Maleko 12

1 Heyaheyason hesa Yesu ya falibadi, iyen, Doga hesa wain gabuna ya umahi na ya ganai. Wain aba folona ya ginauli yo gati lumana hewana lofalofa ya faêobiyo. 2 Wain ena fuya anaho yai mate gabu tanuwagana ena tau lau fayofayo ya dui lawen lisidi na iyen, U lau u falibadi be wain monina egu tefa ti felem, be u leyama. 3 Tau itaêita wata fayofayo dogana sa tohai be sa talai na sa dui fafuyo ma nima afaêafana. 4 Habahim gabu tanuwagana tau lau fayofayo hesa hinaga ya dui, na kuluna sa dem tili yo sa liba fafaheyaya. 5 Fafaihonana ya dui mate sa wunui. Tau lau fayofayo peidi hinaga ya duidi. In moho Laulauna gonogonowana, haisa sa pidilidi, na haisa sa wunuidi. (Delamaiya 7:26, Eimosi 3:7 Sekalaiya 1:6). 6 Ofiêofina, natuna ya fanuha wananahai ya dui na iyen, Natugu haba sa faêatitiyen. 7 Gabu tau ita watanina ibodi sa libaliba tiyen, Gabu tanuwagana natuna itete. In haba tamana ena tanohi ya abidi. Ta wunui! Ena tanohi haba te abi! 8 Yo fede natuna sa tohai be sa wunui, na silanna sa pei lawen gabu mulimulina yai. 9 Gabu tanuwagana haba somo ya ginauli? Haba ya laoma be ya wunuidi na dodoga haisa ya ledima be wain gabuna sa ita watan. 10 Uliêuli te haêa ami fatili. “Tau abi luma umeêehu sa êwaiyoêoêen mate muli yai ya famala umeêehu otaêotafahina. 11 “Itete Guyau ya ginauli be itaêitana mate ya loholoho wananaha!” (Samsi 118:22-23) 12 Yo fede Diusi babaêisadi edaêeda sa yoêo bena Yesu sa au paêana heyaheyason ni, iti tautaudi. In moho dodoga baiwadi sa êwasabuwedi be Yesu sa lau afulen. 13 Muli yai Heloda ena pele yo Falesiya mate dodoga sa duidi sa lau Yesu lisina be haba ena libaliba yai sa fasai buluhi. 14 Be tiyen, Tanuwaga, êe sibai mate um doga dudulaina. Dodoga lalaêi yo kikiêina edi nuwatuhu heyaheyayadi ibege u lau watandi, in moho Yaubada ena liba, dudulai yai wa lau faêataen. Be, haga u falibamai, takesi êe famaisa Loma edi Sisa ai lisina ya dudulai e hige? Haba êe tole e hafena? 15 In moho edi bwala Yesu haêa ya sibai be alinadi ya bui, iyebom, Sidohana be ami fasai bulubuluhigu? Haga moni au leyama be ya ita. 16 Esega sa felen, na iyen, Sai tautauna yo hesana moni yai te? Alinana sa bui tiyen, Sisa, Loma edi Kin. 17 Yo fede Yesu iyen, Somo Kin Sisa ena, mate au felen. Na Yaubada ena, mate Yaubada au felen. Yo fede edi noêo sa ofi! 18 Habahim Sadusi haisa (iti sa liba mate dodoga ibege ti obiyo fuyo) sa laoma Yesu lisina be tiyen, 19 Tanuwaga, Mose ya uli mate yena taumoho ma lahuna hige nanatudi na taumoho ya peêi, hidana hwabuna haba ya fai na ya fanatu mate sa famala tau peêi nanatuna. (Diutelonomi 25:5, Luta 2:20, Luta 4:4-8) 20 Doga hesa nanatuna tatau faligigi luwaga. Tau tuwaha ya nahi be hige nanatuna na ya peêi. 21 Fafaluwagana hwabu wa ya fai, be hige natuna na hinaga ya peêi. Fafaihonana hinaga hwabu ya fai be hige natuna. 22 Doha, na ya lau weeâ, waihin wa, tatau faligigi luwaga ya fai ofinidi, mate hige natudi, na sa peêi. Ofiêofina mate waihin hinaga ya peêi. 23 Obiyo fuyo lahaina yai, waihinna ni haba sai lahuna? Paêana tataudi faligigi luwaga waihinina haêa sa fai. 24 Yesu alinadi ya bui iyen, Ami lau pono paêana Buka Tabuna yo Yaubada ena gigibwali hige au sibai. 