ኤርምያሳ ማፃፋ 34

1 ባብሎነ ካዎይ ናቡካዳናፆር፥ እያ ኦላንቾት ኡባይነ እ ሃርያ ካዎተታን ደእያ አሳ ኡባይ፥ የሩሳላመነ የሩሳላመ ዩሹዋን ደእያ ካታማታ ኡባ ኦልያ ዎደ፥ ሀ ቃላይ ጎዳፐ ኤርምያሳኮ ይስ፦ 2 ጎዳይ እስራኤለ ፆሳይ ሀይሳዳ ያግስ፤ “ባዳ ይሁዳ ካዋ ሰደቅያሳኮ ሀይሳዳ ያጋ፦ ‘ታኒ ሀ ካታማ ባብሎነ ካዋ ኩሸን አዳ እማና፤ እ ካታማ ታማን ፁጋና። 3 ኔኒ እያ ኩሸፐ ከሳ ኤካካ፤ ኔኒ ኦይከታና፤ እያዉ አዳ እመታና። ኔኒ ነ አይፈን ባብሎነ ካዋ በአና፤ እካ ኔራ ኦደታና። ኔኒ ባብሎነ ቢታ ባና’ ያጌስ ጎዳይ። 4 “ግዶሽን፥ ይሁዳ ካዋዉ ሰደቅያሳ፥ ጎዳይ ግያባ ስአ። ኔኒ ኦላን ሀይቃካ። 5 ነ ሳሮ ሀይቃና። ኔፐ ካሰ ደእዳ ካዎታ ቦንቹዋስ፥ ነ ማይዛታስ እፃነ ጩይስዳይሳዳ፥ አሳይ ነ ቦንቹዋስ እፃነ ጩይሳና። ዎ ኑ ካዋዉ፥ ያግድ ነዉ ዬካና። ታኒ ጎዳይ ሀይሳ ኦዳይስ” ያጌስ። 6 ሄሳፈ ጉየ፥ ናበይ ኤርምያስ ሀ ትንብትያ ይሁዳ ካዋ ሰደቅያሳስ የሩሳላመን ኦድስ። 7 ሄ ዎደ ባብሎነ ኦላንቾት የሩሳላመ ካታማነ ይሁዳን አትዳ ላክሶነ አዜቃ ካታማታ ኦልዶሶና። ይሁዳን አትዳ ግምበትዳ ካታማት ኤንታ ፃላላ። 8 ካዎይ ሰደቅያስ አይለታ ላአ ከስያ አዋጁዋ አዋጃናዉ የሩሳላመን ደእያ አሳ ኡባራ ጫቅዳፐ ጉየ፥ ጎዳ ቃላይ ኤርምያሳኮ ሀይሳዳ ያግድ ይስ፦ 9 ሄ አዋጆይ፥ እስ እስ እብራወ አስ አደነ ማጫ አይለ አይለተፈ ላአ ከሶ። ኦንካ አይሁደ አስ ግድዳ ባ እሻ አይለ ኦፎ። 10 ሄሳ ግሾ፥ አሳይነ ሀላቃት ኡባይ ጫቅዳ ጫቁዋን ባንታ አደነ ማጫ አይለታ አይለተፈ ላአ ከሳናዉነ ዛሪድ አይለተን ሃሮና አጋናዉ ጊግድ ኤንታ አይለተፈ ላአ ከስዶሶና። 11 ሽን ኤንቲ ባንታ ቆፋ ላምድ፥ አይለተፈ ላአ ከስዳ ባንታ አደነ ማጫ አይለታ ዛሪድ ሃርዶሶና። 12 ሄሳፈ ጉየ፥ ጎዳ ቃላይ ኤርምያሳኮ ያግስ። 13 ጎዳይ፥ እስራኤለ ፆሳይ ሀይሳዳ ያጌስ፦ “ታኒ ህንተ ማይዛታ ግብፀፈ፥ አይለተ ቢታፈ ከስዳ ዎደ ኤንታራ ሀይሳዳ ያጋዳ ጫቃስ። 14 ሄ ጫቁዋ ማራን፥ ‘እብራወ አይለይ ደእያ አሰ ኡባይ፥ አይለታ ኡሱፑን ላይ ኦስስድ፥ ላፑን ላይን አይለተፈ ከስድ የድተ’ ያጋዳ ኪታስ። ሽን ህንተ ማይዛት ታ ኦድያባ ስኦና እፅዶሶና፤ ታዉ ኪተትቦኮና። 15 ህንተካ ማታ ዎደፐ ካሰ ህንተ ናጋራፐ ስሚድ፥ አይለታ ላአ ከሳናዉ አዋጅደታ፤ ታ ስንን ሱረባ ኦደታ። ቃስ ሄሳ ኦናዉ ታ ስንን፥ ታ ሱንይ ፄገትያ ታ ኬን ጫቅደታ። 16 ሽን ህንተ፥ ህንተ ቆፋ ላምድ፥ ታ ሱን ቱንስደታ። ኤንቲ ኮይዳ በሳ ባና መላ ላአ ከስዳ አደነ ማጫ አይለታ ዛሪድ ሃርደታ።" 17 ሄሳ ግሾ፥ ጎዳይ፥ “ህንተ ታዉ ኪተቶና እፅድ፥ ህንተ እሻ ዎይኮ ህንተ ሾሩዋ አይለተፈ ላአ ከስያ አዋጁዋ አዋጅበከታ። ህንተ ቦላ ኦል፥ ቦሽነ ኮሽ ከያና መላ ታ አዋጃይስ። ታ ህንተና ሳአ ቦላ ደእያ ካዎተታስ ዳጋማ ኦና። 18 ታ ጫቁዋ መንዳ አሳ፥ ታ ስንን ጫቁዋ ናጎና እፅዳ አሳ፥ ሹክድ፥ ናምኡ በሳን ሻክድ፥ እያ ግዶራ አዳ ማራ መላ ታ ኤንታ ኦና። 19 ሄ አሳይ ይሁዳ ሀላቃታ፥ የሩሳላመ ሀላቃታ፥ ቢታ አይሰይሳታ፥ ካህነታነ ናምኡ በሳን ሻክዳ ማራ አሹዋ ግዶራ አዳ አሳ ኡባ። 20 ታ ኤንታ፥ ኤንታ ሞርከታ ኩሸንነ ኤንታ ዎናዉ ኮይያ አሳ ኩሸን አዳ እማና፤ ኤንታ አሀይ ሳሎ ካፎታስነ ሳአ ዶአታስ ካ ግዳና። 21 “ታኒ ይሁዳ ካዋ ሰደቅያሳነ እያ ሀላቃታ፥ ኤንታ ሞርከታ ኩሸን፥ ኤንታ ዎናዉ ኮየይሳታ ኩሸንነ ህንተና ኦለይሳ አግዳ ባብሎነ ኦላንቾታ ኩሸን አዳ እማና። 22 ታኒ ባብሎነ ኦላንቾታ ኪትን፤ ኤንቲ ሀ ካታማ ስማና። ኤንቲ ሀ ካታማ ኦላና፥ ድአናነ ታማን ፁጋና። ይሁዳን ደእያ ካታማታ አስ ዶና ባይሳ በሲ ኦና” ያጌስ ጎዳይ።