ማዝሙረ ማፃፋ 58

1 ደርያ ሃረይሳቶ፥ ቱማ ህንተ ልከ ኦደቴቲ? አሳ ኡባስ ፅሎ ፕርዴቲ? 2 ግደና፥ ህንተ ዎዛናን ኢታባ ሀልቼታ፤ ህንተ ኩሸይ ቢታ ቦላ ጌላባ ኦስ። 3 ኢታ አስ አየ ኡሎፐ ዶምድ ሀሌስ፤ የለትዳ ጋላሳፐ ዶምድ፥ ባሌስነ ዎርዶ ኦደቴስ። 4 ኤንቲ ሾሻዳ ዪሻራ ደኦሶና፤ ኤንቲ ቱለ ጎፐዳ ስኦኮና። 5 ብተይስ አይ ጭንጫ ግድኮካ፥ ጎፐይ እያ ፄስ ስኤና። 6 አቤት ፆሳዉ፥ ጋሞ አች ዳንያ ኤንታ አቻ መን፤ ጎዳዉ ኤንታ ሳክልያ ካ። 7 ኤንቲ ጉክዳ ሃ ግዶ፤ ባንታ ዶንግያ ዱክያ ዎደ፥ ዶንገ ቶራ አይፈይ ዮ። 8 ኤንቲ ማይድ ይያ  ሳሶዳ ሀኖ፤ አየ ኡሎፐ ሀይቅድ ዎያ፥ አዋ ፖኦ በኦና ቦሻዳ ሀኖ። 9 ኤንቲ አጉን ግድድ ዳያናፐ ካሰ፥ ኤንቲ ቡሮ ፑቶ ግድድ ደእሽን፥ ኤንታ ባ ሀንቁዋን ይሳና። 10 ናጋራንቾታ ቦላ ሀሎ ከይያ ዎደ ፅሎት ኡፋይታና፤ ኢታታ ሱን ባንታ ቶሁዋ ሜጨታና። 11 ሄ ዎደ አሳይ፥ “ቱማ ፅሎታስ ዎይቶይ ደኤስ፤ ሳአ ቦላ ፕርድያ ፆሲ ደኤስ” ያጋና።