Paisowa 11

1 Tau faêona wasawasa yo tau kawawananaha hahaisa Diudeya Nuêuna yai sa atahi mate taêowawa dodogadi hinaga Yaubada wasana sa abi. 2 Fuyana Pita ya hasai Yelusalem, saluma mwagisa êwapina tomona sa fanuha, sa fatalapili tiyen, 3 na sa liba tiyen, Sidohana be taêowawa edi luma yai wa antaumana yo maidam ami kalahe gogo! Na iti hige “mwagisa êwapina tomona” laulauna ti lau watan. 4 Yo fede somo ya tubu mate Pita ya faliba dudulaidi. 5 Diyopa taonna yai E laulauêuêula na tautau hesa E ita. Na tautau yai mate ginauli hudoêi galewa yai sa dalolo lidima. Nenena doha kaleko hesa laêilaêi duduna fati E ita na sadaigu yai ya todi. 6 Ganahewana E mainene komakomaniêi mate suisui fafaêahedi fati, Suisui yo ataiêa yekoyekodi, yo ginauli kamokamodaladi, amainiya E itadi. 7 Habahim alina hudoêi E atahi ya libama lisigu iyen, “Pita, u obiyo! Be am u lau funuhi be u an!" 8 Na alinana E bui, yawa, “Guyau, hige gonowana! Ginauli fafalaugagayodi yo dabudabudi hola hige moêagu yai ti luhu." 9 Alina ya liba boda galewa yai, fafaluwagana iyen, “Tabu somo laêi u kawa dabudabuwen mate Yaubada haêa ya kawa loholohoêedi!" 10 Ginauli te ma faihona ya taumahata E ita, habahim mahudoêina sa fafuyo hasaen galewa. 11 Hige lofana na dodoga faihona Siseliya yai sa fatamalidima agu halulu be sa mahanoma egu aba miyamiya lumana yai. 12 Yaluwa, nuwagu ya lau fasowali be nuwagu hige i ladu. Yo fede ma afa haidagu, tau kawawananaha faligigi esega te, êe lau. Diyopa yai êe aulaha êe lau Siseliya be êe luhulau Koniliyesi ena luma. 13 Yo fede, Koniliyesi wa, ema ya dede sidohana anelu ya ita ena luma yai ya obiêobiyo na anelu ya libalau lisina iyen, “Dodoga u fatamalidi ti lau Diyopa be doga hesa hesana Saimon Pita ti foyahiyama. 14 In haba emi ya wasa duwai be Guyau haba um yo am boga mahudoêidi ya fofofahimiu be ami mwahuli." 15 Fuyana E fatubu E libaliba, na yo fede Yaluwa Tabuna ya lidima iti hewadi yai gonogonowana doha ita, fuya bwaêibwaêina yai. 16 Habahim, Guyau ena liba te E nuwatuhui iyen, “Diyon mate hoêowa yai ya fafababasito na umi mate Yaluwa Tabuna yai haba ami babasito.” (Maleko 1:8) 17 Ya mahata wananaha mate Yaubada ena ainauya taêowawa ya feledi gonogonowana doha ita te kawawananaha Yesu Keliso lisina yai. Yau hige gonowagu Yaubada ena paisowa ya gudu. (Paisowa 1:4; 2:4; 10:44) 18 Fuyana liba te sa atahiyen yo fede fatalapili sa fatautau na Yaubada sa fadebasae tiyen, “Yaubada fedebom taêowawa dodoga hinaga ya ainauyaidi be sa nuwabui be mwahuli hige anadan sa abi." 19 Fuyana Sitiwin sa lau funuhi umeêehu yai, na mulina yai yo fakamkamna laêilaêi debana yai. Tau kawawananaha hahaisa sa faigelagelainidi be sa lau Fonisiya, Saipelesi yo Antiyoka nuêudi yai. Amainiya Yaubada wasana sa libalibaen Diusi dodogadi lisidi yai moho, na hige dodoga hahaisa lisidi yai. 20 In moho tau kawawananaha haisa iti Saipelesi yo Sailin dodogadi mate sa lau Antiyoka Nuêuna be tau alina Giliki hinaga sa falibadi be Yesu Keliso wasana loholohona sa lauguguyaêen. 21 Guyau ena gigibwali yai sa lauguguya be dodoga boludi Guyau sa kawawananahaêen be sa nuwabui. 22 Fuyana wasa te, tau kawawananaha Yelusalem yai sa atahiyen mate Banabasi sa fatamali lawen Antiyoka. 23 Ena fuya mahano yai Yaubada ena aiêainauya lisidi yai ya itadi be nuwana ya amna. Yo fede nuwadi ya liba faêadidilidi bena Guyau sa abi didiêi ma nuwa ofi fahidi. 24 Banabasi mate in doga loholohona. Yaluwa Tabuna yo sunuma ya lau fafamohafu be dodoga boludi sa falau esegahi lawen Guyau lisina yai. 25 Habahim Banabasi ya lau Tasusi be Saulo ya yoêoi. 26 Fuyanna ya lobahi yo fede Saulo ya foyahi lawen Antiyoka be taudi luwaga, maêedi tau kawawananaha ma afa haidadi sa faêoigogo esega yo baiwa laêilaêi sa laulau fafaêata ya lau eeâ, bolima esega. Be amainiya edi fuya bwaêibwaêina yai Keliso tau famuli watanna hesadi sa tole mate Kulistin. 27 Lahaina yai mate peloweta haisa Yelusalem yai sa lau Antiyoka. 28 Hudoêi mate hesana Agabusi. Yaluwa nuwana ya lau fasowali yo fede ya obiyo be ya liba famahata mate galamo wesawesasa haba nuêu mahudoêina ya fahoina. (Habahim muli yai guliyam te ya tubu Loma nuêuna yai Baêisa Laêilaêi Empela Kaladiusi ena fuya tanuwaga yai). 29 Yesu tau famuli watanna sa oiliba mate hesa - hesa ena ainauya laêina yai ya ainauya be haba sa fatamali lawen afa haidadi Diudeya yai sa gogogo, aba saguhidi. 30 Sa ginauli doha ite, habahim edi ainauya wa Banabasi yo Saulo sa fatamali lawen Diudeya babadadi lisidi yai, be tau kawawananaha, sa feledi.