25 Tau peêipeêi sa obiyo fiyo, iti mate doha anelu galewa yai. Ibege ti nahi boda. 26 Obiyo fuyo libana Mose ena buka yai ami fatili e higeêe? Somo yai Yaubada ya libalau Mose lisina oyagi ala balebalelemna ganahewana yai, fuyanna iyen, “Abelaham, Isako yo Iyakobo edi Yaubada mate Yau.” (Auêaulaha 3:16; 1 Kin 19: 1-18) 27 Ami lau pono wananaha! In mate tau mwahumwahuli edi Yaubada. Hige tau peêipeêi edi Yaubada. (Diyon 11) 28 Laugagayo tau lau faêataena hesa ya laoma, edi liba ya atahi. Ya sibai mate Sadusi edi liba Yesu ya bui loholohoêidi yo fede ya fatiêoi iyen, Laugagayo mahudoêina ganahewana yai tausomo ya hasai wananaha? 29 Yesu iyen, Esega ya hasai wananahana mate itete: “Isalaela au ataêatahi! Guyau in iyabona eda Yaubada. 30 Yaubada u gadosisiyen ma nuwa ofifahim, em nuwatuhu mahudoêina, yaluwam mahudoêina, yo ma adidilim.” (Diutelonomi 6:5) 31 Laugagayo fafaluwagana mate itete: “Falem tau miya u gadosisiyen, doha um wa gadosisi fuyoim.” (Lewitikusi 19:18), (Luka 10:25-37) Laugagayodi luwaga te, sa hasai wananaha, habahim hahaisa. 32 Laugagayo tau lau faêataenna ya libalau Yesu lisina iyen, Tanuwaga, wa liba dudulai mate, Yaubadana, esega; hige sai hesa; In ibona moho. 33 Yaubada u gadosisiyen ma nuwa ofi fahim, em nuwatuhu mahudoêina, yo ma adidilim. Falem tau miya u gadosisiyedi, doha um wa gadosisi fuyoim. Laugagayo luwaga te sa hasai wananaha, habahim yosiyosi gabugabudi yo ainauya hahaisa Yaubada te felen aba antalasam gabuna yai. (1 Samuwela 15:22) 34 Ena bui Yesu ya atahi mate ya dudulai, yo fede ya faliba iyen, Yaubada Ena Aba Baêisa hige i lofa lisim yai. Yo fede sa êwasabu be hige somo hesa Yesu ti fatiêo fuyoi. 35 Fuyana Yesu ya laulau faêata Dubu Tabuna dobidobina yai, ya fatiêo iyen, Sidohana be laugagayo tau lau faêataenna itiye, “Keliso mate Deiwidi laulauwewena?" 36 Yaluwa Tabuna nuwatuhu Deiwidi ya felen be iyen, “Guyau ya libalau egu Guyau lisina, ‘Ai sibagu u taêai yeeâ, am waiyunu E toledi ai ahem ubuna.” (Samsi 110:1) 37 “Ibe Deiwidi iyen, ‘Um Guyau,’ haba sidohana be in Deiwidi laulauwewena?” Na baiwa laêilaêi, ya ataêatai ma nuwa kwadedi. 38 Yesu ena lau faêata ganahewana yai iyebom, Laugagayo tau lau faêataedi, au ita sipoêidi! Salumadi sa fanuha bena edi leli lofalofadi na sa leu yo sa sai ai maketi be haba dodoga sa laulautoêiyedi. 39 Aba oiêoigogo lumadi yai yo mataêasi ganahewadi yai sa fanuha bena aba taêai loholohodi yai sa taêai. 40 Hwabuhwabu edi luma ginaulidi sa bwalafahidi be ai edi, sa abidi, yo lauêuêula sa falofadi. Lau bwalabwala te lisidi yai haba kamkamna lalaêi sa fahoinadi. 41 Diusi edi Dubu Tabuna yai Yesu ya taêataêai, moni aba husanina sadaina yai be dodoga boludi moni sa toletole ya kinokinoêidi. Tau fagogo boludi mate moni lalaêi sa toledi; 42 na hwabuhwabu hige ena moni ya laoma be moni kapa kikiêuka luwaga ya husanidi, laêina doha 5 toea. 43 Ana hewahewali ya yoga gogondima na ya falibadi iyen, E faliba dudulaimiu! Hwabuhwabu tau gogo gesagesana te, ainauya laêilaêi ya tole aba husanina yai, na habahim hahaisa. 44 Tau fafagogo mate edi tefa sa ota, na waihin ni ena moni ofiêofina. Ana kalahe edaêedana logena, ya tole ofiêi.