ዛረዋ 6

1 “ህንተ ላታናዉ ብያ ጋድያን ህንተ ኦናዳን ታን ህንተና ታማርሳና ማላ፥ መና ጎዳይ ህንተ ጾሳይ ታና አዛዜዳ አዛዞቱ አዋዮቱነ ህገቱ ሀዋንታ። 2 ህንተ ላይይ አዱሳ ግዳና ማላ፥ ህንተ፥ ህንተ ናናቱነ ህንተ ናናቱ ናናይካ ታን ሀች ህንተና አዛዝያ ጾሳ አዋዩዋነ ህግያ ናግያዋን ህንተ ላይን ኡባን መና ጎዳዉ፥ ህንተ ጾሳዉ ያይተ። 3 ህንተኖ እስራኤልያ አሳዉ፥ ኡባባይ ህንተንቶ ሎአ ግዳናዳንነ መና ጎዳይ፥ ህንተ አዎቱዋ ጾሳይ፥ ህንተንቶ ጌዳዋዳን፥ ማነ ኤሳ ጎግያ ጋድያን ህንተ ሎይ ጮራታናዳን፥ ሀ ህገቱዋ ስስተነ ምንሲደ ኦተ። 4 “ኔኖ እስራኤልያዉ፥ ስሳ፤ መና ጎዳይ ኑ ጾሳይ እት መና ጎዳ። 5 ኔን መና ጎዳ ነ ጾሳ ነ ኩመን ዎዛናፐ፥ ነ ኩመን ሸምፑዋፐነ ነ ኩመን ዎልቃፐ ሲቃ። 6 ሀቼ ታን ኔና አዛዝያ ሀ አዛዞቱዋ ነ ዎዛናን ዎ። 7 ሀ አዛዛቱዋ ኔን ነ ናናቱዋ ታማርሳ፤ ኔን ነ ሶን ኡትያ ዎደ፥ ኦግያን ሀመትያ ዎደ፥ ግስያ ዎደነ ደንድያ ዎደካ ኡንቱንታ ሃሳያ። 8 ማላታ ኦደ ነ ኩሽያን ኡንቱንታ ቃቻ፤ ቃይ ነ ሶምእያንካ ማላታዳን ዎ። 9 ነ ፐንግያ ማቃንያ ቦላንነ ነ ድርሳ ፐንግያ ቦላን ኔን ኡንቱንታ ጻፋ። 10 “መና ጎዳይ ህንተ ጾሳይ ህንተንቶ እማና ጊደ ህንተ አዋቶ፥ አብራሃማዉ፥ ይሳቃዉነ ያቆባዉ ጫቄዳ፥ ህንተ ኬጽቤና ግታነ ሎኦ ካታማቱ ኩሜዳ ቢታ እማና። ህንተ ኩንቤና ዱረታይ ኩሜዳ ጎለቱዋ፥ ህንተ ቦክቤና ኦላቱዋ፥ ህንተ ቶክቤና ዎይነቱዋነ ዛይትያ ዎጋራቱዋ ህንተንቶ እምያ ዎደ፥ ህንተካ ሚደ ካሌዳ ዎደ፥ 12 ህንተና ግብጼፐ፥ አይለተ ጋድያፐ ከሴዳ መና ጎዳ ዶገናዳን ናገትተ። 13 መና ጎዳዉ፥ ህንተ ጾሳዉ፥ ያይተ፤ አ ጻላላዉ ጎይንተ፤ አ ሱንንካ ጫቂተ። 14 ህንተ ዩሹዋን ደእያ አሳይ ጎይንያ ሀራ ጾሳቶ ጎይኖፕተ። 15 አያዉ ጎፐ፥ ህንተ ግዶን ደእያ መና ጎዳይ ህንተ ጾሳይ ቃናትያ ጾሳ፤ አ ሀንቁ ህንተ ቦላን ኤጽ ከሳና፤ እ ህንተና ቢታ ቦላፐካ ፕቲደ ይሳና። 16 “ማሳሀን ህንተ አ ፓጬዳዋዳን፥ መና ጎዳ ህንተ ጾሳ ፓጮፕተ። 17 መና ጎዳይ ህንተ ጾሳይ ህንተና አዛዜዳ አ አዛዞቱዋ፥ አ ዎጋቱዋነ አ አዋዮቱዋ ምንሲደ ናግተ። 18 ህንተዉ ኡባባይ ሎአ ግዳና ማላ፥ መና ጎዳ ስንን ህንተ ልከባነ ሎኦባ ኦተ። ያቶፐ፥ ህንተንቶ እማናዉ መና ጎዳይ ህንተ አዋቶ ጫቄዳ፥ ሄ ሎኦ ቢታ ህንተ ላታና። 19 መና ጎዳይ ባረ ጌዳዋዳን ህንተ ሞርከቱዋ ኡባ ህንተ ስንፐ የደርሳና። 20 “ስንፐ ህንተ ናናይ፥ መና ጎዳይ ኑ ጾሳይ ህንተና አዛዜዳ ሀ ዎጋ፥ አዋዩዋነ ህግያ ብለይ አዬ? ያጊደ ህንተና ኦችያ ዎደ፥ 21 ህንተ ኡንቱንቶ ሀዋዳን ያጊደ ዛርተ፤ ‘ኑን ግብጼ ጋድያን ግብጼ ካትያ አይለቱዋ፤ ሽን መና ጎዳይ ባረ ምኖ ኩሽያን ኑና ግብጼፐ ከሴዳ። 22 ቃይ መና ጎዳይ ኑ ጼልሽን፥ ግብጼ ቢታ ቦላን፥ ግብጼ ካትያ ቦላንነ አ ሱንቱዋ ኡባ ቦላን ግታነ ያሽያ ማላታቱዋነ ማላልስያባቱዋ ኦዳ። 23 ሽን እ ኑ ማይዛ አዋቶ እማና ጊደ ጫቄዳ ቢታ ኑና ገልሲደ፥ ኑዉ እማናዉ ኑና ግብጼፐ ከሴዳ። 24 ያቲደ ሀች በእያዋዳን፥ ኑዉ ኡባ ዎደካ ሎአ ግዳና ማላነ ኑን ደኡዋን ደአና ማላ፥ መና ጎዳይ ኑና ሀ አዋዮቱዋ ኡባ ናጋናዳንነ መና ጎዳዉ፥ ኑ ጾሳዉ፥ ያያናዳን አዛዜዳ። 25 እ ኑና አዛዜዳዋዳን፥ መና ጎዳ፥ ኑ ጾሳ፥ ስንን ሀ አዛዞቱዋ ኡባ ምንሲደ ናጎፐ፥ ሄዌ ኑዉ ጽሎተ ግዳና’ ያግተ።