Matɨyu 9
PNG1 Jisas yofayokinomo kotasonto ayo momɨngo somo kuêmokwawento kakoe ango hwapɨngo sopo iêmofamentisofoho. 2 Iêmofaohwahonɨngki aêamuso hofɨko hwe nomêne sɨfe aho peênnyo sohwo kakoe ijempohopoênohini saho fosyawowoênɨngkiso sohumo Jisasɨyepono itokwopmmentohofofoho. Itokwopahonɨngkofi Jisas kako uhwonɨmentisoso hofɨko kakineêno sɨmeho hiêntnnono yokumpohnênyo uyohonɨngkofi uhwononto Jisas oso aêamu mnokinoênjo sohumo ulɨmento, Nje hwomu sohwosi, kɨko iyoho kinɨngkuhwoloho. Ngko jɨje honɨngkano wonyoso wae nto yakumofohono. 3 Ose ulahonɨngki aêamu honɨngkano hungkuno lutɨhwamotofo sohwa nohumantɨfi ole hnnɨmentohofi, Olo hwe lohwo sohwo kako Anɨtu paênyo pojiyalofoho. 4 Ose hnnɨngkahonɨngkofi, hofɨkoe hunoso Jisas kako huno moiêwonoho. Osoêno Jisas ulɨmento, Sekwoe sɨmeho moêmo huno wonyoso pehoêno syonɨfɨsyantokwofo. Ole losyonɨfɨsyantɨkwofo, ngko aêamufe wonyo wae meeofonehoho losyonɨfɨsyantɨkwofo. 5 Anɨtu kako ngkimo aêamumo ufoêmayoêne nɨhwatɨmentiso sohwoêni olo hwaho lopo aêamufe honɨngkano wonyo wae yaofoêne yokumpohnênyoso hiênjo hwoênyoho. I osoêno aêamu fihwo jɨje honɨngkano wonyo wae weekumoêmo loso sohwoe hungkuno somo ne imoênyo soêno sekwo sɨmeho moêmo muhwonɨfitnne kuyoho. Oso yokumpohnênyo ngko seloheso hiênjo sohwoêni utɨhwaênyopo setɨhwahmêmeêno hungkuno nomêne kengoso hwe lohumo ulɨmonneêno yohono. Hofɨkimo ose ulonto kako hwe mnokinoênjo sohumo ulɨmento, kɨko nolɨkafohoji jɨje ijempohoso nomahoji jɨje angopo neêno mpano. 7 Ose ulahonɨngki hwe huhwo sohwo nolɨkafonto kakoe angomno umentisofoho. 8 Nowahonɨngki hwe moyaêmiso nuhwonontɨfi iyoho unɨngkahonɨngki hofɨko ole lɨmentohofi, Anɨtu kakoe yokumpohnênyo engoso olo paênyo loso hwe lohumo uyohoho. Huno ose uyahonɨngki hofɨko Anɨtuye yofe hoênomaêmentohofofoho. 9 Oseso Jisas hano wento uhwonɨmentisoso hwe fihwo hamniyoho mayo syohoênjo sohwo kakoe ango somo humamentisofoho. Oso hwe huhwo sohwo kakoe yofe Matɨyu. Oso hwe huhwo sohumo Jisas nuhwononto ulɨmento, Kɨko ngkimo tɨfi nnɨngkape. Ose ulahonɨngki Matɨyu nolɨkafonto tɨfi inɨngkamentisofoho. 10 Jisas Matɨyuye angomo nohumentanɨngki aêamu nomêne hamniyoho mayo syohoênjo honɨngkano wonyoênjo sohwanji aêamu wonyo honɨngkanoênjo nomêne soênji nohumentanɨngkofi hofɨko Jisasɨênji kakoe inomokomoyo sohwanji wopayo nɨmentohofofoho. 11 Nonontanɨngkofi aêamu Falisi fehohnjo sohwa nuhwonontɨfi Jisasɨye inomokomoyo sohwamo ulɨmentohofi, Sekwoe Hwe Engo lohwo kako aêamu hamniyoho mayo syohoênjo lohwanji aêamu wonyo honɨngkanoênjo loênji wopayo pehoêno nalofoho. 12 Ose ulahonɨngkofi Jisas nupaênonto pahnnɨmo hungkuno ulɨmento upaênɨmno. Aêamu mnokino aneênjo wopɨngo humalofoso hofɨko aêamu uyohofahosiyoênjo sohumo muêmapitnnehofo. Oêo, aêamu mnokinoênjo soênohini uêmantɨfeho. 