1 Samuwela 1

1 Sulu Efalaim dogana hesa hesana Elikana, ena nuêu mate Lamataim-Sofi nuêuna ganahewana yai. Efalaim piudi yai, ya miyamiya. In mate Diyeloham natuna. Diyeloham, Elihu natuna. Elihu, Tohu natuna na Tohu mate Sufi natuna. 2 Lalahuna luwaga. Hesa hesana Hana, na hesa Penina. Penina ya fanatu na Hana ya agali. 3 Bolima ouêouli taumoho te ena nuêu yai ya hasahasai Silo bena Guyau Gigibwali Mahudoêidi Tanuwagadi ya fadebasae yo antalasam ya ginaginaulidi lebena yai. Fuyanna yai, Tau antalasam Baêisana hesana Eli. Eli nanatuna tatau luwaga, Hofini yo Fineyasi mate, Guyau ena anêantalasam paisowana sa ginaginauli nuêuna yai. 4 Yena antalasam lahaina ya mahano Elikana haba antalasam suisuidi ya nigohidi be lahuna Penina yo nanatuna tatau yo wawahin adi yopeyope ya feledi. 5 Guyau, Hana ya faêagali be hige nanatuna. In moho Elikana ya fanuha wananahai be ana yopeyope laêilaêi ya felen. 6 Guyau Hana ya faêagali. Logena, fuya ouêouli Penina haba Hana ya anêan kibiyen bena ya eli famanabala. 7 Laulauna te bolima ouêouli ya laulawen. Na yena Hana ya hasai Guyau ena luma mate Penina haba ya lululu felen yo ya eli fatantan be ibege i anêan. 8 Elikana, Lahuna ya faliba komakomaniêi iyen, Hidagu! Paêana somo be wa tan? Sidohana hige u kalahe? Nuwam ya heyaya be? Wananaha hige natum. Nuwagu yai yawa, “Wa fanuha wananahaigu! In moho Ibe nanatum boludi haba wa fanuha wananahaigu, habahim itete." 9 Silo yai sa kalahe maêuda mate Hana ya obiyo. Nuwa kalapi ya lau fafamohafu be ya lau ya tan heyaheyaya Guyau lisina yai. Maihalana yai Guyau ena luma edaêedana duhuna sadaina yai mate tau antalasam, Eli aba taêai yai ya taêataêai. 11 Hana ya angwala iyen, Hewa Wananaha Guyauna, u itagu! Yau em tau paisowa, na egu nuwa kalapi wa ita mate, tabu u nuwa afulegu, u nuwatuhuigu! Yena natugu taumoho wa felegu haba E fele fuyoiyawa lisim be em ya paisowa ena mwahuli mahudoêina yai. Angwala fafaêilalana mate kuluna ibege i ibo. 12 Hana ya laulauêuêula lau Guyau lisina, na Eli mate, Hana moêana yo sopana ya kinokinoêidi. 13 Eli ena nuwatuhu bena haga ya nom, paêana hige alinana i atahi, 14 be ya faliba iyen, Maihala somo nom haba wa fatautau? Am wain u lawe hudoêiyen. 15 Hana alinana ya bui iyen, Baêisa, hige ya nom, egu nuwa kalapi Guyau E faliba. 16 E lauêuêula doha ite paêana nuwagu hige i loholoho be tabu u nuwatuhui uwen, “waihin heyayana." 17 Eli alinana ya bui iyen, U nuwa talu, na u lau! Somo wa anêanêetai Isalaela eda Yaubada lisina yai i felem. 18 Hana ya liba iyen, Baêisa, agutoêi, u mata amnaêegu. Habahim ya lau ya anêan be hige i nuwa heyaya fuyo. 19 Bobonna ma hwalahwalalana, Elikana maêana boga sa eno obiyo be Guyau sa fadebasae. Habahim sa fuyo edi luma Lama. Elikana ma lahuna sa luma gwaêu be ena anêeta Guyau lisina yai sa fawananaha. 20 Habahim, Hana ya boga be natuna taumoho ya yosi. Hesana ya tole Samuwela, iyebom, Guyau lisina yai E anêetai, be ya felegu. 21 Fuyana Elikana yo ana boga mahudoêidi sa hasai Silo bena bolima esega esega antalasamna sa ginauli Guyau ai lisina yo bena ena angwala ya fawananaha, 22 Hana hige i lau. Ya libalau Elikana lisina iyebom, Gwama nom E fadabu, ai mulina haba E lawen Guyau ena ai luma. E fele afulen ai lisina haba ainiya ya miya, ena fuya mahudoêidi yai. 23 Elikana alinana ya bui iyen, Somo wa nuwatuhui ya dudulai, u lau watan yo au miya eeâ, nom ya dabu. Guyau ena liba fasunuma moho i fawananaha. Na waihin luma yai ya miya na natuna ya ita watan eeâ, nom ya dabu. 24 Samuwela, ma kiukiuna, nom ya dabu mulina yai, mate tinana ya hasaen Guyau ena luma, Silo yai. Bulubulumakauna ena bolima faihona yo fwalawa laêina kilogram safuhudohudoêi yo wain ilena hinaga ya abi hasaedi. 25 Bulumakau sa wunui, mulina yai mate gwama sa lawen Eli lebena. 26 Be tinana iyen, Baêisa, wananaha, yau waihinigu, logegu, E obiêobiyo sadaim yai, na E laulauêuêula lau Guyau lisina. 27 Gwama te egu anêeta yai, be egu anêetana debana yai Guyau ya felegu. 28 Be aho te E fele afulen haba Guyau ena ya paisowa fuya ouêouli. Be ainiya Guyau sa fadebasae.