NAANAA 4
SIM1 Adamu a nanↄ Awau dↄ̃̀ nↄgbɛ̃ ũ, akũ à nↄ̀ↄ sì à Kainu ì. Akũ à pì: Ma gↄ̃gbɛ̃ ì kũ Dikiri gbãnao.
2 Akũ à a dakũna Habila ì dↄ. Habila kɛ̀ sãdãri ũ, Kainu sↄ̃ à kɛ̀ búbari ũ.
3 Zĩkea Kainu sù kũ a burapↄnↄo gba ũ Dikirinɛ.
4 Habila sↄ̃ à sù kũ a sãnɛ káaku mɛ̀kpanaao. Habila yã kà Dikirigu, akũ à a gba sì.
5 Kainu sↄ̃ a yã dí kɛ Dikirinɛro, akũ adi a gba síro. Akũ Kainu pↄ fɛ̃̀ manamana a ãnn sìsi.
6 Akũ Dikiri pì Kainunɛ: Bↄ́yãi n pↄ fɛ̃̀ɛ? À kɛ̀ dera n ãnn yàkaa?
7 Tó n yã mana kɛ̀, mani n síroo? Tó ńdi yã mana kɛ sↄ̃ro, durunna natɛnnɛ n kpɛ́lɛlɛa. N ni tɛni a dɛ, séde ǹ zĩ̀ blea.
8 Akũ Kainu pì a dakũna Habilanɛ: Ò gɛ́ sɛ̃̀n. Kũ ò kà gwe, akũ à fùtɛ a dakũnai à a dɛ̀.
9 Dikiri Kainu là à pì: Mán n dakũna Habila kunn? À wèa à pì: Má dↄ̃ro. Ma dakũna dãkpãriin ma ũ yá?
10 Akũ Dikiri pì: Bↄ́n n kɛ̀ɛ? N dakũna aru tɛn lɛ́ zumai zaa zĩtɛ gũn mà zɛ kãao.
11 Tera sà ĩnigↄ̃ láari pↄ́ ũmɛ, ĩnigↄ̃ zã̀ kũ zĩtɛ kũ à n dakũna aru mì n ↄĩo.
12 Tó n bú bà, zĩtɛ ni kararo. Ĩnigↄ̃ sↄ̃sↄ̃ gu kũ guo ǹgↄ̃ likara andunia gũn.
13 Akũ Kainu pì Dikirinɛ: Wari bire gbãna demala, mani fↄ̃ro.
14 Ntɛn pɛ́ma zĩtɛ la gbãramɛ sà. Mani kɛ̃kↄ̃a kũnwo sà. Manigↄ̃ sↄ̃sↄ̃ gu kũ guo màgↄ̃ likara andunia gũn, gbɛ̃ kũ à kpàkũn kũmao ni ma dɛ.
15 Akũ Dikiri pìnɛ: Lɛnlo! Tó gbɛ̃ n dɛ, oni mↄra káa gɛ̃̀n supplamɛ. Akũ Dikiri wãnzãn ke kɛ̃̀ Kainua, de gbɛ̃ kũ à kpàkũn kãao sún a dɛro yãi.
16 Akũ Kainu dà zɛ́n à kɛ̃̀ Dikiria. À gɛ̀ɛ à vùtɛ Nↄdu bùsun Ɛdɛni ifãboki kpa.
17 Kainu wùtɛ kũ a nanↄo, akũ à nↄ̀ↄ sì à Ɛnↄku ì. A gbɛra Kainu wɛ̃tɛ kàtɛ, akũ à a nɛ́ pì tↄ́ kpà wɛ̃tɛ pìinɛ.
18 Ɛnↄku Irada ì, Irada Mɛuyaɛli ì, Mɛuyaɛli Mɛtusaɛli ì, Mɛtusaɛli Lamɛki ì.
19 Lamɛki nↄ sɛ̀ mɛ̀n pla, a do tↄ́n Ada, a do Zila.
20 Ada Yabala ì. Àkũmɛ pↄ́dãri kũ òdigↄ̃ kú bizakuta gũnnↄ dizi káaku ũ.
21 A dakũna tↄ́n Yubala. Àkũmɛ mↄrↄlɛrinↄ kũ úrapɛrinↄ dizi káaku ũ.
22 Zila sↄ̃, akũ mɛ́ à Tubala Kainu ì. Siaamɛ a ũ. Àdi pↄ pínki pi kũ mↄ̀sio kũ mↄ̀gotɛ̃o. A dãre tↄ́n Naama.
23 Akũ Lamɛki pì a nↄnↄnɛ: Ada kũ Zilao, à ma yã ma, ma nↄnↄ, à sã kpá ma yãi. Gbɛ̃ke ma kĩnna, akũ ma a dɛ̀, kɛfɛnna pì ma lɛmɛ, akũ ma a wɛ̃̀ndii bò.
24 Tó oni Kainu fĩna bonɛ gɛ̃̀n suppla, makũ Lamɛki ma pↄ́ sↄ̃, gɛ̃̀n baaakↄ̃ akuri awɛɛsupplamɛ.
25 Adamu wùtɛ kũ a nanↄo dↄ, akũ à nɛ́gↄ̃gbɛ̃ ì. À tↄ́ kpànɛ Sɛti à pì, Luda a gba nɛ́ pãnde Habila kũ Kainu a dɛ̀ gɛ̃nɛ ũmɛ.
26 Sɛti sↄ̃ à nɛ́gↄ̃gbɛ̃ ì, akũ à tↄ́ kpànɛ Ɛnↄsu. Zaa zĩ birean ò nà Dikiri sísinaaa.