NAANAA 5
SIM1 Adamu burinↄ yãn dí. Gↄrↄ kũ Luda bisãsirinↄ kɛ̀, à ń kɛ́ lán a bàmɛ.
2 À ń kɛ́ gↄ̃gbɛ̃ kũ nↄgbɛ̃o, akũ à arubarikaa dàńnɛ. À tↄ́ kpàńnɛ bisãsiri.
3 Adamu wɛ̃̀ basuddo akuride gũn à nɛ́ ì a taka ũ à bòkↄ̃a kãao, akũ à tↄ́ kpànɛ Sɛti.
4 Sɛti inaa gbɛra à kɛ̀ wɛ̃̀ wàa siikↄ̃ à nɛ́ pãndenↄ ì dↄ gↄ̃gbɛ̃nↄ kũ nↄgbɛ̃nↄo.
5 Kũ à kà wɛ̃̀ wàa siikↄ̃ kpɛ́ basuddo akuri, akũ à gà.
6 Sɛti wɛ̃̀ basↄↄro awɛɛsↄↄrode gũn à Ɛnↄsu ì.
7 A gbɛra à kɛ̀ wɛ̃̀ wàa siikↄ̃ awɛɛsuppla à nɛ́ pãndenↄ ì dↄ gↄ̃gbɛ̃nↄ kũ nↄgbɛ̃nↄo.
8 Kũ à kà wɛ̃̀ wàa siikↄ̃ kpɛ́ basↄↄro akuri awɛɛpla, akũ à gà.
9 Ɛnↄsu wɛ̃̀ basiikↄ̃ akuride gũn à Kenana ì.
10 A gbɛra à kɛ̀ wɛ̃̀ wàa siikↄ̃ kũ gɛ̃roo à nɛ́ pãndenↄ ì dↄ gↄ̃gbɛ̃nↄ kũ nↄgbɛ̃nↄo.
11 Kũ à kà wɛ̃̀ wàa siikↄ̃ kpɛ́ basↄↄro awɛɛsↄↄro, akũ à gà.
12 Kenana wɛ̃̀ baaakↄ̃ akuride gũn à Malalɛli ì.
13 A gbɛra à kɛ̀ wɛ̃̀ wàa siikↄ̃ kpɛ́ bupla à nɛ́ pãndenↄ ì dↄ gↄ̃gbɛ̃nↄ kũ nↄgbɛ̃nↄo.
14 Kũ à kà wɛ̃̀ wàa siikↄ̃ kpɛ́ basↄↄro akuri, akũ à gà.
15 Malalɛli wɛ̃̀ baaakↄ̃ awɛɛsↄↄrode gũn à Yarɛdi ì.
16 A gbɛra à kɛ̀ wɛ̃̀ wàa siikↄ̃ kũ mɛ̀n baraakuri à nɛ́ pãndenↄ ì dↄ gↄ̃gbɛ̃nↄ kũ nↄgbɛ̃nↄo.
17 Kũ à kà wɛ̃̀ wàa siikↄ̃ kpɛ́ basↄↄro sↄↄrosari, akũ à gà.
18 Yarɛdi wɛ̃̀ basↄraakↄ̃ awɛɛplade gũn à Ɛnↄku ì.
19 A gbɛra à kɛ̀ wɛ̃̀ wàa siikↄ̃ à nɛ́ pãndenↄ ì dↄ gↄ̃gbɛ̃nↄ kũ nↄgbɛ̃nↄo.
20 Kũ à kà wɛ̃̀ wàa siikↄ̃ kpɛ́ basↄraakↄ̃ awɛɛpla, akũ à gà.
21 Ɛnↄku wɛ̃̀ baaakↄ̃ awɛɛsↄↄrode gũn à Mɛtusela ì.
22 A gbɛra à táa ò kũ Ludao ari wɛ̃̀ wàa do kpɛ́ basↄↄro à nɛ́ pãndenↄ ì dↄ gↄ̃gbɛ̃nↄ kũ nↄgbɛ̃nↄo.
23 À kà wɛ̃̀ wàa do kpɛ́ basↄraakↄ̃ awɛɛsↄↄro.
24 À táa ò kũ Ludao, akũ ò kùrai, kũ Luda a sɛ̀ à bò kãao andunia gũn yãi.
25 Mɛtusela wɛ̃̀ bakɛ̃ndo awɛɛsupplade gũn à Lamɛki ì.
26 A gbɛra à kɛ̀ wɛ̃̀ wàa aakↄ̃ kpɛ́ bakɛ̃ndo awɛɛpla à nɛ́ pãndenↄ ì dↄ gↄ̃gbɛ̃nↄ kũ nↄgbɛ̃nↄo.
27 Kũ à kà wɛ̃̀ wàa siikↄ̃ kpɛ́ basↄraakↄ̃ akuri donsari, akũ à gà.
28 Lamɛki kɛ̀ wɛ̃̀ bakɛ̃ndo awɛɛpla, akũ à nɛ́gↄ̃gbɛ̃ ì.
29 À tↄ́ kpànɛ Nuhu à pì: Gbɛ̃ bire mɛ́ ani ó laakari kpátɛwɛrɛ zĩ gbãna kũ ótɛn kɛ yãi. Odì zĩ gbãna pì kɛ Dikiri láaribona zĩtɛa yãimɛ.
30 Nuhu inaa gbɛra Lamɛki kɛ̀ wɛ̃̀ wàa aakↄ̃ sↄↄrosari à nɛ́ pãndenↄ ì dↄ gↄ̃gbɛ̃nↄ kũ nↄgbɛ̃nↄo.
31 Kũ à kà wɛ̃̀ wàa aakↄ̃ kpɛ́ basↄraakↄ̃ akuri awɛɛsuppla, akũ à gà.
32 Kũ Nuhu kà wɛ̃̀ wàa pla kpɛ́ basↄↄro, à Sɛmu kũ Hamuo kũ Yafɛtio ì.