13 Oso paênyoso ngko aêamu honɨngkano wopɨngoênjo hwonaênyoho lɨwoênɨngkohofo somneêno joho lutɨmayoêne pmmentohe hwonɨêmaho. Oêo, ngko aêamu honɨngkano wonyoênjo somneêno pmmentohe hwoênyoho. Sekwo Anɨtuye hungkuno somneêno huno waseyono. Hungkuno ole, Sekwo nomêne somneêno hitoho ulofo soêno nɨmoênɨngkohoho. I sekwo ngkineêno hwomtame ko ntohofontɨfi nomêne aêamu somneêno hitoho mulofeênjoêmanji ngkilaho. Oso hungkuno somneêno huno waseyono. 14 Oso hohosohonta Joun Aêamumo Mijo Kiyomaêmojo sohwoe inomokomoyo sohwa Jisasɨmo uêmaêmentohofofoho. Nuêmantɨfi ulɨmentohofi, Nakwoênji aêamu Falisi sohwanji wopayo manyoênjo humayoso Anɨtumo jomo ujoêne yahinoso inɨngkawowoênɨngkuhwonefoho. I osoêno jɨje inomokomoyo sohwa hofɨko wosopayo manyoênjo humayo yahino somo minɨngkayoênjo pehoêno yalokwofo. 15 Ose ulohonɨngkahonɨngkofi Jisas pahnnɨmo hungkuno ulɨmento, Hwe fihwo kako ape songo mayo sohonta osohwo kakoe aêamuênji nohumahwosi hofɨko sɨmeho tangoênji wohumantɨfi taho. Awonoho. Hofɨko sɨmeho wopɨngoênji wopayo engo wonantɨfeho. I osoêno hwangku oso hwe ape maso huhwo sohumo aêamu nomêne sohwa hofɨko kakoe aêamu mtaêni kompemafɨkuji fonjasyɨkujoêno kakoe aêamu hiso kako ane humafɨkujoso sɨmeho tangoênjo humafɨkuji wosopayo manyoênjo uyantɨfeho. Ose ulonto pahnnɨmo hungkuno nomêne ulɨmento, 16 Hwe fihwo manjiêmofo tontamo imoênnyo sohwo kako hwapɨfe nomêne songo weêeso nomahwosi tontamo somo lojwohofojasi lohofɨhwosi yakɨfe uyɨmtolaho. Awonoho. Engo womnahotɨêmontonoho. 17 Ose ulonto pahnnɨmo hungkuno tɨfinjoso ole ulɨmento, Ou, aêamu fihwo kako mijo iloho uyɨmo lɨhwosi te fisɨyo womaêmontolaho. Oêo, awonoho. Kako te fisɨyo mahwosi mijo ihmêmofɨhwosi iloho yososo mijo wahumpoêmontonoho. Te fisɨyoso nɨhuênahone wonyo umoênɨmontonoho. U, hwe huhwo sohwo kako te songoso mahwosi mijo ihmêmofɨhwosi iloho yososo mijo itoêno wolɨfawoêmontonoho. Ihwoni. Yahino hohontajo soênji songo soênji nemêno huêmɨngoso itoênohinoêmaho. 18 Jisas oso hungkuno hiso ulontanɨngki hwe yofe engoênjo sohwo Jisasɨmo uêmanto hwomtame ulohofonto ulɨmento, Nje mu olohonta nto peênɨngkohoho. I osoêno kɨko nopohoji kakimo jɨje ahoso fɨkisyusyo. Kako apaêno songo wolɨkafono. 19 Ose ulahonɨngki Jisas nolɨkafonto kakoe inomokomoyo sohwanji hwe huhwo sohumo tɨfi inɨngkamentohofofoho. 20 Nowentanɨngkofi nomêne aêmusi Jisasɨmo inɨngkawomentisofoho. Aêmusi imoiho neêno yontanɨngki soswo aho hufaêu hopiênono sɨfe mtaêni hufaêu uyakoloêmojofoho. Oso aêmu hisi kako Jisasɨmneêno hnnɨmento, Ngko olo hwe lohwoe manjiêmofo somo aho kisahumeso ngko wopɨngo umoênɨmonnoho. Ose hnnonto kako Jisasɨye hohujo hohntaêni uêmanto kako Jisasɨye hwapɨfe tokwajo somo aho upmêmokumentisofoho. 22 Nopmêmokahonɨngki Jisas ikinjamo lohofonto aêmu simo nuhwononto ulɨmento, Nje mufo, jɨje sɨmeho wopɨngo wakumoênono. Kɨko ngkimo sɨmeho hiêntnnono ntapohino soêno wopɨngo nto imoênɨngkino kiyoho. Ose ulahonɨngki oso hohosohonta aêmusi wopɨngo imoênɨmentisofoho. 