Romanos 11

1 Cacua: ¿Te qui’ipola’ lun israelita, iÆne lixanuc’ ȽanDios? ¿Te ja’ni ecani’epola’ nulemma? A’i, toÆta’a aimi’iya. Iya’ jouc’a nin’israelita, aixinyoxi i’hua Abraham, lixanuc’ Benjamín aitatahueló. 2 IÆne petsi aÆinca ixanuc’ ȽanDios imetsaicopola’ ai’a timajnlita. Aimi’iya mecani’eyacola’. ¿Ja’ni aicoÆsina’ loya’apa al Paxi LiniÆingiya? ¿AicoÆsina’ jiÆpe lonescopa li’ipa cal profeta Elías micufquila’ lixanuc’, iÆne ixanuc’ Israel? Tijoc’i’ ȽanDios, tixa’hue titoc’iÆa’, timi: 3 “MainenDios, maiPoujna, ¡ToxinÆa’ lo’epa iÆne lan xanuc’! Ima’apá loprofeta, ummetsaipá Æo’altar. Iya’ caituca’ aimaf’i’, iya’ lahuenno aÆma’a’ma." 4 ȽanDios, ¿te quitalai’e’eco’ma Elías? Timi: “A’i, aimopa’a cotuca’. IÆmaf’i’ tixhuaispola’ ocuenaye acaitsi mil lan xanuc’. Ainenaquila’, iÆne ai’huexi, a’i quilexc’onÆingoÆaic’ cal ídolo Baal." 5 Ma itsiya toÆe ti’i. Itsiya pe lomana’ lan xanuc’ Israel tiÆmana’ hualca iÆniya aÆinca ixanuc’ ȽanDios. ȽanDios itoc’ipola’, i’huijf’epola’. 6 ȽanDios quituca’ tixpic’e nai Æotoc’iyacola’, nai Æo’huijf’eyacola’. IÆne notoc’iyacola’ aimicuicomma ate’a mi’e’me al c’a, tijouÆa’ ti’huijf’e’mola’. A’i. Ja’ni toÆta’a lo’epa ȽanDios coÆa’ aimitoc’iyacola’ lixanuc’, ma’ le’a ti’najtse’mola’ lo’epa al c’a. 7 Itsiya, ¿te qui’ipa? Lixanuc’ Israel tama tehueyi te co’iya mepenufyacola’ ȽanDios, aiquixim’me. Hualca Æinca ixim’me. Pe niximpá iÆne Æi’huijf’epola’ ȽanDios. Locuenaye i’ipa axna Æilunxajma’. 8 Li’ipola’ ma to loya’apa al Paxi LiniÆingiya, tuya’e’: ȽanDios i’e’epola’ muf liÆpicuejma’, i’e’epola’ afohue, ataÆpe. Ma toÆta’a tuyalaicoyi itsiya litine. 9 Cal rey David jouc’a tinescola’ iÆniya, ticua: Lan xanuc’ ni’epá lixcay, iÆne noteÆ‘mipá liÆf’as xanuc’, ma toÆta’a ti’e’em’mola’ iÆniya. Ma mitetsoyi ticuaitsa no’epá laic’, ti’noÆintsola’. 10 Timufc’otsola’ liÆ‘u’, aimixim’me, tuliquintsola’ no’epá laic’, ti’hua ticuxenaitsola’. 11 ¿Te ja’ni cacua: IÆniya lixanuc’ Israel joupa imenajpola’? ¿Te ȽanDios ecani’epola’ nulemma? A’i toÆta’a laifcuapa. Ƚinca iÆne aiquiÆcueca, aiquilihuequi loxc’ai’ipola’ ȽanDios. ToÆiya ȽanDios epi’ipola’ lane locuenaye xanuc’ tihuejle, tunÆulâle. TijouÆa’ iÆne lixanuc’ Israel tixim’me al c’a li’ipola’ locuenaye xanuc’, ticua’me: “Illanc’ jouc’a aÆ‘e’entsonga’ iÆe al c’a”. 12 Lixanuc’ Israel aiquilihuequi ȽanDios, toÆiya ȽanDios acueca’ tipaxnela’ lan xanuc’ ni petsi lomana’ li’a Æamats’. Itsiya iÆne lixanuc’ Israel tehue’ela’, toÆiya acueca’ al c’a lulijpa locuenaye lan xanuc’. TijouÆa’, ticuaitsi litine ȽanDios tipaxneconatsola’ iÆne lun Israel, tepenufconatsola’, ¿te co’iya? Ƚinca xonca al c’a lo’iya. 13 Itsiya capalaic’olhuo’ imanc’ unc’ocuenaye xanuc’. ToÆe ca’ay lanic’ lalapi’ipa ȽanDios. Iya’ oÆ‘apóstol. ȽanDios lummepa cu’itsolhuo’ Lataiqui’. Cu’itsolhuo’ jahuay imanc’ a’i cunc’ijudío. ToÆta’a laif’epa. 14 Cacua: Laif’as xanuc’ judío ti’iÆa’ quiÆsina’ te ts’i’ic’ li’ipolhuo’ imanc’, aga tinesle: “Illanc’ jouc’a lapenufle iÆe al c’a”, tijouÆa’ aimecani’eyacola’. 