BONAA 17
SIM1 Isarailanↄ fùtɛ Sini gbárannan ń pínki, òtɛn bùra kátɛkatɛ lákũ Dikiri òńnɛ nà, akũ ò gɛ̀ɛ ò bùraa kàtɛ Rɛfidimu. Odi í le ò mì gwero,
2 akũ ò zuka kà Musai ò pì: Ǹ ó gba í ò mi. À pìńnɛ: Bↄ́yãi átɛn lɛ́kpakↄ̃ana kɛ kũmaoo? A kɛ̀ dera átɛn Dikiri lɛ́ à gwaa?
3 Kũ ími tɛni ń dɛ, akũ ò zuka kà Musai ò pì: Bↄ́yãi n bo kũoo Misilai? Ń ye ími ó dɛ kũ ó nɛ́nↄ kũ ó pↄ́kãdenↄon yá?
4 Akũ Musa wiki lɛ̀ Dikiria à pì: Deran mani kɛ kũ gbɛ̃ pìnↄ nàa? À gↄ̃̀ fíti kũ oni ma pápa kũ gbɛ̀ɛo ò ma dɛ.
5 Dikiri pìnɛ: Ǹ Isaraila gbɛ̃ zↄ̃kↄ̃nↄ sɛ́tɛ à do gbɛ̃ pìnↄnɛ arɛ. Ǹ n gò kũ n Nili lɛ̀o sɛ́ dↄ.
6 Mani zɛ n arɛ Orɛbu gbɛ̀si sarɛ gwe. Ǹ gbɛ̀si pì lɛ́, í ni bo de ò mi. Akũ Musa kɛ̀ lɛ Isaraila gbɛ̃ zↄ̃kↄ̃nↄ wára.
7 Akũ ò tↄ́ kpà gu pìinɛ Masa, zaakũ gwen ò Dikiri lɛ̀n ò gwà ò pì: Dikiri kú kũoomɛ gwe yá? Ò tↄ́ kpànɛ Mɛriba dↄ, kũ Isarailanↄ zuka kà gwe yãi.
8 Amalɛkinↄ sù zĩ̀ ká kũ Isarailanↄ Rɛfidimu.
9 Akũ Musa pì Yↄsuanɛ: Ǹ gbɛ̃nↄ sɛ́ ó tɛ́ à gɛ́ zĩ̀ ká kũ Amalɛkinↄ. Zia manigↄ̃ zɛna sĩ̀sĩ dí mìsↄ̃ntɛa kũ Luda gòoo kũna.
10 Yↄsua kɛ̀ lákũ Musa ònɛ nà, à gɛ̀ɛ zĩ̀ ká kũ Amalɛkinↄ. Akũ Musa kũ Harunao kũ Uruo dìdi sĩ̀sĩi pìi mìsↄ̃ntɛa.
11 Tó Musa a ↄnↄ sɛ̀, Isarailanↄ dìgↄ̃ zĩ̀ ble Amalɛkinↄamɛ, ama tó à a ↄnↄ dìtɛ sↄ̃, Amalɛkinↄ dìgↄ̃ zĩ̀ ble Isarailanↄa.
12 Kũ Musa ↄnↄ wã̀, ò gbɛ̀ɛ sɛ̀ ò dìtɛ a gbáru à vùtɛa, akũ Haruna kũ Uruo a ↄnↄ kũkũna, gbɛ̃ do ↄplai, gbɛ̃ do ↄzɛi, akũ a ↄnↄ gↄ̃̀ zɛna ari ifãntɛ̃ gɛ̀ɛ à gɛ̃̀o kpɛ́n.
13 Akũ Yↄsua zĩ̀i blè Amalɛkinↄa à ń dɛdɛ kũ fɛ̃nɛdao.
14 Dikiri pì Musanɛ: Ǹ adikĩna kɛ̃ takada gũn de àgↄ̃ de dↄngu pↄ́ ũ ǹ o Yↄsuanɛ, zaakũ mani Amalɛkinↄ buri bo andunia gũn ń pínki.
15 Musa gbagbaki bò, akũ à tↄ́ kpànɛ Dikirimɛ ma tuta ũ
16 à pì: Ma ↄ sɛ̀ Dikiri kpata kpa. Dikiri nigↄ̃ zĩ̀ ká kũ Amalɛkinↄ gↄrↄ sĩnda pínki.