo kohonalofoho. Wopɨngoêmaho. Wonyo mnaweho. 22 I osoêno jɨje honɨngkano wonyoso fohoênamofo. Osoêno hohujo ikinjamofohoji Anɨtumo, Jɨje huno wonyo soêno wayoêne jomo uso. 23 Jɨje honɨngkano pisakinoênjo hwosoho. Oso wonyo hiso kikimo yokumpohnênyo kekisyohumaho. 24 Ose ulahonɨngki Saimoun kako Pitaênji Jounênjimo ulɨmento, Siko ngkineêno Anɨtumo jomo ulinyo. Oso ntohino soêno ne mmoênonehoho. Ose ulɨmentisofoho. 25 Apousel sohwaêu Anɨtuye hungkuno hopiênonohino aêamu somo lutɨhwanji Jelusalemno umentisiyefoho. Oso honɨngkano hwaho Someliya sopo ango kengo kengo hopo sopo Anɨtuye hungkuno lutɨhwamentisiyofoho. 26 Hwe ahwomomjo sohwo Filipɨmo ulɨmento, Kɨko Jelusalem honɨngkano sopo nɨhuji ango Ngkasa honɨngkano osomo fɨwe. Ose ulɨmentisofoho. Oso honɨngkano hopo sopo aêamu mahumunyoponoho. 27 Filip nolɨkafonto umentisofoho. Kako honɨngkanopo nohumanto uhwonɨmentisoso, Hwe fihwo Itiyoupiyantaêango sohwo hwe yofe engoênjo hweho. Oso hwaho Itiyoupiya sopo aêmu mokosyohumayosi kakoe yofe Kantasiyoho. Oso aêmusiye hamniyoho hopiênono hwe huhwo sohwo mokosyohumayo hweho. Kako Anɨtumneêno hwomtame ulohoêmo lonto Jelusalemneêno umentisofoho. Ose yonto kakoe angopo neêno asomo pmmentisofoho. 28 Kako ijempoho sohwe kokapitofoênjo somo nohumanto iyoswo hwe Aisaiya Anɨtuye hungkuno lɨmojo sohwo mtɨêmokumentisoso atofo lɨmentisofoho. 29 Filip osohumo uhwonɨngkahonɨngki Anɨtuye Towahuno Wopɨngo ulɨmento, Kɨko tɨfonepo uhuji oso sohwe kakopitofoênjo sohwoepono fɨwano. 30 Ose ulahonɨngki Filip fu lɨmentisoso mafone sopo iêmofawento upaênɨmentisoso, hwe huhwo sohwo Aisaiyafe hungkuno atofo lontanɨngki upaênonto ulɨmento, Oso hungkuno atofo lalokunoso neso huno lakiyohoho. 31 Ose ulahonɨngki ulɨmento, Aêamu malontɨhwayoso ngko huno pipilo. Kɨko ngkoênjo lopo fisape. Filontɨhwaho. 32 Anɨtuye hungkuno Aisaiya mtɨêmokumentiso hwe huhwo sohwo atofo lɨmentisoso ole, Aêamu yahu sipsip fonjasiyopo neêno ipemotawomotofo hopa hwe sohumo ipemotawomentohofofoho. Yahu sipsip aêamu kakoe tohwa hmêmotofo sohonta yahu mampiênyo imojo hopa hwe huhwo sohwo mampiênyo imentisofoho. 33 Oso hwe sohumo hwotoho fentɨfi hungkuno tangoênjo ikwolofoêneso hwasyo lɨmentohofofoho. Neênjoêmaho. Kako wonyoso miyahonɨngki fonjahumentohofofoho. Oso aêamu huhwo sohwoe wonyoso tɨhwo loneêento imentisoto. Hofɨko nofonjosyahonɨngkofi kako olo hwaho lopo mohumammentisofoho. Oso Aisaiya mtɨêmokumentisofoho. 34 Atofo ose lonto, Filipɨmo ulɨmento Aisaiya tɨhumneêno mtɨêmokumentisoto. Kako kakineêno hnnɨmentisotaho. Nomêne huneêno lɨmentisotaho. 35 Ose ulohonɨngkahonɨngki Filip Anɨtuye hungkuno Aisaiya mtɨêmokumentisoso yolohoêno nolonto Jisasɨye hungkuno wopɨngoso ulɨmentisofoho. 36 Siko honɨngkanomo nowenji mijo weêe uhwononji hwe Itiyoupiyantaêango sohwo ulɨmento, Uhwonyo. Mijo wojo loênoho. Honɨngkano njisohwo pɨjwanɨmokwoho ngko mijo mokiyonɨmasosofo. 37 [Ose ulahonɨngki Filip ulɨmento, Kɨko Anɨtumo sɨmeho hiêntnnono nehopi uyoso ngko mijo uyokumaêmnoho. Ose ulahonɨngki ulɨmento, Eno. Jisas Kɨlais Anɨtuye Hwomu Ne sohuneêno huno niyohoho.] 38 Ose ulonto sohwe kokapitofo mtaêni siko nokotaponji mijomno umentisiyefoho. Osopo nohumahonɨngki Filip hwe sohumo mijo kiyomaêmentisofoho. 39 Mijo mtaêni sɨmentisiyoso Anɨtuye Towahuno Wopɨngo komoêno Filipɨmo kengopo mɨhumatɨêmentisofoho. Hwe Itiyoupiyantaêango sohwo Filipɨmo apaêno muhwonɨmentisoso sɨmeho wopɨngoênji kakoe angopo neêno umentisofoho. 40 Filip nomêne angopo Asyɨtout iêmofawento ango hopiênonohino somo Jisasɨye hungkuno wopɨngo lutɨhwawento hwangku ango Sisaliya sopo iêmofamentisofoho.