Maleko 1

1 Itete Yesu Keliso wasana loholohona. In mate Yaubada Natuna. 2 Ena fatufatubu mate haêa peloweta Isaiya ya uli doha ite: Yaubada iyen, “Egu wasa tau lawenina haba E dui bwaêiyen, be em edaêeda ya faêaêa nonohai.” (Malakai 3:1) 3 Doga hesa nuêu pitapitalina yai ya yogayoga iyebom, “Guyau ena edaêeda au abi nonohai; ena aba lau au fadudulai haba ya lau watan!” (Isaiya 40:3) 4 Yo fede Diyon ya laoma nuêu pitapitalina yai be ya lauguguya. Dodoga boludi Yelusalem taonna yai yo Diudeya Nuêuna yai sa lau lisina be ya falibadi iyen, Au nuwabui na au babasito. Haba emi heyaheyaya ni Yaubada ya nuwa afuledi. Yo fede edi heyaheyaya sa liba famahatadi be Diyodan Hoêowana yai ya fafababasitodi. 6 Diyon ena leli ya liêodi mate kamela olodi yai ya ginaulidi na ana bwaêulu mate yosiyosi êwapina na ana kalahe mate digolele yo amoêamo. 7 Dodoga ya falibadi iyen, Doga muligu yai ya laoma mate in ya hasai wananaha, habahim yau. Yau hige ya loholoho haba ya dulu lidi be ana sendolo mahinadi ya tatadi. 8 Yau haba E fababasitomiu hoêowa yai na In haba ai Yaluwa Tabuna ya fababasitomiu. 9 Lahaidi yai ni Yesu, taon hesa hesana Nasaleta, Galili nuêuna yai ya laoma be Diyon wa Yesu ya fababasito Diyodan Hoêowana yai. 10 Yesu hoêowa yai ya pohema. Galewa ya tasoêe ya ita na Yaluwa Tabuna doha waliliya ya lidima hewana yai. 11 Na alina Galewa yai ya libama iyen, Um mate Natu Eseêesegagu. E fanuha wananahaim. 12 Yo fede Yaluwa Tabuna ya foyahi lawen nuêu pitapitalina yai. 13 Amainiya ya miya lahai 40 na Diyabolo ya lauêita. Suisui yekoyekodi amainiya hinaga. In moho anelu sa laoma be sa saguhi. 14 Diyon sa falau deli na mulina yai Yesu ya lau Galili be Yaubada wasana loholohona ya lauguguyaêen iyen, 15 Yaubada ena lahai peloweta sa libalibaen mate ya fawananaha yo Yaubada Aba Baêisa haêa ya sigima! Nuwamiu au buidi yo wasa loholohona au kawawananahaêen! 16 Galili gelegelena yai Yesu ya laulau na tau hamahama luwaga ya itadi. Saimon ma hidana Endulu, edi hagida sa peipeiêidi gabogabo yai. 17 Yesu ya falibadi iyen, Au lau watanigu. Haba dodoga sidohana onaêonadi E fatalahamiu. 18 Makai ma luwaga, edi hagida sa lau afuledi na maêedi sa lau. 19 Ya aulaha boda yo fede Diyemsi ma hidana Diyon ya itadi. Iti mate Sebedi nanatuna. Waga yai edi hagida sa abiêabi nonohaidi. 20 Yesu ya itaêita lau be ya itadi yo fede ya fayogadi. Tamadi Sebedi, sa luhu afulen waga yai, maidana edi tau paisowa na Yesu maêedi sa lau. 21 Yesu yo tau famuli watanina sa mahano lau Kapanayum taonna yai na Sabati hudoêi yai Yesu ya lau aba oiêoigogo lumana yai be ya fatubu ya lau faêata. 22 Yo fede ena lau faêata sa noêoêen paêana In maêena dudulai yo gigibwali yai ya lau faêata. Hige doha laugagayo tau lau faêataendi. 23 Hige walolona doga hesa ya luhulau aba oiêoigogo lumana yai. Doga te, yaluwa heyaheyayana ganahewana yai. Ya êwalaêui iyebom, 24 Yesu, Um mate Nasaleta dogana. Somo wa fanuha lisimai yai? Wa laoma te bena wa lau funuhimai? Haêa E sibaim! Um mate Yaubada ena Wasa Tau Leyamana Fafatabuna! 25 Yesu ya libalau yaluwa heyaheyayana lisina iyen, U famakano na doga ni u lau afulen! 26 Yaluwa heyaheyayana doga te ya kamfafatabubu na ya halabo yo fede ya kalamahano. 27 Dodoga sa noêo. Yo fede sa famoêa libaliba tiyen, Mate somo? Nuwana lau faêata fwaufwaudi haisa? Doga te, gigibwali lisina yai logena yaluwa heyaheyayadi ya falibadi be alinana sa lau watan! 28 Na Yesu wasana ya tadada feula Galili tefa mahudoêina yai. 29 Yesu yo tau famuli watanina maêedi Diyemsi yo Diyon aba oiêoigogo lumana sa lau afulen be sa dudulai sa lau Saimon yo Endulu edi luma. 30 Saimon botiyana waiwaihin tauna sa gigibwali be ya laulau eno na wasana Yesu ena sa liba. 31 Yo fede ya lau ya ita. Ya abilau nimana yai be ya abi famwaito. Yo fede tauna gigibwalidi sa talu mwalugulugu be ya paulaidi. 32 Maihala ya bulu mulina yai dodoga tau asiêasiyebo yo salumadi yaluwa heyaheyayadi ganahewadi yai, mahudoêidi sa ledima Yesu lebena. 33 Taon dodogadi mahudoêidi sa faêoigogoma luma hafohafona yai. 34 Salumadi asiyebo hudoêi - hudoêi sa abidi mate Yesu ya faloholohodi yo yaluwa heyaheyayadi ganahewadi yai ya liba afuledi. Yaluwa heyaheyayadi mate hige gonowana somo ti libaen paêana iti sa sibai mate, in sai. 35 Hwalahwalala ma kamukamumuna Yesu ya obiyo be ya lau mala tupwam yai. Amainiya ya lauêuêula. 36 Saimon ma afa haidana sa lau sa yoêoi yeeâ, 37 sa lobahi. Sa faliba tiyen, Dodoga boludi mate sa yoêoyoêoim. 38 Yo fede Yesu alinadi ya bui iyebom, Nuêu hahaisa sadasadai yai bena te laufidi be haba ainiya E lauguguya hinaga. Logena E laoma. 39 Na Galili mahudoêina ya fataêiêili be aba oiêoigogo lumadi yai ya lauguguya yo yaluwa heyaheyayadi ya liba duidi. 40 Taumoho lepela ya abi ya laoma ya tulibono Yesu nuwanuwana yai, na ya anêetai iyen, Yena wa fanuha, um gonowana wa faloholohogu. 41 Yesu ya nuwatohatohaen be ya abilau tauna yai na iyen, E fanuha. U loholoho! 42 Yo fede lepela asiyebona ya ofi na ya loholoho. 43 Habahim Yesu, doga ni ya falaugagayo iyen, Tabu u fatala libalibaen, na u lau tau antalasam lisina be i ita sipoim. Haba ya fawananaha dodoga ai lisidi mate am asiyebo haêa ya ofi. Ai mulina habahim Mose antalasam somo ya libaen u ginauli watan. Yo fede ya dui be ya lau. 45 Taumoho wa ya lau be ya fatala libalibaen nuêu ouêouli yai be Yesu hige gonowana i lau mahamahata ai taon. Logena ya miya tauduma mala tupwam yai, na dodoga tefa hesa - hesa yai sa laoma lisina.