ZABURA 5

SIM

¹ Ǹ sã kpá ma yãi, Dikiri, ǹ laakari dↄ ma ndanaaa.

² Ma Kína, ǹ ma ↄ́ↄdↄna ma, ma Luda, matɛn wɛ́ kɛmma.

³ Dikiri, ndì ma kòto ma gudↄo, madì ma yãnↄ dↄdↄnnɛ kↄnkↄ, ma wɛ́ dìgↄ̃ dↄnyĩ.

⁴ Mↄkↄ̃n Luda ń ye yã vãniiro, ndìgↄ̃ kú lɛɛlɛ kũ gbɛ̃ vãnioro.

⁵ Ĩadãrii dì le à zɛ n arɛro, n zã yãvãnikɛrinↄi ń pínki.

⁶ Dikiri, ndì ɛ́kɛdenↄ mì dɛ, ń ye gbɛ̃dɛrinↄ kũ gbɛ̃blerinↄ kãiro.

⁷ Makũ sↄ̃, mani gɛ̃ n ↄnn n gbɛ̃kɛ zↄ̃kↄ̃ yãi, mani kútɛ mà arɛ dↄ n kpɛ́a mà mì natɛnnɛ.

⁸ Dikiri, ǹ ma da zɛ́n n náanikɛna yãi, ǹ zɛ́ poromɛnɛ ma wɛtɛrinↄ yãi.

⁹ Zaakũ ń yãke náani vĩro, ń nɛ̀sɛ de lán kaka bɛ bàmɛ, ń kòto de lán mira wɛ̃naa bàmɛ, òdi lɛ́nna kɛńnɛ.

¹⁰ Ǹ tó yã vutɛḿma Luda, ǹ tó yã vãni kũ òtɛn kpákpanↄ wí ń musu. Ǹ pɛ́ḿma n arɛ ń taari dasinↄ yãi, zaakũ ò gì n yã mai.

¹¹ Ǹ tó gbɛ̃ kũ ò utɛna n kĩnaanↄ yáa dↄ, ògↄ̃ lɛ̀ sí kũ pↄnnao gↄrↄ sĩnda pínki. Ǹ ↄ kú gbɛ̃ kũ ò yenyĩnↄa, de ò pↄnna kɛ n yã musu.

¹² Dikiri, ndì arubarika da gbɛ̃ mananↄgu, ndì likańyĩ kũ yenyĩo lán sɛ̃gbako bà.