Paisowa 6

1 Fuyandi yai mate Yesu tau famuli watanina ya tadada be ya laêi ya lau eeâ, Diusi pele luwaga sa faibayaho. Pele hesa mate Hebelu alinadi wananaha tau sibaina na pele hesa Giliki alinadi sa fapaisowa. Salumadi Giliki alinadi sa fapaisowa tiyen, Fuya ouêouli anêanna ami soisoiyedi mate ema hwabuhwabu hige adi au feledi. 2 Yo fede tau famuli watanina 12 te, dodoga mahudoêidi sa yoga gogonidi, na tiyen, “Hige i dudulai bena ai, Yaubada ena libalau faêatana ai fatautau be haba kalahe soiyenna ai modeêen. 3 Afa haidamai, dodoga faligigi luwaga ai ganahewamiu au famwaitodi. Iti bena Yaluwa Tabuna yo sonoga ya lau fafamohafudi be haba ginauli te, sa ita watanidi 4 na ai haba ema fuya mahudoêina êe pei ai lauêuêula yo lau faêata paisowana yai." 5 Tau faêona wasawasa edi nuwatuhu dodoga mahudoêidi sa fanuha. Yo fede Sitiwin ma afa haidana Pilipi, Pokulasi, Nikano, Timon, Pamena yo, Nikolasi sa famwaitodi. Sitiwin mate tau sunuma yo Yaluwa Tabuna ya lau fafamohafu, na Nikolasi mate in Antiyoka dogana na sa fanuwa bui be Diusi edi Yaubada ya kawawananahaêen. 6 Dodoga faligigi luwaga te, sa lau matadi yai sa mwaito na tau faêona wasawasa nimadi sa tole lawedi hewadi yai na enehedi sa lauêuêula be gigibwali sa abi. 7 Yo fede Yaubada ena liba ya tadada be ya lau. Na Yesu tau famuli watanina Yelusalem nuêuna yai mate sa ouli be ya laulau. Na Diusi tau antalasam dodogadi peidi Yesu sa kawawananahaêen hinaga. 8 Yaubada, inonona loholohona yo ena gigibwali Sitiwin ya lau fafamohafu, be fafaêilala yo noêo ya lau ginauli dodoga ganahewadi yai. 9 Diusi dodogadi edi oigogo pelena hesa sa atahi “Biya Afuledi Tataudi” ganahewana yai mate dodoga haisa. Iti mate Sailin yo Alesandiya nuêudi tau laolaoma ma afa haidadi Diusi hahaisa Silisiya yo Eisiya nuêudi yai tau laolaoma, maêedi Sitiwin sa faibayaho. 10 In moho Yaluwa Tabuna, Sitiwin sibasiba ya felen be somo ya libaen hige gonowana moêana ti bui. 11 Yo fede “Biya Afuledi” pelena dodoga haisa simosimo yai sa nuwa liuêidi be haba sa liba tiyen, Mose yo Yaubada ya liba fafaheyayadi na êe atahi! 12 Dodoga, babada yo laugagayo tau lau faêataenna sa eli fasifasinadi yo fede Sitiwin sa tohai be sa foya lawen Diusi dodogadi edi Konisela hesana “Sanhedeli” matadi yai. 13 Habahim tatau haisa sa ledima be sa bwala tiyen, Doga te, eda Dubu Tabuna yo Mose ena laugagayo ya lau paliyedi. 14 êE atahi ya libaliba hinaga iyen, “Yesu Nasaleta dogana te, haba Dubu Tabuna ya lubi lopa yo ulutubu laulaudi Mose ya ledima enehemai te haba ya buidi!" 15 Babada safalumadi Sanhedeli Konisela ganahewana yai sa taêataêai mate matadi sa ala lolo lau Sitiwin lisina na sa ita mate nenena doha anelu.