Maleko 13

1 Yesu Dubu Tabuna ya laulau afulen na ana hewali hesa iyen, Tanuwaga, luma loholohodi yo umeêehu lalaêi u itadi! 2 Yesu iyen, Luma lalaêi te ami itadi? Ibege umeêehu hesa, hesa ai hewana i ota. Mahudoêidi haba sa anlubi lopalopaidi. 3 Oliwe Piuna yai Yesu ya taêataêai na Dubu Tabuna ya ita lawen tefa yai. Pita, Diyemsi, Diyon yo Endulu ibodi Yesu sa fatiêoi tiyen, 4 U falibamai, fuya somo haba ginaulidi te sa tubu? Yo fafaêilala somo haba ya taumahata be êe sibai mate fuyana ya hanahanau? 5 Na Yesu ya falibadi iyen, Au ita komakoman, ibe ti bwalafahimiu! 6 Dodoga boludi hesagu yai haba sa laoma tiyen, “Yau Keliso.” Be boludi haba sa bwalaidi. 7 Yena hiyala sadai yai ye eda lofalofa yai wasadi ami atahiyedi, tabu au êwasabu. Ginauli doha ite haba sa tubu, in moho lahai ofiêofina hola. (2 Tesaloniya 2:2-3; Maleko 13:10; Matiu 24:14) 8 Nuêu hesa haba maidadi nuêu hesa sa hiyala, mwanuêunuêu yo galamo wesawesasa haba nuêu haisa yai. Somo heyaheyayadi sa tubu te, doha kamkamna bwaêibwaêina wawahin sa fahoina edi fuya fanatu yai. 9 Au itaêita komakoman! Haba sa aumiu be sa lawemiu emi nuêu koniseladi lisidi be Diusi edi aba oiêoigogo lumadi yai sa pidilimiu. Gawana yo kin nuwanuwadi yai haba ami obiyo, yau debagu yai, be wasa loholohona ami falibadi. 10 Na wasa loholohona bena ami lauguguya bwaêiyen ai nuêu mahudoêina. (Matiu 24:14) 11 Na yena sa aumiu be ami lau fatala, tabu au mode wananaha auwen, “Somo haba êe libaen?” Somo ya mahata nuwamiu yai au libaen moho, paêana Yaluwa Tabuna ya libaliba, hige umi. 12 Doga hidana haba ya fele afulen be sa wunui yo doha, Tau tamatama haba ya ginauli natuna ai lisina. Wawaya haba sa timuli bui be tamadi yo tinadi sa wunuidi. 13 Debagu yai haba mahudoêidi sa fawaiyunuwemiu. Na sai ya nuwa adidili ya lau eeâ, lahai ofiêofina haba ya mwahuli. 14 Yesu iyen, “Ginauli hesa fatau êwasaêwasabu wananahana” in tabu ainiya, haba ami ita ya obiêobiyo nuêuna yai ni. (Tau fatifatili bena ya nuwatuhu lobahi.) Na salumadi Diudeya yai bena sa gela lau tuêa. 15 Sai ena luma hewana yai tabu i lidi luma ganahewana, 16 Sai gabu yai tabu i fuyo luma ana luhuluhu i abi. 17 Lahaidi ni sa mahanoma mate wawahin bogabogadi yo nanatudi sa fafanomdi lisidi yai ya heyaya wananaha. 18 Yaubada au anêetai be ginaulidi te tabu fuya gogoma yai ti tubu, 19 paêana pilipili ai lahaidi ni haba sa heyaya wananaha. Hige doha fuya bwaêibwaêina yai Yaubada tanoêubu ena fuya ginaulina yai ya laoma eeâ, aho ite. Ai muli, ibege ti tubu fuyo. 20 Ibe Guyau, pilipili lahaidi ni, hige i fatupodi ibege doga hesa i mwahuli. In moho, salumadi ya fasinabodi debadi yai mate, Yaubada lahaidi ni ya fatupodi. 21 Lahaina yai ni yena sai iyen, “Keliso ami ita” e “In logena auuâ.” Mate, tabu au kawawananaha. 22 Paêana keliso yo peloweta bwalabwaladi haba sa laoma be noêo yo fafaêilala sa lau ginauli, yena gonowanadi mate Yaubada ena fasinabo dodogadi haba sa foya ponolidi. 23 Logena bena ami ita komakoman! Somo matada yai haba ya tubu mate haêa E falibamiu. 24 Pilipili lahaidi sa ofi na ai mulina haba maihala ya kamukamumu yo nawalahi ibege i sina. 25 Kipwala galewa yai haba sa beêu yo galewa ginaulidi haba sa mwahmwahiu. (Isaiya 13:10; Efeso 6:12) 26 Ai lahaina ni Doga Natuna haba sa ita ma gigibwali laêilaêina yo ma namanamalina ya laolaoma yada yai. 27 In haba anelu ya fatamali lawedi tefa bwauli, yawana, bolima yo yalasi edi aba towa yai. Na Yaubada ena fasinabo dodogadi haba sa faêoigogo esegahidi, tanoêubu ana dan ya lau eeâ, galewa ana dandan. 28 Oyagi doha kuhou lau faêatana te au nuwatuhui. Yena lagana sa tutuli ami sibai mate siuhwalo ya laolaoma. 29 Doha, yena ginaulidi te sa tubu ami itadi mate ami sibai, lahaidi ni sa hanahanauma. 30 E faliba dudulaimiu mate, dodogadi haisa aho te sa miyamiya ibege ti peêi eeâ, ginaulidi mahudoêidi te sa tubu. 31 Galewa yo tanoêubu haba sa ofi in moho, yau egu liba ibege i ofi. 32 Hige sai laêi lahaina yo maihalana i sibai. Anelu galewa yai hinaga hige ti sibai yo Natuna hinaga hige i sibai. Tamana iyabona ya sibai. 33 Au ita komakoman yo au tuhutuhuli! Paêana maihalana hige au sibai. 34 Doha taumoho hesa ena nuêu ya lau afulen na ya lau eda lofalofa. Ena tau lau fayofayo hesa - hesa ana paisowa ya felen. Luma edaêedana hafohafona tau itaêita watanina mate ya faliba bena ya tuhutuhuli. 35 Logena bena ami tuhutuhuli paêana luma tanuwagana ena fuyoma maihalana hige au sibai. Haba maimailafi e ai iêipa atipuna ye kamkam gwanegwane yai ye ya ifi tatatali. 36 Ibe i mahanoma feula be i lobahimiu ma enomiu. 37 Somo E fafalibamiu mate haba mahudoêidi E falibadi yawa, “Au tuhutuhuli.” (Maleko 14:34)