15 ȽanDios lecanaipola’ iÆne lan xanuc’ Israel, locuenaye lan xanuc’, ni petsi lomana’ li’a Æamats’, epi’ipola’ lane tiyejmaleÆe ȽanDios. Itsiya litine iÆne lun Israel tocomma to lomanapola’. Ticuaitsi litine tepenufconatsola’ ȽanDios, Æinca timaf’i’ina’mola’. 16 Ƚinca ȽanDios tepenufcona’mola’. Ƚa’i lolanc’ecoyacu cal ts’e trigo ja’ni titsufconÆe ȽanDios tutani Æax’e, a’i ma le’a iÆe Æax’e i’huexi ȽanDios, Æipanemma Æax’e jouc’a i’huexi. Anuli al ’ec, ja’ni Æime i’huexi ȽanDios Æimané iÆe al ’ec jouc’a i’huexi ȽanDios. 17 IÆne lixanuc’ Israel, ȽanDios ti’onÆicola’ to lifapa al ’ec, iÆe al c’a al ’ec olivo jouc’a Æimané. Imanc’ unc’ocuenaye xanuc’ ti’onÆcospolhuo’ to Æimané al ximalo olivo. ȽanDios iÆonc’e’epola’ hualca Æimané iÆe li’olivo, ma jiÆpiya ifinc’ipolhuo’ imanc’. Tenef’molhuo’ petsi iÆe al c’a olivo. Itsiya, imanc’ jouc’a i’e’epolhuo’ imané al c’a olivo. IÆe al c’a lime lujay titoc’elhuo’. 18 AimoÆcua’me: “Iya’ xonca ninc’a. IÆne Æimané olivo liÆonc’e’epola’ ȽanDios, iÆne a’ijc’a.” Ja’ni toÆta’a toÆnesyi tocomma to imanc’ toÆtoc’eyi lime. A’i. Lime titoc’elhuo’ imanc’. 19 Aga toÆcua’me: “ȽanDios liÆonc’epola’ Æimané olivo ipic’a aÆfinc’iÆa’, lanef’la’ jiÆpe”. 20 Ne’. ȽanDios iÆonc’epola’ iÆniya petsi aimi’huaiyijnyi. Imanc’ ifinc’ipolhuo’. Ma’ moÆ‘huaiyijnyi toÆmanecu jiÆpiya. Itsiya aimoÆâlof’e’moÆtsi. ToÆ‘etsoÆtsi cuenna. 21 ȽanDios iteÆ‘mi’mola’ iÆne ma Æimané olivo, iÆne Æenef’pá lime. Aiquixinnila’ acuanuc’la. Imanc’ ja’ni aimi’hua moÆ‘huaiyijnyi, ¿te aimiteÆ‘miyacolhuo’? Ƚinca titeÆ‘mi’molhuo’ jouc’a. 22 IÆe lo’epa ȽanDios timuqui te ts’i’ic’ lipicuejma’. IÆque tixina cuanuc’, jouc’a ti’i’ma tixtu’hua. Petsi lenajpoÆtsi, aimihuejconayi, iÆniya ixtuc’o’mola’. Imanc’ a’i. Iximpolhuo’ unc’icuanuc’la, itoc’i’molhuo’. Ja’ni ti’hua tolihuejcoyi ȽanDios, iÆque pe joupa iximpolhuo’ unc’icuanuc’la, maÆque ȽanDios ti’hua titoc’i’molhuo’. Ja’ni aimolihuejconayi tetec’e’e’molhuo’. 23 IÆniya liÆonc’epola’, ja’ni aimihuejcona’me lixcay cane, ja’ni tehuejcona’me ȽanDios, iÆque tifinc’icona’mola’, tenef’cona’mola’. ȽanDios Æinca nipajnya ti’e’ma toÆta’a. 24 IÆne loquej lan olivo ituca’ ituca’ liÆsans. Anuli aximalo, locuena al c’a olivo. Imanc’ ma mi’onÆcospolhuo’ to Æimané al ximalo olivo ȽanDios etec’e’ena’molhuo’, ipa’apolhuo’, enef’polhuo’ jiÆpe al c’a olivo. Ja’ni iÆe lipime joupa i’epa ȽanDios, ¿te aimi’iya mi’eya ja’ni a’i quipime? Ƚinca, ti’i’ma. Ti’i’ma tifinc’icona’mola’ jiÆpe liÆ‘ec iÆniya ma Æimané al c’a olivo. 