ZƏBUR 149

¹ Rəbbə həmd edin! Rəbbə yeni bir ilahi oxuyun, Möminlər camaatı arasında Ona həmd edin!

² İsrail nəsli Yaradanına görə sevinsin, Sion övladları Padşahına görə şad olsun!

³ Rəqslərlə isminə həmd edin, Dəflə, lira ilə Onu tərənnüm edin!

⁴ Çünki Rəbb Öz xalqından zövq alar, Zəfəri ilə itaətkarların üstünə yaraşıq salar.

⁵ Bu şərəfə görə qoy möminlər sevinsinlər, Yataqlarında belə, Onu tərənnüm etsinlər.

⁶ Dilləri ilə Allahı ucaltsınlar, Əllərində ikiağızlı qılınc tutsunlar.

⁷ Millətləri qıraraq qisas alsınlar, Ümmətləri cəzalandırsınlar.

⁸ Padşahlarına zəncir vursunlar, Sərkərdələrini dəmir buxovlara salsınlar.

⁹ Onlar üçün yazılan hökmü yerinə yetirsinlər, Rəbbin bütün möminləri bununla şərəflənsinlər. Rəbbə həmd edin!