ናህመ ማፃፋ 4

1 ኑኒ ድርሳ ግምበ ኦሱዋ ዶምዳይሳ ሳንባላፅ ስእዳ ዎደ ይሎ ኤፅድ ኑና ለቅስ። 2 ባ ላገታነ ሳማረ ኦላንቾታ ስንን፥ “ሀ ፓና አይሁደት አይ ኦናዉ ቆፖና? ድርሳ ግምብያ ዛር ግምባናዉ ኮዮናዬ? ያርሾ ያርሻናዉ ኮዮናዬ? ኤንቲ እስ ጋላሳን ኦሱዋ ኦድ ዉርሳና ዳኒ? ኤንቲ ግምቤስ ሀንያ ሹቻታ ፁገትድ ዶረትዳይሳ ግዶፈ ከሳናዉ ዳንዳኦና?” ያግስ። 3 እያ ማታን ኤቅዳ አሞነ ቢታ አስ ግድዳ ፆበይ፥ “ኤንቲ ዋንዳ ግምበ ግምባናዉ ዳንዳኦና? ኤንቲ ግምብያ ቦላ ዎርካን ከያኮ ላለታና” ያግድ ለቅስ። 4 ታኒ ሀይሳዳ ያጋዳ ዎሳስ፤ “ኑ ፆሳዉ፥ ኤንቲ ኑና ዋት ለቅስያኮ፥ ሀይሳ በአ! ኤንቲ ኑና ጫይያ ጫሻይ ኤንታዉ ግዶ። ባንታ አቁዋ ቦንቀትድ አላጋ ቢታን ድኤትዳ አስ ግዶ። 5 ኤንቲ ግምበይሳታ ጫሻን ካዉሽዳ ግሾ፥ ኤንታ ናቆይ ጌሞፎ፤ ኤንታ ናጋራ ነ ስንፈ ቁቾፋ” ያጋስ። 6 ኑኒ ግምብያ ኦሱዋ ቃንፆና ኦዳ። አሳይ ኦሱዋ ምን ኦዳ ግሾ ግምብያ ኦሶይ ኤለስድ ባጋ ጋክስ። 7 ሳንባላፅ፥ ፆበይ፥ አራበ አሳይ፥ አሞነ አሳይነ አሽዶዳ አሳይ የሩሳላመ ግምበ ኦሶይ ሎኦ ኦሰትሸ ደኤይሳነ ዶያ በሳት ጎርደትዳይሳ ስእዳ ዎደ ዳሮ ይሎትዶሶና። 8 ሄሳ ግሾ ኤንቲ እስፈ የሩሳላመ ይድ ኑና ኦላናዉነ መቶ መናዉ ማቀትዶሶና። 9 ሽን ኑኒ ኑ ፆሳ ዎስዳ፤ ኤንታ ተቃናዉ ቃማነ ጋላስ ናገይሳታ ዎዳ። 10 ሄ ዎደ ይሁዳ አሳይ፥ “ቶሆይ ኑና ዳቡርስስ፤ ቡሮ ደንዳናዉ ኮሽያ ዶረትዳ ዳሮ ሹች ደኤስ፤ ያንያ ግሾ፥ ኑኒ ግምብያ ግምባናዉ ዳንዳኦኮ” ያግዶሶና። 11 ኑ ሞርከት፥ “ኤንቲ ኑ ኦያባ ኤራናፐነ በአናፐ ስን ኑ ኤንታ ግዶ ገልድ ኤንታ ዎና፤ ኤንታ ኦሱዋካ ኤሳና” ያግዶሶና። 12 ኑ ሞርከታ ሄራን ደእያ አይሁደት ታማ ስሚድ ኑ ሞርከት ኑና ኡባ ባጋራ ኦላናዉ ጊገቶይሳ ኑስ ኦድዶሶና። 13 ሄሳ ግሾ፥ ኑ አሳፐ ማሸ፥ ቶራነ ዶንገ ኦይክዳ አሳ ኤንታ ሶ አሳን አሳን ጊግሳዳ ኦሶይ ዉርቦና ሄራን ግምብያስ ጉየራ ጋርሳ ባጋን ናጋና መላ ኦስ። 14 አሳይ ዳጋምዳይሳ ታኒ በእዳ ዎደ ደንዳ ኤቃዳ፥ አሳኮ፥ ኤንታ ካለይሳታኮነ ሀላቃታኮ፥ “ኑ ሞርከታ ያዮፍተ! ግታነ ያሽያ ፆሳ ቆፕተ። ህንተ እሻታስ፥ ህንተ አደ ናይታስነ ማጫ ናይታስ፥ ህንተ ማቸታስነ ህንተ ኬስ ኦለትተ” ያጋስ። 15 ኑ ሞርከት ኑና ቆሀናዉ ማቀትዳይሳ ኑኒ ኤርዳይሳ ኤንቲ ስእዶሶና። ቃስ ፆሳይ ኤንታ ማቁዋ ሀዳ ከስዳይሳ አኬክዶሶና። ሄሳፈ ጉየ፥ ኑ ኡባይ ስሚድ፥ ግምበ ኦሱዋ ዶምዳ። 16 ሄ ዎደፐ ዶምድ ታ አሳፐ ባጋይ ኦሱዋ ኦያ ዎደ፥ ባጋይ ፁሩረ ማእድ፥ ቶራ፥ ጎንዳለነ ዶንገ ኦይክድ ናጋና መላ ኦስ። ቃስ ሀላቃት ይሁዳ አሳ ኡባፈ ጉየራ ኤቅድ ምንሶና፤ 17 ግምብያ ግምበይሳትነ ኮሽያባ ቶከይሳት እስ ኩሸን ኦላ ሚሸ ኦይክድ፥ እስ ኩሸን ኦሶ ኦሶና። 18 ግምብያ ኦያ እሶይ እሶይ ማሸ ባ ፄሳን ዳንጭድ ደኤስ። ሞይዘ ፑነይስ ኡባ ዎደ ታፐ ሻከትድ ኤረና። 19 ካለይሳታኮ፥ ሀላቃታኮነ አሳ ኡባኮ፥ “ግምብያ ኦሶይ ግታነ ዳልጋ ግድያ ግሾ ኑኒ እሶይ እሱዋፈ ሃክድ ደኦስ። 20 ሄሳ ግሾ፥ ህንተ ሞይዘ ፑኖ ስእያ ዎደ ሄ በሳ ታኮ ሃ ሺቅተ። ኑ ፆሳይ ኑ ግሾ ኦለታና” ያጋስ። 21 ሄሳ ግሾ፥ ዎንታ ጎንተይ ዞኦ ዋያ ዎደፐ ዶምድ ኦማርስ ፆልንቶይ ከያና ጋካናዉ ባጋይ ኦያ ዎደ ባጋይ ቶራ ኦይክድ ናጌስ። 22 ሄ ዎደ ታኒ አሳኮ፥ “ቃማ ኑና ናጋናዉነ ጋላስ ኦሱዋ ኦናዉ ህንተ ኡባይ ህንተና ማደይሳታራ የሩሳላመን አቅተ” ያጋስ። 23 ታና ግድን፥ ታ እሻታ ግድን፥ ታ አሳ ግድን፥ ዎይኮ ታና ናገይሳታ ግድን፥ ኑ ኡባይ ኑ ማኡዋ ከሶና አቆስ፤ ኑ ኦላ ሚሸይ ኑፐ ሻከተና።