25 Cunc’aipimaye, ma caÆtuca’ laÆpicuejma’ aimi’iya maluhuaÆyacu iÆe lataiqui’ lonescopa li’ipola’ lixanuc’ Israel. ȽanDios Æinca aÆmuc’inga’. Aipic’a ti’iÆa’ coÆsina’ te ts’i’ic’ li’ipola’ iÆne lan xanuc’. Ja’ni a’i, aga toÆcua’me: “Illanc’ xonca ac’a laÆpicuejma’, xonca aÆsina’”. Itsiya lixanuc’ Israel le’a huata iÆniya iÆsina’ te ts’i’ic’ lo’eyacu ja’ni tetenÆcocoÆa’ ȽanDios lo’epa. Locuenaye li’ipola’ axna liÆpicuejma’. Ticuaiyunni litine tixhuai’nitsola’ iÆne a’ij judío pe no’huaiyijmpá Jesucristo, iÆne lun Israel jouc’a tilanc’e’e’mola’ ac’a liÆpicuejma’, ti’huaiyijm’me. 26 ToÆta’a tunÆul’me jahuay lixanuc’ Israel. ToÆta’a loya’apa al Paxi LiniÆingiya, tuya’e’ lonespa ȽanDios, ticua: ȽonÆu’eyacola’ lixanuc’ Jacob tipaiyohuo laipiÆya’ Sión. Tipai’i’mola’ iÆniya liÆpicuejma’, alihuejcona’ma. 27 ToÆta’a tenanÆ‘ma laitaiqui’ aÆmaneconca. Iya’ quiÆonc’e’ena’mola’ liÆjunac’. 28 IÆne, ma’ aimihuejyi Lataiqui’ loya’apa iÆe al c’a lixpic’epa ȽanDios, iÆque aimepenufila’. Xonca tepenufilhuo’ imanc’. Ƚinca aiquecanai’ila’ nulemma. ȽanDios ti’hua ti’nujuaitsila’ iÆne lixanuc’, joupa i’huijf’epola’ liÆtatahueló. 29 ȽanDios aimipai’i lipicuejma’. Ja’ni joupa icupa cataiqui’, iÆe lepi’ipa aimixic’eya. IÆque petsi Æijoc’ipa aimetets’iya. 30 Imanc’, luyaipa quitine aimolihuejyi ȽanDios. Itsiya tolihuejyi. IÆne lixanuc’ Israel aiquilihuequi. ToÆiya ȽanDios xonca iximpolhuo’ unc’icuanuc’la, epenufpolhuo’. 31 Ƚinca, itsiya litine iÆne lixanuc’ Israel aimihuejyi, toÆiya ȽanDios iximpolhuo’ unc’icuanuc’la imanc’. TijouÆa’ jouc’a iÆniya tixim’mola’ acuanuc’la. 32 Ja’ni lixanuc’ Israel, ja’ni locuenaye lan xanuc’, jahuay ma’ anuli aiquilihuequi ȽanDios, iÆque joupa iximpola’ jahuay axpennaiqui. ToÆta’a ja’ni lixanuc’ Israel, ja’ni locuenaye lan xanuc’, ma’ anuli nipajnya ti’i’ma tixim’mola’ acuanuc’la ȽanDios. 33 Cacua: ¡Acueca’ juaiconapa ȽanDios! ¡Acueca’ juaiconapa lipicuejma’! ¡Acueca’ juaiconapa lixina’! Aimi’iya mixinyacu te ts’i’ic’ loxpic’epa, ni minesyacu: ToÆe, toÆe lo’eya. 34 ¿Te anuli cal xans ixina’ te ts’i’ic’ lipicuejma’ ȽanDios? ¿Te anuli cal xans i’epoxi Æipomxi ȽanDios? ¿Te timuc’inni ȽanDios? 35 O ¿te ti’i’ma lapi’i’me ȽanDios, tijouÆa’ aÆ‘najtse’e’monga’? A’i aimi’iya. 36 Jahuay lopa’a ȽanDios ixpic’epa ti’iÆa’, timajnle, jahuay ma’ i’huexi, iÆque aPoujna. Ma’ iÆque tix’najtsi’inÆe, timetsaiconÆe cal Cueca’. ToÆta’a ti’iÆa’ itsiya litine, Locuena Quitine jouc’a. Amén.