23 Oseso Jisas kako nowento hwe engo sohwoe angomo swonto uhwonɨmentisoso aêamu hofɨko te somo hmpehmpe lontanɨngkofi aêamu wosofe hoênowentanɨngki nuhwononto 24 Jisas ulɨmento, Sekwo mpanɨmno. Mu weêesi poyoêmaho. Kako saho fosyaweho. Ose ulahonɨngki hofɨko Jisasɨmneêno tɨkafo ujɨmentohofofoho. 25 Tɨkafo ujɨmentohofoso Jisas hofɨkimo mempo hohntaêni uhwajonto humentisofoho. Noswonto oso mu sopiye ahomo nomahonɨngki mu sopi lɨkaêmentisofoho. 26 Lɨkaêmentiso soêno oso hungkuno hiso angoêmeemo hoênɨmmentisofoho. 27 Jisas oso ango hopo sopo nulɨkoêmanto nowentanɨngki hwe tɨmpiênyo sohwaêu Jisasɨmo tɨfi inɨngkawenji joho ole ulɨmentisi, Ntefitɨye Imu sohwosi, nekumneêno hitoho wakilofono. 28 Ose ulahonɨngki Jisas kako angomo swahonɨngki oso hwe tɨmpiênyo sohwaêu Jisasɨmo uêmahonɨngki Jisas ulɨmento, Ngko sikimo wopɨngo semokiyo soêno sɨmeho hiêntnnono lontapisiyo. Ose ulohonɨngkahonɨngki ulɨmentisi, Ou, Hwe Engofo, eno. 29 Ose ulahonɨngki Jisas sikoe tɨmopo aho kisasyonto ulɨmento, Siko ngkimo sikoe sɨmeho hiêntnnono ntapisiyoêmanji yoêmayo siko nosemoênɨngkisoso woseêmano. 30 Ose ulahonɨngki sikoe tɨmo honɨmentisiyefoho. Oseso Jisas sikimo hungkuno yokumpohnênyo ole ulɨmento, Upaêninyo. Wopɨngo semokohe soêno nomêne aêamu fihumo nulohosiloho. Ose ulɨmentisofoho. 31 I osoêno siko mempo hohntaêni noswonji yoêmayo Jisas imentiso soêno hwaho aeêmo aêamu somo ulɨmentisiyefoho. 32 Oso hwe huhwo sohwaêu nosontanɨngki aêamu nomêne sohwa hofɨko hwe ilohoênnyo towahuno wonyo ehuhnnamoênnyo sohumo ipemotapontɨfi Jisasɨyepono umentohofofoho. Oso towahuno wonyo huhwo sohwo hwe sohumo mampiênyo mesyɨmokumentisofoho. 33 Oseso Jisas oso hwe sohwoe towahuno wonyo wae yaofahonɨngki kako hungkuno lɨmentisofoho. Hungkuno lahonɨngki hwe moyaêmi hofɨko yomo yontɨfi huno piênɨngo syafɨhuêmentohofi, Hohonta olo yahino loso aêamu Isɨlael hnênɨmo mêmofapeênjo imojofoho. 34 Ose lahonɨngkofi aêamu Falisi sohwa ole lɨmentohofi, Towahuno wonyo hopiênohino sohwafe hwe engoso Setenɨyoho. Oso humtaêni Jisas kako yokumpohnênyo nomanto towahuno wonyo homo somo wae yaofalofoho. Ose ulɨmentohofofoho. 35 Oseso Jisas angoêmeemo nowento aêamu sofe tajo ango somo kakoe hungkuno Anɨtu aêamumo umokosyohumayo soêno lutɨhwanto aêamu wonyoêwonyo mnokinoênjo somo wopɨngo umokumentisofoho. 36 Jisas hwe moyaêmi piênɨngo engo somo uhwonɨmentisoso yoêmayo tango engoênjo aêamu somo uêmahonɨngki yokumpohnênyo ufoêmaênyoêneso anefoho. Yahu kakwoêyohwo ane paênyofoho. Ose uhwononto kako hitoho uloêmentisofoho. 37 Hitoho ulofahonɨngki Jisas kakoe inomokomoyo sohwamo pahnnɨmo hungkuno ulɨmento, Wopayo syoho soponjo piênɨngo engoso toyo nto imaho. I oso hisoêno aêamu wopayo toyo mjiyoêne syohoênjo sohwa hopoenohino hwaêmaho. 38 Oseso sekwo olo syoho loso mokosyohumawoênɨngkiso kakwoêyohumo jomo ulɨkujoêno kako oso wopayo toyo homo somo mjiyoêne aêamumo lɨhwajiyoêne jomo ulɨmno. Ose ulɨmentisofoho.