BONAA 18
SIM1 Musa anzure Yɛtoro, Midiã sa'ori, yã kũ Luda kɛ̀ Musanɛ kũ a gbɛ̃ Isarailanↄ mà, lákũ Dikiri ń bↄ́tɛ Misila nà.
2 À sù à lè Musa gĩnakɛ à a nanↄ Zipora zĩ̀ bɛ
3 kũ a nɛ́gↄ̃gbɛ̃ mɛ̀n planↄ. A do tↄ́n Gɛsↄmu, zaakũ Musa pì gbɛ̃ zĩ̀tↄn a ũ dakenↄ bùsun.
4 A do tↄ́n Ɛliɛza, zaakũ Musa pì a de Luda a faaba kɛ̀ à a bo Firi'auna fɛ̃nɛda lɛ́i.
5 Akũ Yɛtoro fùtɛ àtɛn su Musa kĩnaa kũ a nɛ́nↄ kũ a nanↄo gu kũ à bùraa kàtɛn Luda kpi sarɛ gbárannan.
6 À lɛ́gbãzã kɛ̀ Musanɛ à pì: Matɛn su n kĩnaa kũ n nanↄo kũ n nɛ́ mɛ̀n planↄo.
7 Musa bò à gɛ̀ɛ à dà a anzurelɛ à kùtɛ à lɛ́ pɛ̀a. Ò kↄ̃ aafiaa gbɛ̀ka, akũ ò gɛ̃̀ kpɛ́n.
8 Musa yã kũ Dikiri kɛ̀ Firi'aunanɛ kũ Misilanↄ Isarailanↄ yãi bàbanɛ pínki kũ wari kũ à ń lé zɛ́ gũnnↄ pínki kũ lákũ Dikiri ń bó nào.
9 Yɛtoro pↄ kɛ̀ nna yã mana kũ Dikiri kɛ̀ Isarailanↄnɛɛa pínki kũ lákũ à ń bó Misilanↄ ↄĩ nào.
10 Akũ à pì: Ò Dikiri sáabu kpá lákũ à á bó Firi'auna kũ Misilanↄ ↄĩ nà.
11 Má dↄ̃̀ sà kũ Dikiri zↄ̃kↄ̃ de tãnanↄla ń pínki. Kũ Misilanↄ ĩa dã̀áwa, à yã mↄ̀ńnɛ.
12 Akũ Yɛtoro sa'opↄ kũ òdi ká tɛ́n à tɛ́ kũ ò Ludaa kũ sa'opↄ pãndenↄ dↄ. Akũ Haruna kũ Isaraila gbɛ̃ zↄ̃kↄ̃nↄ ń pínki ò sù ò pↄ́ blè kãao Luda arɛ.
13 Kũ gu dↄ̀ Musa vùtɛ àtɛn yã gↄ̃gↄ̃ńnɛ, ò katɛnai zaa kↄnkↄ ari ↄkↄsi.
14 Kũ Musa anzure yã kũ àtɛn kɛńnɛ è pínki, akũ à a là à pì: Bↄ́n ntɛn kɛ kũ gbɛ̃ dínↄ lɛɛ? Bↄ́yãi ntɛn yãkpatɛ kɛńnɛ ndo, gbɛ̃ sĩnda pínki katɛnanyĩ zaa kↄnkↄ ari ↄkↄsii?
15 Musa wèa à pì: Gbɛ̃nↄ dì su ma kĩnaa ò Luda pↄyenyĩna yã mamɛ.
16 Tó ò yãkete vĩ, òdi su ma kĩnaa mà yã pì gↄ̃gↄ̃ńnɛ mà Luda doka kũ à dìtɛnↄ ońnɛ.
17 Musa anzure pìnɛ: Yã kũ ntɛn kɛ manaro.
18 Ĩni kpasa, gbɛ̃ kũ ò kú kũnwonↄ ni kpasa dↄ, zaakũ zĩ pì denla, ĩni fↄ̃ ǹ kɛ ndoro.
19 Ǹ ma yã ma sà, mani lɛ́ damma, Luda nigↄ̃ kú kũnwo. Ĩnigↄ̃ deńnɛ yãgↄ̃gↄ̃ri ũ, ĩnigↄ̃ gɛ́ kũ ń yãnↄ Luda kĩnaa,
20 ĩnigↄ̃ doka kũ Luda dìtɛnↄ dańnɛ, ĩnigↄ̃ zɛ́ kũ à de ò sɛ́ mↄńnɛ kũ yã kũ oni kɛnↄ.
21 Ǹ gbɛ̃ laakaride náanide kũ ò Luda vĩna vĩ akũ òdi gusarɛgba síronↄ sɛ́ ń tɛ́, ǹ ń ditɛ gbɛ̃nↄn wàa sↄsↄↄronↄ don'arɛdenↄ ũ kũ gbɛ̃nↄn basↄsↄↄroo kũ gbɛ̃nↄn bupla akurio kũ gbɛ̃nↄn kurikurio,
22 de ògↄ̃ yã gↄ̃gↄ̃ gbɛ̃ pìnↄnɛ gↄrↄ sĩnda pínki. Oni su n kĩnaa kũ yã zĩ'ũnↄ pínki, ama oni yã fítinnanↄ gↄ̃gↄ̃ ń zĩda. Abire mɛ́ ani n aso lagonnɛ.
23 Tó Dikiri wènnɛ, tó n kɛ̀ lɛ, ĩni fuaro, gbɛ̃ pìnↄ ni tá bɛ kũ laakariio kpatɛna.
24 Musa a anzure yã mà à kɛ̀ lákũ à òarɛ nà pínki.
25 À gbɛ̃ laakaridenↄ sɛ̀ Isaraila burinↄ tɛ́ pínki à ń dítɛ gbɛ̃nↄn wàa sↄsↄↄronↄ don'arɛdenↄ ũ kũ gbɛ̃nↄn basↄsↄↄroo kũ gbɛ̃nↄn bupla akurio kũ gbɛ̃nↄn kurikurio.
26 Akũ òdigↄ̃ yã gↄ̃gↄ̃ńnɛ gↄrↄ sĩnda pínki. Yã zĩ'ũn òdi suo Musa kĩnaa, akũ òdi yã fítinnanↄ gↄ̃gↄ̃ ń zĩda.
27 Musa gɛ̀ɛ à zɛ̀ a anzureenɛ, akũ à tà a bùsun.