ZABURA 28

SIM

¹ Dikiri, mↄkↄ̃mmɛ ma gbɛ̀si ũ, matɛni n sísi, ǹsun n sã tatamɛnɛro. Tó n yĩtɛma dé, mani gↄ̃ lán gbɛ̃ kũ ò sì gyãwãnnnↄ bàmɛ.

² Matɛn kpányĩ ↄ́ↄ dↄnnɛ, ǹ sã kpámai, matɛni ma ↄ sɛ́ n kúkia.

³ Ǹsun ma gátɛ lɛɛlɛ kũ gbɛ̃ bɛ̃̀nɛnↄ ke vãnikɛrinↄoro. Òdi yã nna o ń gbɛ̃dakenↄnɛ, ama zãngu mɛ́ à kú ń swɛ̃̀n.

⁴ Ǹ kɛńnɛ ń yãkɛnaaa kũ ń vãnikɛnaao, ǹ fĩna bońnɛ ń dàaa de a gbɛ̀ wí ń musu.

⁵ Òdi Dikiri yãkɛna kũ à zĩkɛnaao yã daro, ani ń litɛ kpɛdangara, ani ń futɛ doro.

⁶ Arubarikademɛ Dikiri ũ, zaakũ à sã kpà ma wɛ̃nda wikilɛnaai.

⁷ Dikirimɛ ma gbãna ũ kũ ma sɛ̃gbakoo, má a náani vĩ ma swɛ̃̀n. Àdi kpámai, ma pↄ dì kɛ nna, madì a sáabu kpá kũ lɛ̀sinaao.

⁸ Dikirimɛ a gbɛ̃nↄ gbãna ũ, à de utɛki ũ kína kũ à kàanɛ, àdi a sura ba.

⁹ Ǹ n gbɛ̃nↄ sura ba ǹ arubarika dańgu, ǹ ń dãkpã ǹgↄ̃ ń kũna gↄrↄ sĩnda pínki.