ዛረዋ 5

1 ሙሴ እስራኤልያ አሳ ኡባ እትፐ ጼሲደ፥ ሀዋዳን ያጌዳ፤ “ህንተኖ እስራኤልያ አሳዉ፥ ታን ሀች ህንተንቶ ኦድያ አዋዩዋነ ህግያ ስስተ፤ ህንተ ኡንቱንታ ታማርተነ ምንሲደ ኦተ። 2 መና ጎዳይ ኑ ጾሳይ ሲና ደርያ ቦላን ኑናና ጫቁዋ ጫቀቴዳ። 3 መና ጎዳይ ሀ ጫቁዋ ጫቀቴዳዌ ኑ አዎቱዋ ጻላላና ግደና፤ ሀች ደኡዋን ደእያ ኑ ኡባናካ ጫቀቴዳ። 4 ሄ ደርያ ቦላን ኤጽያ ታማ ግዶን ግዲደ፥ መና ጎዳይ ህንተ ስንን ኤቂደ ህንተናና ሃሳዬዳ። 5 ታንካ ሄ ዎደ መና ጎዳይ ግያዋ ህንተንቶ ኦዳናዉ፥ ጾሳፐነ ህንተፐ ግዱዋን ኤቃድ፤ አያዉ ጎፐ፥ ህንተ ታማዉ ያዪደ፥ ደርያ ፑደ ከስበይክታ። ጾሳይካ ሀዋዳን ያጌዳ፤ 6 “ግብጼ ጋድያፐ አይለተ ጎልያፐ ኔና ዎዜዳዌ ታን መና ጎዳ ነ ጾሳ። 7 “ታፐ አትና፥ ሀራ ጾሳቱ ነዉ ደኦፕኖ። 8 “ቦላ ሳሉዋን ደእያዋ ግድና፥ ዎይ ጋርሳ ሳኣን ደእያዋ ግድና፥ ዎይ ሳኣፐ ጋርሳና ደእያ ሃ ግዶን ደእያዋ ግድናካ፥ አያ ምስልያነ ነዉ ኤቃ ኦፓ። 9 ኔን ኡንቱንቶ ሆኮፓ፤ ዎይ ኡንቱንቶ ጎይኖፓ፤ አያዉ ጎፐ፥ ታን ታና እጽያዋንታ አዎቱዋ ናጋራ ድራዉ፥ ናናቱዋ ሄዘንነ ኦይደን የለታ ጋካናዉ ሙርያዋ፤ ታን፥ መና ጎዳይ ነ ጾሳይ ቃናትያ ጾሳ። 10 ሽን ታን ታና ሲቅያዋንታነ ታ አዛዙዋ ናግያዋንታ ሻአ የለታ ጋካናዉ ታ አገና ሲቁዋ በሳይ። 11 “መና ጎዳ ነ ጾሳ ሱን ጮ ጼሶፓ፤ አያዉ ጎፐ፥ መና ጎዳይ ባረ ሱን ጮ ጼስያዋ ሙረናን አገና። 12 “መና ጎዳይ ነ ጾሳይ ኔና አዛዜዳዋዳን፥ ጌሻ ኦደ ሳምባታ ጋላሳ ናጋ። 13 ኔን ኦያ ኦሶ ኡባ ኡሱፑን ጋላሳን ኦ። 14 ሽን ላፑን ጋላሳይ መና ጎዳዉ፥ ነ ጾሳዉ ሳምባታ። ሄ ጋላስ አይ ኦሶነ ኦፓ፤ ኔን ዎይ ነ አቱማ ናአይ፥ ዎይ ነ ማጫ ናታ፥ ዎይ ነ ቆማይ፥ ዎይ ነ ቦራይ፥ ዎይ ነ ሀሪ፥ ዎይ ነ ሀራ መሄቱ፥ ዎይ ነ ካታማን ደእያ በቲ፥ ሄ ጋላስ አያ ኦሶነ ኦፕተ። ኔን ሸምፕያዋዳን ነ አቱማነ ማጫ ቆማቱካ ሸምፕኖ። 15 ኔን ግብጼ ጋድያን አይልያ ግዳደ ደኤዳዋ ዶጎፓ፤ ቃይ መና ጎዳይ ነ ጾሳይ ባረ ዎልቃማ ኩሽያንነ ባረ ምጨቴዳ ቀስያን ያፐ ኔና ከሴዳዋ ዶጎፓ። መና ጎዳይ ነ ጾሳይ ሳምባታ ጋላሳ ኔን ናጋናዳን፥ ኔና አዛዜዳዌካ ሄዋ ግሻሳ። 16 “መና ጎዳይ ነ ጾሳይ ነዉ እምያ ጋድያን ነ ኔረካ አዱቃና ማላነ ነዉ ሎአና ማላ፥ መና ጎዳይ ነ ጾሳይ ኔና አዛዜዳዋዳን፥ ነ አዉዋነ ነ ዳዮ ቦንቻ። 17 “አሳ ዎፓ። 