Paisowa 10

1 Doga hesa hesana Koniliyesi mate Sesaliya taonna yai ya miyamiya. In mate hiyala tau lau kulukuluwenna na ena tau hiyala pelena hesana “Itali Ledimenti." 2 In mate Yaubada tau fafaêatitiyenna hesa yo in maêana boga mahudoêidi Yaubada sa fafadebasae. Yo hinaga Diusi dodogadi tau fagogo gesagesa ya saguhi komakomanidi yo fuya ouêouli ya laulauêuêula lau Yaubada lisina. 3 Fuya hesa lahai laêi doha 3 koloki, tautau hesa ya ita. Yaubada ena anelu ya ita wananahai, ya laoma lisina be ya faliba iyen, Koniliyesi! (Paisowa 2:17) 4 Koniliyesi ma êwasabuna anelu ni ya kinokinoi lauwen na iyen, Baêisa, sidohana? Anelu, Koniliyesi alinana ya bui iyen, Em lauêuêula yo em faisagusagu tau gogo gesagesa lisidi yai mate ya famala em ainauya aba fafanuwa hiti Yaubada lisina yai. 5 Doêata te, tatau haisa u fatamalidi ti lau Diyopa be taumoho hesana Saimon, hesana hesa Pita, ti foyahiyama. 6 Ena falihesa ena luma gabogabo sadaina yai maêena sa miyamiya. Saimonna mate in suisui êwapidi tau abiêabi nonohaidi. Saimonna mate in suisui êwapidi tau abiêabi nonohaidi. 7 Anelu ya libaliba ofi mulina yai ya lau na Koniliyesi ena tau lau fayofayo luwaga yo ena tau hiyala hesa ya yogaidi. Ena tau hiyala ni Yaubada ya tabataba ohuwen yo Koniliyesi enehena ya paisowa. 8 Somo ya tubu ni edi ya liba. Habahim ya fatamalidi sa lau Diyopa. 9 Bobonna lahai laêi yai, Diyopa sa hanahanauêi. Pita mate in amainiya na ya hasai luma hewana bena ya lauêuêula. 10 Ya guliyam be ya fanuha bena somo ana ya an. Kalahe hola sa abiêabi nonohai na tautau ya ita. Galewa ya tasoêe ya ita na ginauli hesa nenena doha kaleko laêilaêi duduna fati sa fadalolo lidiyeyama. 12 Ganahewana yai mate suisui fafaêahedi fati, ginauli kamokamodaladi yo kanekanenedi yo ataiêa yekoyekodi hinaga. (Aba Fatubu 1) 13 Alina hesa ya libalau lisina iyen, Pita, U obiyo u wunui be am u an! 14 Na Pita alinana ya bui iyen, Guyau, hige gonowana! Somo dabudabu hige ya anêandi. (Lewitikusi peina 11) 15 Alina wa ya liba boda lau Pita lisina iyen, Somo Yaubada ya faloholoho te an. Tabu u kawa dabudabuwen! 16 Ma faihona doha ite habahim ginauli te sa fafuyo hasaen galewa. 17 Tautau ni aniyona somo mate Pita hola ya fafadosi na Koniliyesi ana hewahewali haêa ya fatamalidi mate Saimon ena luma sa yoêoyoêoi be sa lobahi. Amainiya sa obiêobiyo edaêeda hafohafona yai. 18 Sa yoga lau be sa fatiêo tiyen, Ami taumana hesa hesana Saimon Pita amaiteêi? 19 Pita tautau ni aniyona hola ya fafadosi yo fede Yaluwa iyen, U ataêatahi! Tatau faihona sa laulau yoêoim haêa sa mahanoma ite. 20 U obiyo be u feula lidi u itadi. Tabu u nuwa ladu na ma afa haidam au lau paêana yau E fatamalidima. 21 Yo fede Pita ya leta lidi be ya falibadi iyen, Aeeâ! Ami yoêoyoêoigu. Yau logegu ite. Sidohana be ami laoma? 22 Alinana sa bui tiyen, Hiyala tau lau kulukuluwenna hesana Koniliyesi ya fatamalimai. Diusi mahudoêidi sa liba faloholoho tiyen, “Koniliyesi mate Yaubada tau fafaêatitiyenna yo tau laulau dudulai hesa.” Yaubada ena anelu tabuna ya libalau lisina bena te lau ena luma be somo wa libaen haba ya atahi. 23 Habahim, Pita ya falibadi sa lau luma ganahewana be sa famala ana taumana. Pita Koniliyesi ena Luma yai Paisowa 10:23-33 Bobonna ma hwalahwalalana, ma afa haidadi Diyopa tau kawawananaha hahaisa sa aulaha sa lau. 24 Lahai fafaluwagana yai sa mahano lau Siseliya. Koniliyesi ma afa efana yo afa haidana safalumadi ya yogaidi mate Pita sa bagibagiyen amainiya. 25 Pita bena ya luhulau, na yo fede Koniliyesi maêena sa failobahi. Koniliyesi ya hoba lidi ahena yai be ya fadebasae. 