ኤርምያሳ ማፃፋ 33

1 ኤርምያስ ቡሮ ናገይሳታ ዳባባን ቃሸትድ ደእሽን፥ ጎዳ ቃላይ ዛሪድ እያኮ ይስ። 2 ሳኣ መዳ ጎዳይ፥ ጊግስድ እያ በሳን ዎዳ ጎዳይ፥ እያ ሱንይ ጎዳ ጌተተይስ ሀይሳዳ ያጌስ፦ 3 “ታና ፄጋ፤ ታ ነዉ ኮያና፤ ነ ኤሮና ግታባነ ዎልቃማባ ታ ነዉ ቆንጭሳና።" 4 ጎዳይ፥ እስራኤለ ፆሳይ፥ ባብሎነ ኦላ፥ ቢታ ዶረነ፥ ድኤተ ተቃና መላ ድርሳ ግምብያ ምንናዉ ላልዳ ሀ ካታማ ኬታባነ ይሁዳ ካዎታ ጋታባ ሀይሳዳ ያጌስ። 5 ኤንታ ኢታተ ጋሶን፥ ታ ሀ ካታማ ቦላፈ ታ ሶምኡዋ ደንዳ ግሾ፥ ህንተራ ኦለታናዉ ታኒ ታ ሀንቁዋን ሾጫና አሳ አሀን ሀ በሳን ኩንናዉ ባብሎነት ገላና። 6 ግዶሽን፥ “ታ ሀ ካታማነ እያን ደእያ አሳ ዛራዳ ፓና፤ ኤንታ ፓያተ ዛራና፤ ሳሮነ ዎፓ ዱሱ ኤንታዉ እማና። 7 ታኒ ይሁዳ አሳነ እስራኤለ አሳ ድኦፐ ዛራና፤ ኤንቲ ካሰ ደእዳይሳዳ ኦዳ ኤንታ ግምባና። 8 ኤንቲ ታና ኦዳ ናጋራ ኡባፈ ታ ኤንታ ጌሻና፤ ኤንቲ ናቁዋነ ኤንታ ማካላ ኡባ አቶ ጋና። 9 የሩሳላመ ካታማይ ታዉ ኡፋይስ፥ ቦንቾነ ጋላታ ሳአን ደእያ ካዎተታ ኡባ ስንን ኤሀና። ታኒ የሩሳላመ አሳስ ኦያ ሎኦባነ ካታማስ ኤህያ ዱረተነ ሳሮተ ስእድ፥ ካዎተት ኡባይ ያሻን ኮኮራና” ያጌስ ጎዳይ። 10 “ህንተ፥ ‘አስነ መሄይ ባይና ባይሳ’ ግዳ ሀ በሳን፥ አስነ መሄይ ባይና ይሁዳ ካታማታንነ የሩሳላመ ኦገታን ኡፋይስነ እልልሳ ግርስ ስኤታና። 11 የነ ያጋኖ ግርስ፥ ኡፋይሳ ግርስ፥ ሄሳዳካ፥ ፆሳ ኬ ጋላታ ያርሾ ኤህድ፥ “እ ኬሀ ግድያ ግሾ፥ እያ ማሮተይ መርናሳ ግድያ ግሾ፥ ኡባፈ ዎልቃማ ጎዳ ጋላትተ። ያግድ የፅሸ ፆሳ ኬ ጋላታ ያርሾ ኤክድ ያ አሳ ግርሳይ ስኤታና። ታኒ ኤንታ ድኦፐ ዛራና፤ ኤንቲ ካሰ ደእዳይሳዳ ኦዳ ዎና” ያጌስ ጎዳይ። 12 “ሀ አሳይነ መሄይ ባይና ባይሳ ቢታንነ እያን ደእያ ካታማታን ሄንንቾት ባንታ ዶርሳ ዉድያ ሄምያ ጋደይ ዳና። 13 ገዘ ካታማታን፥ ጋ ካታማታን፥ ነገበ መላ ቢታን ደእያ ካታማታን፥ ብንያመ ቢታን፥ የሩሳላመ ዩሹዋን ደእያ በሳታንነ ይሁዳ ካታማታን ሄንንቾት ባንታ ዶርሳታ ዛሪድ ታይባና” ያጌስ ኡባፈ ዎልቃማ ጎዳይ። 14 “ታኒ እስራኤለ አሳስነ ይሁዳ አሳስ ገልዳ ቃላ ፖልያ ዎደይ ያና። 15 ሄ ዎደ ታኒ ዳዊታ ኮቻፈ እስ ፅሎ አጫ ደንና፤ እ ሱረ ፕርዳ ፕርዳና፤ ፅሎ ኦና። 16 ሄ ዎደ ይሁዳ አሳይ አታና፤ የሩሳላመ አሳይ ዎፑ ግድ ደአና። ሀ ካታማይ፥ ‘ጎዳይ ኑ ፅሎተ’ ጌተትድ ፄገታና። 17 ዳዊታ ኮቻፈ እስራኤለ አራታን ኡትያ አስ የና። 18 ሄሳዳካ፥ ፁሳ ያርሾ፥ ካ ያርሾነ ሀራ ያርሾ ያርሻናዉ ሌወ ኮቻፈ ካህነ ግድያ አስ መርናዉ ታ ስንፈ የና” ያጌስ ጎዳይ። 19 “ጎዳ ቃላይ ኤርምያሳኮ ሀይሳዳ ያግድ ይስ። 20 ጋላሳስነ ቃማስ ታ ዎዳ ዎጋ መንድ፥ ጋላስነ ቃም ባንታ ዎድያን ስመረቶና መላ ኦድ ታ ጫቁዋ ላማናዉ ህንተ ዳንዳእኮ፥ 21 እያ ኮቻፈ አራታን ኡትያ አስ ዮናዳ፥ ታ አይልያ ዳዊታራ ጫቅዳ ጫቁዋ ላማና፤ ታዉ ኦያ፥ ሌወ ኮቸ ግድዳ ካህነታራ ጫቅዳ ጫቁዋ ላማና። 22 ታኒ ታ አይልያ ዳዊታ ኮቻነ ታ ስንን ኦያ ሌወ ኮቻ ታይባናዉ ዳንዳኤቶና ሳሎ ፆልንቶታዳነ ማካናዉ ዳንዳኤቶና አባ ሻፍያዳ ዳርሳና” ያጌስ ጎዳይ። 23 ጎዳ ቃላይ ቃስካ ኤርምያሳኮ ሀይሳዳ ያግድ ይስ። 24 “ሀ አሳይ፥ ‘ጎዳይ ባ ዶርዳ ናምኡ ካዎተታ፥ እስራኤለነ ይሁዳ አጋግስ’ ያግድ ኦደተይሳ ነ አኬካብኪ? ኤንቲ ታ አሳ ካድ፥ ባና ዳንዳእዳ ካዎተ ግዶኮና ግድ ቆፖሶና። 25 ታኒ ጋላሳራነ ቃማራ ጫቅዳ ጫቁዋነ ሳሎነ ሳአ ህግያ ምንቦናባ ግድኮ፥ 26 ያይቆባ ዘረነ ታ አይልያ ዳዊታ ኮቻ አጋጋና። እያ ናይታፐ አብራሃመ፥ ይሳቃነ ያይቆባ ኮቻታ ቦላ ካዎናዉ ዳዊታ ኮቻ ዶርከ። ታኒ ታ አሳ ማራና፤ ኤንታ ሻሉዋ ዛራና” ያጌስ ጎዳይ።