18 “ሻርሙጾፓ። 19 “ዉኦፓ። 20 “ነ ሾሩዋ ቦላን ዎርዱዋ ማርካቶፓ። 21 “ነ ሾሩዋ ማቻቶ አሞቶፓ፤ አ ጎልያ፥ አ ሾይቃ፥ አ አቱማ ቆማ፥ ዎይ አ ማጫ ቆማቶ፥ ዎይ አ ቦራ፥ ዎይ አ ሀርያ፥ ዎይ አዉ ደእያዋ አያነ አሞቶፓ ያጌዳ። 22 “ደርያ ቦላን ታማ ግዶፐ፥ ሻርያ ግዶፐነ ጎርዴዳ ማ ግዶፐ መና ጎዳይ ቁ ጌዳ ኮሻን ሺቁዋ ኡባዉ ኦዴዳ ቃላቱ ሀዋንታ፤ እ ኡንቱንቱ ቦላን አያነ ጉጅቤና። ቃይ ኡንቱንታ እ ላኡ ማሰቴዳ ሹቻቱ ቦላ ጻፊደ፥ ታዉ እሜዳ። 23 “ደሪ ታማን ጹገትሽን፥ ማ ግዶፐ ኮሻ ህንተ ስሴዳ ዎደ፥ ህንተ ዛርያ ካፓቱነ ህንተ ጭማቱ ታኮ ዪደ፥ 24 ሀዋዳን ያጌድታ፤ ‘በአ፥ ኑን መና ጎዳ ኑ ጾሳ ኮሻ ታማ ግዶፐ ስሴዳ ዎደ፥ መና ጎዳይ ኑ ጾሳይ ባረ ቦንቹዋነ ባረ አንጋ ኑና በሴዳ። ቃይ ኑን ጾሳይ አናና ሃሳዪደ አሳይ ደኡዋን ደአናዉ ዳንዳይያዋ ሀቼ በኤዶ። 25 ሽን ሀ ዎልቃማ ታማይ ኑና ይሳናዉ ዳንዳዬ፤ ያትና፥ ኑን አያዉ ሀይቄቶ? መና ጎዳ ኑ ጾሳ ቃላ ኑን ላኤን ስሶፐ፥ ኑን ሀይቄቶ። 26 አያዉ ጎፐ፥ አሹዋ ማዬዳዋን፥ ኑን ስሴዳዋዳን ታማ ግዶን ግዲደ ሃሳይሽን፥ ደኦ ጾሳ ቃላ ስሲደ፥ ፓጻ ደኤዳ አሳይ ኦኔ? 27 ሄዋ ድራዉ፥ ሙሴ! ኔን ሺቃደ፥ መና ጎዳይ ኑ ጾሳይ ግያዋ ኡባ ስሳ፤ መና ጎዳይ ኑ ጾሳይ ነዉ ኦድያዋ ኡባ ኔን ኑዉ ኦዳ፤ ኑንካ ስሲደ ኦና’ ያጌድታ። 28 “ህንተ ታዉ ሃሳይሽን፥ መና ጎዳይ ህንተ ግያዋ ስሲደ፥ መና ጎዳይ ታና ሀዋዳን ያጌዳ፤ ‘ሀ አሳይ ነዉ ኦዴዳዋ ኡባ ስሳድ፤ ኡንቱንቱ ጌዳዋ ኡባ ልከ ጌድኖ። 29 ኡንቱንቱዉነ ኡንቱንቱ ናናዉ መናዉ ኡባባይ ሎአ ግዳናዳን፥ ታዉ ያያናዉነ ታ አዛዞቱዋ ናጋናዉ ኡንቱንቶ ኡባቶካ ሀዋ ማላ ዎዛናይ ደእ ኤረኔሻ! 30 ሀእ ኔን ባደ፥ ኡንቱንቱ ባረንቱ ዱንካንያዉ ስማናዳን ኦዳ። 31 ሽን ኔን ሀዋን ታ ማታን ኤቃሻ፤ ኡንቱንቱ ላታናዳን ታን ኡንቱንቶ እምያ ጋድያን ኡንቱንቱ ኦና ማላ፥ ኔን ኡንቱንታ ታማርሳና ታ አዛዙዋ፥ ታ አዋዩዋነ ታ ህግያ ኡባ ታን ነዉ ኦዳና’ ያጌዳ። 32 “ህንተኖ እስራኤልያ አሳዉ፥ ሄዋ ግዶፐ መና ጎዳይ ህንተ ጾሳይ ህንተና አዛዜዳዋ ኡባ ኦናዉ ናገትተ፤ አፐ ኡሸቻ ዎይ ሀድርሳ ጎፕተ። 33 ህንተ ደኡዋን ደአና ማላ፥ ኡባባይ ህንተንቶ እንጀታና ማላ፥ ቃይ ህንተ ላትያ ቢታንካ ህንተ አዱቂደ ደአና ማላ፥ መና ጎዳይ ህንተ ጾሳይ ህንተና አዛዜዳ ኦገ ኡባን ሄመትተ።