26 In moho Pita ya abi famwaito na iyen, U obiyo! Yau doga gaibu yo ita gonogonowada. 27 Pita yo Koniliyesi sa laulau libaliba eeâ, sa luhulau luma ganahewana na amainiya mate dodoga boludi haêa sa faêoigogo, ya itadi. 28 Ya libalau lisidi iyen, Haêa ami siba fuyoimiu mate ai Diusi ema andabu yo sigu yawasi laugagayodi yai ya libaen mate tabu umi, nuêu hahaisa dodogamiu, yo ai, ta faêilu. In moho Yaubada ya faêitagu mate tabu laugagayo ni lisidi yai, doga ya ita faheyaya. 29 Na fuyana wa fatamalidima agu halulu mate hige ya waiyoêo. Bena E fatiêoimiu, “Somo lisina yai be sa laufigu?" 30 Koniliyesi iyen, Lahai faihona haêa sa ofi mulidi yai na maihala doha 3 koloki maimailafi mate E laulauêuêula egu luma yai te. Yo fede taumoho hudoêi ena leli namanamalina nuwanuwagu yai ya obiyo, 31 na iyen, “Koniliyesi! Yaubada em lauêuêula haêa ya atahi yo tau fagogo gesagesa wa saguhidi hinaga ya itadi. 32 Dodoga hahaisa u fatamalidi ti lau be taumoho hudoêi hesana Saimon Pita ana halulu Diyopa nuêuna yai. In mate taumana na ena falihesa lisina yai ya miyamiya yo in logena suisui êwapidi tau abiêabi nonohaidi. Saimon ena luma mate gabogabo sadaina yai." 33 Yo fede E fatamalidi sa laowa am halulu na ya loholoho be wa laoma. Aho te mahudoêimai êe faêoigogoma Yaubada matana yai êe bagibagiyem be ginauli mahudoêina Guyau haêa ya falibam ema wa liba êe atahi. 34 Pita ya liba fatubu na iyen, Aho te E sibai mate Yaubada hige doga laêi i ita fasae e i ita fakiu. Wananaha! Ita mahudoêida mate gonogonowada. 35 Safalumadi edi laulau sa dudulai yo Yaubada sa fafadebasae mate enehena. Fali alina hinaga maêeda gonogonowada. 36 Yaubada nuwa esega wasana loholohona ya fatamali lawen Isalaela dodogadi lisidi be Yesu Keliso ya libalibaen, haêa ami sibai. In mahudoêidi edi Guyau! 37 Somo sa laulau Diudeya Nuêuna mahudoêina yai mate haêa ami sibaidi. Ya fatubu Galili yai fuyanna Diyon, babasito wasana ya libaen, mulina yai. 38 Yaubada, sidohana Nasaleta dogana, Yesu ena fafamohafuna Yaluwa Tabuna yo gigibwali lisidi yai haêa ami sibai. Yaubada mate maêena na ya lau nuêu ouêouli yai be loholoho ya lau ginauli yo safalumadi Diyabolo ya fafaheyayadi, mahudoêidi ya faloholohodi. 39 Ginauli mahudoêidi ya ginaulidi Diusi dodogadi edi nuêu yai yo Yelusalem nuêudi yai ni, haêa matamai yai êe itadi. Habahim sa wunui be oyagi yai sa tutu fapatu. 40 In moho lahai fafa faihonana yai, Yaubada ya famwahuli fuyoi na ya fataumahata, 41 be safalumamai Yaubada haêa ya fasinabomai êe ita na hige doga mahudoêina i ita. Ai logena maêemai êe kalahe yo êe nom gogo ena mwahuli fuyo lahaina mulina yai. 42 Ya liba adidili lisimai yai bena wasa loholohona êe lauguguyaêen dodoga ai lisidi yo bena êe liba famahata mate, In logena, Yaubada ya fasinabo bena peêipeêidi yo mwahumwahulidi tau fakasadi. 43 Peloweta mahudoêidi haêa wasana sa liba famahata tiyen, “Safalumadi sa kawawananahaêen haba edi heyaheyaya ya nuwa afuledi, Yesu hesana gigibwalina yai." 44 Pita hola ma libalibana na saluma ena wasa sa atahiyen mate Yaluwa Tabuna ya lidima hewadi yai. 45 Tau kawawananaha mwagisadi dududi êwapidi tomotomodi maêedi Pita Diyopa yai sa laoma mate sa noêo paêana Yaubada ena ainauya, Yaluwa Tabuna ya fatamaliyama taêowawa dodogadi lisidi yai hinaga. 46 Sa atahi mate alina hesa - hesa yai sa libaliba yo Yaubada sa fafadebasae. Yo fede Pita iyen, Yaluwa Tabuna dodoga ni ya famohafudi gonogonowana doha ita. Babasito hoêowa yai hige gonowana sai i gududi. 48 Yo fede ya falibadi bena Yesu Keliso ai hesana sa babasito be Pita sa anêetai bena lahai fisa maêedi hola sa miya.